Génesis 30 - Yura porciones de la biblia

Jacobpa wake wetsawu adiwu Bilhá weta

¹ Raquelpa Jacobweta wake atirubaxakĩ awẽ chipi Líaki sidadi. Raquelpa Jacob yuidi: “Ẽ beweta wake ayabax ẽ dai”, wadi.

² Naskawaitu dikai Jacob naki sidayana yuidi: “Mi shiname ẽ Dios. Naatu bia wakeya wabatiruba”, wadi.

³ Naskata Raquelpa yuidi: “Da ewẽ uibati awẽ ade Bilhá ẽ bia inai. Awe iwe. Naatu ma wake akadu naa ewẽ wake keskara iixiwi. Naskax ẽ wakeyaxiwi”, Raquelpa wadi.

⁴ Naskata Raquelpa Jacob inadi aweta yudubis Bilhá aweta wake anu.

⁵ Naskata Bilhápa Jacob wake ma dadexuwa idi naskata kaĩxudi.

⁶ Naskata Raquelpa wake yuikĩ iskawadi: “Da wake awẽ ade Dan. Ẽ kiwĩyaitu Diospa kexesharakuia ea wake ina”, idi.

⁷ Naskatari Raquel awẽ uibati Bilhápa awiana wake wetsa Jacobweta adi.

⁸ Naskata Raquel iskadi: “Da wake awẽ ade Neftalí. Ewẽ chipiwe nu askawatana ẽ tsai winubada”, Raquel idi.

Jacobpa awẽ wakewu Zilpáweta adi

⁹ Líapa ana wake atirubaxakĩ awẽ uibati Zilpá Jacob inadi.

¹⁰ Naskata Zilpáweta Jacobpa wake adiwu.

¹¹ Naskake Lía iskadi: “Aichu na ẽ yuita keskakuiyaki. Naskake da wake awẽ ade Gad, iki”, Lía idi.

¹² Lía awẽ uibati Zilpáweta Jacobpa wake wetsa adi.

¹³ Naskata Lía “Aichu”, ita idibadi. “Awĩwuwawe idibai ea waaxikadi. Naskake da wake awẽ ade Aser, iki”, wadi.

Jacobpa Líaweta wake wetsa adiwu

¹⁴ Wetsatiã wai babaki Rubén kadi. Ma trigo ushĩadu narixu tuu rau wibi awẽ ade mandrágoras wichixu awa wexudi. Na wibiwu uĩkĩ Raquelpa Lía ñukadi: “Mewẽ wake mandrágoras bia wexua ea inawe”, Raquelpa wadi.

¹⁵ Líapa kebadi: “Ewẽ wede mia wiãta datiã awiana mandrágoras ewẽ wake mi wiãpai”, wadi. Raquelpa kebadi: “Mandrágoras ea mia inaitu Jacobwe da yabeta mi uxatiru”, wadi.

¹⁶ Ñatapake Jacob wai babakiduax uwaidu Lía aki dukuxu yuidi: “Da yabe ewe mi uxai ewẽ wakẽ awẽ mandrágorasuxũ mewẽ awĩ Raquelpa ea inayua”, Líapa Jacob wadi. Naa yabeta Jacob Líawe uxashidi.

¹⁷ Líapa kiwĩyaidu Epa Diospa dikadi. Wake dadedi. Cinco wake aka idi Jacobweta.

¹⁸ Naskata Líapa yuidi: “Da wake awẽ ade Isacar, awara shara. Epa Dios ea ina ewẽ yudubismai ewẽ wede inaitake”, wadi.

¹⁹ Líapa awiana wake ma dadea idi. Seis wake ma aka idi Jacobweta.

²⁰ Lía iskadi: “Epa Dios ea wake ina. Jacobpa ẽ uduax shinasharakui ẽ seis wake axuke. Epa Dios ea shara ina. Naskake awẽ ade Zabulón”, wadi.

²¹ Chipu xutukuwake adi Líapa wake wisti awẽ ade Dina.

²² Epa Dios Raquel ubisbadi kiwĩyaitu wake apaikĩ. Naskadu wake adi.

²³ Ma tuuyabexakĩ ma wake kaĩyax Raquel iskadi: “Ana ẽ rawĩyabanu Diospa ea axua”, idi.

²⁴ Naskaxu awẽ ade José, wadi. Naskaxu yuidi: “Awiana Diospa ea wake inapainu”, idi.

Jacobwe Labán parananapaudiwu

²⁵ Raquel ma José kaĩtadu Jacobpa Labán yuidi: “Na ẽ udiari ewẽ bai adu ẽ dasui

²⁶ Ewẽ wakewu ea inata ewẽ awĩ rawe ea inawe nawuxũ ẽ bia yuduxubis ewẽ bai ari ẽ katanu. Ma mi tapia ẽ bia yuduxubis”, Jacobpa Labán wadi.

²⁷ Naskaitu tsai pachiwaxu Labánpa yuidi: “Ẽ ikaduax kayuyabawe. Ewẽ ñuweuxũ ẽ tapia miuxũ Dios awane ea yupababa.

²⁸ Ea yuiwe awetii ẽ bia pei inatirumaiki na mia ñukaitii ẽ bia inanu”, Labánpa wadi.

²⁹ Jacobpa kebadi: “Ma mi tapia ẽ bia yuduxubis. Mewẽ yuinawu ẽ bia kexexubis.

³⁰ Ẽ uyuabadu awara ichapabaya mi iyupaudi. Datiã awara mi ichapaya. Euxũ Diospa bia sharawaa. Naskake datiã iwikui ẽ yudutiru ewẽ awĩ rawenu ewẽ wakeuxũ”, Jacobpa wadi.

³¹ “Awetii pei mi wipaime”, Labánpa wariawadi. Jacobpa kebadi: “Ẽ bia awa ñukaiba. Ẽ shinai keskara mi shinayaitu mewẽ oveja ẽ bia awiana kexexutiru.

³² Ovejawu adu ẽ kanuwe. Naduxu mewẽ yuinawu katuta paxkanu oveja tutuyawu raũyawu oveja keskara raũyawu tutuyawuri nawu atũ wakewu wisuwuri nawu ewẽ pei keskara iki.

³³ Naskata ma dasuxu mi uĩyuxiwi ewẽ shina kayakawikuike. Naskata ewẽ yuinawu uĩyuxu oveja uxu wichiyabaxu ‘Ea unebisba’, ea mia waaxiwi”, Jacobpa wadi.

³⁴ “Na mi shinai shara”, Labánpa wadi.

³⁵ Naa pedata Labánpa oveja keskara atũ wake tutuyawu raũyawu oveja keskara tutuyawu raũyawuri oveja raũyawu tutuyawuri oveja atũ wake wisuwu nawu awẽ wakewu atu inadi kexexunuwu.

³⁶ Naskata Labán chaikui kadi kai tres peda dukutiru adu. Naskayaidu Jacobpa yuinawu kexei netedi.

³⁷ Ovejawawe kede adu na chaiba yuinawawe ede ayabiswu adu Jacobpa iwiwu awẽ adewu álamo, almendro, castaño weruwaxu sewuakedi naa wichixu ovejawawe ede ayanuwu.

³⁸ Chipu na iwi raxkiawu na ede ayabiswu adu wadi yuinawawe uĩkĩ ayanuwu.

³⁹ Naduax ovejawu chutanakaxu wake anuwu turuyawu ata wisuwu raũyawu anuwu.

⁴⁰ Jacobpa naduxu paxkadi turuwuya ita wisuwu ita nawu Jacobpa awena widi. Naskax yuina ichapaya idi. Naduax Labánwe Jacob yuinawu paxkanadiwu.

⁴¹ Oveja xuakuiyawu ibiyaiwudu Jacobpa iwi raxkixu ratadi ede adu naduax kedeyawu kaĩnuwu.

⁴² Naskake ovejawu irabadawu Jacobpa iwi raxkixibea ede adu atu ikibadiba. Naskax Labánpa awẽ yuinawu irabadawu idi. Na xuawu Jacobna idi.

⁴³ Naskax Jacob awarawuya awẽ yudubiswuya awĩwuya dukuwedeya ichapayari camellowuri asnowuri nawuya Jacobna idi.