Génesis 29 - Yura porciones de la biblia

Jacob Padán-aram bai adu dukudi

¹ Jacob wari ubiskiri kadi yura ikawu adu.

² Nari kakĩ uĩya wai babakidua tres oveja xukuwu uĩdi. Pozo chaibakixu ovejawawe tedekadi idiwu. Ovejawawe ede ayabiswu ruwewãne wepua idi.

³ Tres oveja ichawuadu oveja kexebiswu pozo wepukaxu ovejawu ayababiswu. Ovejawu ayabakata pozo wepupaudiwu.

⁴ Jacobpa oveja kexebiswu atu ñukadi: “Ma waniame”, atu wadi. Naskata: “Nu Harán adua”, na oveja kexebiswawe wadiwu.

⁵ Jacobpa awiana atu ñukadi: “Ma Labán tapiame Nahorpa awẽ wake”, atu wadi. Awiana oveja kexebiswu ñukadi: “Nu tapia”, wadiwu.

⁶ Awianari Jacobpa atu ñukadi: “Isinikibame”, oveja kexebiswu wadi. Naskata: “Shara. Isinikiba. Dua awẽ wake Raquel ui ovejawuya”, wadiwu.

⁷ Jacobpa atu yuidi: “Pedayua yabeyuaba ovejawu kede mera ma ikibapana. Aweskakĩ ma atu ede ayabata ma wasi pibaibame”, atu wadi.

⁸ Nawuwawe kebadiwu: “Nu atu badayui ma ovejawu ichawudu pozo weputa ede atu nu ayabai”, wadiwu.

⁹ Jacob atuwe tsaiyuwaidu Raquel udi apã awẽ ovejawuya. Naatu oveja kexebis ipaudi.

¹⁰ Naskaidu Jacobpa Raquel uwaitu uĩdi Labánpa awẽ wake. Labánpa awa pui idi. Naskata Jacobpa pozo awẽ weputi ruwewa wepedi Labánpa awẽ ovejawu ede ayabaxikĩ.

¹¹ Jacobpa Raquel tsu ata siaikuidi.

¹² Jacobpa Raquel yuidi: “Ẽ Rebecapa awẽ wake Labánpa awẽ pia”. Naa dikai Raquel ichudi apa yui kai.

¹³ Puĩ awẽ wake Jacob dikai Labánpa aki dukuta pishkuta tsu adi. Naskata awẽ pexe adu ewedi. Jacobpa awẽ kuka Labán awarawu yuidi.

¹⁴ Labánpa Jacob duiyana yuidi: “Mi ewẽ pia weyakakuiya”, wadi.

Jacobpa atu widi Lía yawi Raquel

¹⁵ Ma uxe wisti Jacob ikadu Labánpa yuidi: “Baitsi mia ea yuduxutiruba mi ewẽ pia. Awetii pei ẽ bia inatirume”, wadi.

¹⁶ Labán xutukuwake raweya idi. Na iyuatu awẽ ade Lía chipuke Raquel.

¹⁷ Iyuatu awẽ ade Lía awẽ weru uĩsharatiruba ipaudi. Chipuke Raquel sharakui idi.

¹⁸ Jacobpa Raquel mai duikĩ Labán yuidi: “Mewẽ wake chipuke Raqueluxũ ẽ bia siete wari yuduxui”, wadi.

¹⁹ Labánpa kebadi: “Ẽ bia wibanu dukuwede wetsa inataba. Ewẽ pexe adu iwe”, wadi.

²⁰ Naskaxu Jacobpa siete wari yududi Raqueluxũ. Siete wari uĩya awa idiba Raquel mai duikĩ.

²¹ Peda wetsa Jacobpa Labán yuidi: “Siete wari ma ẽ yudua. Ewẽ awĩ ea inawe ẽ awi wiananu”, wadi.

²² Naskata Labánpa yura chaiba ikawu atu ichawadi piti pii wenuwu.

²³ Ma yabeadu Labánpa Lía Jacob wibadi. Líawe uxadi.

²⁴ Naskata Lía uibatiya idi awẽ ade Zilpá da Labánpa inadi awara axunu.

²⁵ Ma pedadu Jacobpa Lía unadi awe uxashita. Labán ñukadi: “Aweskai mia iskawaame. Raquel wiixikĩ beweta ẽ yudubis. Aweskai mia paraitame”, Jacobpa wadi.

²⁶ Labánpa kebadi: “Duduxu iyua nu reke wedeya wababis. Chipuke nu wena wedeya wabatiruba”, wadi.

²⁷ “Na domingo wisti ayuwe naskaxu ewẽ wake wetsa ẽ bia inanu awiana siete wari mia yuduxuwaitu”, Labánpa wadi.

²⁸ Jacob naskadi. Domingo wisti ata Labánpa Raquel wibadi awĩ inu.

²⁹ Labánpa awẽ wake Raquel Bilhá inadi awẽ yudubis inu.

³⁰ Jacob Raquelwe wianadi duikuidi. Lía duiwikĩ askawapaudiba. Awiana siete wari Jacobpa Labán yuduxudi.

Líaweta Jacobpa awẽ wakewu

³¹ Jacobpa Lía duisharayabaitu Diospa uĩdi Líapa wake anu. Naskayaidu Raquelpa wake dadetiruba idi.

³² Líapa werunawake dadedi. Awẽ ade Rubén. Líapa yuidi: “Diospa ea uĩkĩ ẽ ichapaba shinachakaitu Jacobpa ea duisharayabaitu naskake ea ubisbakĩ ea wake ina. Naskake ea Jacobpa dui”.

³³ Naskata awiana Líapa wake wetsa adi awẽ ade Simeón. “Dios dikaxu ewẽ wene ea duisharayabaitu naskake Dios ea wake wetsa ina”, idi.

³⁴ Naskata awiana Líapa tres wake adi awẽ ade Leví: “Datiã ewẽ wene ea duikui ewetamai ma tres wake axu”, Lía idi.

³⁵ Líapa awiana wake wetsa adi awẽ ade Judá wadi naskata yuidi: “Aichu Dioski ẽ idibakui”, idi. Naskata Líapa ana wake adiba.