Génesis 28 - Yura porciones de la biblia

¹ Isaacpa Jacob kedaxu tsai shara yuikuita yuidi: “Ewẽ wakẽ da bai Canaán adua awĩwu wetsa wiyabawe.

² Bai awẽ ade Padán-aram adu katawe. Mewẽ chata Betuel ikadu naduax mewẽ kuka Labánpa awẽ wake wetsawe wianatawe.

³ Epa Dios bitsisipakui bia kexesharai. Mi uduax mewẽ kaiwuu uduax ichapanawã kaĩpakedakawu ichapa ipaxanuwu yurawu bai wetsa adu ikawu.

⁴ Epa Diospa bia sharawata mewẽ kaiwuu uduax ichapanawã kaĩpakedakawu na Abraham sharawadi keskawakĩ. Iskaratiã da bai batunaba chipu batuna inupukui na Abraham Diospa inadi keskawakĩ”, Isaacpa Jacob wadi.

⁵ Naskata Isaacpa awẽ wake Jacob bai awẽ ade Padán-aram adu nichidi. Naskata Jacob awẽ kuka Labánpa pexe ari kadi. Betuelpa apa Labán idi. Betuel arameo idi. Rebecapa awẽ pui Labán idi. Jacobwe Esaú atũ awa Rebeca idi.

⁶ Esaúpa tapidi Isaacpa Jacob yuisharake Padán-aram adu nichike. Naskatari tapidi awĩwu Canaán adua wiyabanu.

⁷ Apaweta awã Jacob yuiyawu keskai Padán-aram adu kadi.

⁸ Esaúpa tapidi apa Isaacpa adua awĩwu cananeawu duitiruba.

⁹ Esaú ma awĩyawiax Abrahampa awẽ wake Ismael awẽ pexe adu kadi awĩwu wetsa wipai. Nadua Ismaelpa awẽ wake wiãdi awẽ ade Mahalat. Mahalat awẽ udiwetsa Nebaiot.

Jacobpa Betel aduxu dabadi

¹⁰ Beerseba aduax Jacob Harán adu kadi.

¹¹ Ma yabeaidu wai nexpakaya uxadi. Ruwe wita aki tekesabedi. Nadu uxadi.

¹² Dabapa uĩdi bipiti dai ari dukua idi. Naa bipitini Epa Dios awẽ ángelwu wutukata idainiwuwawuwaĩdiwu.

¹³ Bipiti amanauri Diaiwu Dios dia idi. Naduxu yuidi: “Mewẽ xuta Abraham mewẽ epa Isaac ẽ atũ Dios. Da bai mi uxadu ẽ bia inaxiwi na mewẽ kaiwuu uduax ichapanawã kaĩpakedakawuri.

¹⁴ Mewẽ kaiwuu uduax ichapanawã kaĩpakedakawu ichapakui ipadakawu na bishpu keskara tsuã tanatiruba. Nawu paxkanakadi na wari ubis ari ita wari kabiskiri na baitiixu adu iixikadi. Miuxũ yura baitiixu ikawu ẽ atu sharawaaxiwi mewẽ kaiwuunuax ichapanawã kaĩpakedakawuxuriwi.

¹⁵ Ẽ bewe kai. Narixu ẽ bia kexexiwi. Ẽ bia putaxiwiba. Ẽ bia yuiyai bia axuxiwi. Ana da bai adu awiana ẽ bia ewexiwi”, Diospa wadi.

¹⁶ Jacob buita shinadi: “Ikũkui Dios dudu ẽ tapitaba”, Jacob idi.

¹⁷ Besekuiyana shinadi: “Dudu sharakui Dios awẽ pexe adu dai awẽ weputi”, Jacob idi.

¹⁸ Ma uxashita Jacob wenamari widinakawãdi. Na ruweki tekesebeshida widiniwuwata aki xidi nachidi Dios inaxikĩ.

¹⁹ Nadu pexe ichapa awẽ ade Luz ipaudi idi. Jacobpa nadu adekĩ Betel, wadi.

²⁰ Naskata Jacobpa yuikuidi: “Epa Dios, ẽ kai ari ewe kata ea kexei ea piti inata saweti inayaitu

²¹ aweskataba ewẽ epa pexe adu dasuaitu na ewẽ Dios iki”, idi.

²² “Da ruwe chaidipa ẽ diba uĩpakedakawu Dios awẽ pexe. Ea mia awara shara inake diez ẽ bia inapakedaka”, wadi.