Génesis 3 - Yura porciones de la biblia

Dukuwene Dios ikũira wadiba

¹ Naatiiwi yuinawu Epa Diospa udiwadi. Rudu chaniki tapikuiya ipaudi. Runu awĩwu ñukadi: “Ikũme Diospa batu yuiya: ‘Iwiwu atũ wibiwu ma pitirubame’, batu waame”, runu wadi.

² Awĩwawe kebadi: “Watura iwi wetsa awẽ wibi nu pitiru.

³ Diospa duku yuita: ‘Iwiwu wada nexpakayadua iwi wisti dia awẽ wibi ma beetiruba piax ma datiru’, duku waita”, Evapa rudu wadi.

⁴ Runu awĩwu yuidi: “Ẽ bia paraiba. Mi dadakaba.

⁵ Diospa tapikuiya ma piax shara tapita ma chaka tapitiru. Dios keskarakui ma itiru”, runu wadi.

⁶ Evapa uĩya iwi awẽ wibi sharakui uĩdi. Naskaxu tapikuiya iixikĩ raixu pipaikuidi wibi wisti wita pidi. Chipu wede inadi. Naaturi pidi.

⁷ Naskatadaidu naa wibi pikata kushikui tapitadiwu. Na raweta uĩyawu atũ kaya ñewakui idiwu. Naskata higuerapa pei ekexdiwu sawexikakĩ.

⁸ Adánweta Evapa dikadiwu Epa Dios wai adu uwaitu ñatapake deweaidu. Udei wukadi ichudiwu iwiwu nama.

⁹ Epa Diospa Adán kedadi: “Adán mi wanime”, wadi.

¹⁰ Adánpa kebadi: “Ẽ bia dikai wai babaki mi uwaitu ẽ besei. Ñewax ẽ udea”, wadi.

¹¹ Epa Diospa Adán ñukadi: “Aweskawaxu mi tapiame mi ñewa. Iwi awẽ wibi ma piame ‘Piyabawe’, ẽ batu wawiake”.

¹² Adánpa kebadi: “Na awĩwu ewe rawebis inu mia inaita naatu ea wibi ina ẽ pia”, wadi.

¹³ Naskake Epa Diospa na awĩwu ñukadi: “Awa mi aweskawaame”, Epa Diospa Eva wadi. Awĩwawe kebadi: “Runu ea parayaitu ẽ wibi pia”, Evapa wadi.

¹⁴ Naskake Epa Diospa rudu yuidi: “Na mi akauxũ ẽ bia chakawai. Datiã mi bai adu mi xarapakedaka. Mi bai putu pipadaka”, wadi.

¹⁵ Epa Diospa rudu yuidi: “Awĩwuwe mi duikaspananapakedaka. Naskatari mewẽ kaiwuu uduax ichapanawãwu kaĩpakedakawu. Na awĩwawe awẽ kaiwuu uduaxri ichapanawãwu kaĩpakedakawu nawuwe duikaspananapakedakawu. Mewẽ bapuki bia peabadu awẽ tae chichukuki mi chachixiwi”, Epa Diospa rudu wadi.

¹⁶ Epa Diospa awĩwu yuidi: “Mi wake kaĩ mi pae beepakedaka. Mewẽ wede mi duipakedaka. Naatu bia yudupakedaka”, Diospa Eva wadi.

¹⁷ Naskata Epa Diospa dukuwede yuidi: “Ewẽ tsai mi dikataba mewẽ awĩni tsai mi dikana. Mi iwi awẽ wibi pia ‘Piyabawe’, ẽ bia wawiake. Miriwi ubiskuipakedaka. Miuxũ ẽ bai chakanawai. Mi ichapa yudupakedaka piixikĩ”, Diospa wadi.

¹⁸ “Nawawakisiwu tutux buxawuriwi mewẽ bae adu nawu wuaipadaka. Dii mera kawasakĩ mi weru tuu keskara wedaxu mi pipadaka.

¹⁹ Mewẽ yuduxu mi piti pipadaka. Naskabixakĩ mi bai udidi. Ma daaxriwi ana mi bai inupukui”, Epa Diospa Adán wadi.

²⁰ Adánpa awĩ adekĩ Eva, wadi: “Naa uduax yurawu kaĩpakedakawu”, wadi.

²¹ Adán awĩya Epa Dios yuina wichĩ atu saweti waxudi sawenuwu.

²² Epa Diospa yuidi: “Ma datiã wedewe awĩwe ma duku keskarawu. Shara tapita chaka tapiawu”, Dios idi. Naskata: “Na iwi awẽ ade na piax ipatiru awẽ wibi piyabanuwu. Naa wibi pikadax dapaxatiruwuba”, Epa Dios idi.

²³ Naskake Epa Diospa atu tsekadi Edén aduxu. Yudukĩ taewanu na bai aduax udidi adu.

²⁴ Ma atu putata Diospa ángelwu waĩ awẽ ade Edén adu nichidi wari ubiskiri. Epa Diospa espada xuisai keskara wai babaki wadi tsua adu kayabanu wibi shara tsuã piyabanu na piax dayabapakexanuwu.