Génesis 24 - Yura porciones de la biblia

Isaacwe Rebeca

¹ Abraham ma adiwushtadu Epa Diospa awara sharawu inadi.

² Na aweta yudukĩ taewainiwuwada kedata yuidi: “Na nu weyabis keskai mewẽ biwi ewẽ kishi nunamari wawe.

³ Diaiwu Diospa dai udiwata bai udiwadi nauxũ na mia axuikai ea yuikuiwe: ‘Ẽ bia axuikai’, ea wawe. Na mia yuiyai atawe. Da bai Canaán ẽ ikadua ewẽ wake Isaac awĩwu ẽ wibapaiba.

⁴ Ewẽ kaiwuu meradua awĩwu wetsa ewẽ wake Isaac iwixutawe”, Abrahampa wadi.

⁵ Naskaxu Abrahamweta yudubistu yuidi: “Awĩwu ewe uyabaitu ẽ aweskaikaime. Ẽ iyutirume mewẽ wakẽ wedaikanu awĩ”, wadi.

⁶ Abrahampa kebadi: “Aweskakĩ ari ewẽ wake mi iyutiruba wadi.

⁷ Ewẽ epã pexe aduxu Epa Dios dai mera ikatu ea yuidi dudu ẽ unu. Da bai ewẽ kaiwuu ichapanawã kaĩpakedakawu inanupukui. Naskatari mi kayuabadu awẽ ángel biki rewu nichi ewẽ wake awẽ awĩ mi ewexunu.

⁸ Awĩwu bewe uyabaitu shinachakayabawe. Naskaweke ari ewẽ wake mia iyutiruba”, Abrahampa wadi.

⁹ Abrahamweta yudubistu awẽ biwi Abrahampa kishi nunamari wadi. “Na mia ea yuiya ẽ akikai”, wadi.

¹⁰ Naskata awẽ yudubistu na awẽ awara sharawu wita diez camellowuri nawuya kadi pexe ichapa Nahor bai Aram Naharayin adu.

¹¹ Ma ñatapakeaidu pexe ichapa Nahor adu dukudi. Awẽ camellowu atu tedebadi ede wibiswu aduxu. Naatiã wari awĩwuwawe bai meraduax ede tsekea wibiswuadu.

¹² Naskata yudubistu kiwĩdi: “Epa Dios ewẽ diaiwu Abraham mi awẽ Dios ẽ bia ñukai ea axusharawe ewẽ diaiwu Abraham mi sharawaa keskawakĩ eariwi naskawawe ẽri sharanu.

¹³ Ẽ dudu awĩwuwawe ede witiruwuadu ẽ netei.

¹⁴ Ea uĩbawe na daetawa ẽ ede ñukayaitu ea ayabanu: ‘Mewẽ bapu kiti keskara wutubata ea ede inawe’. Ẽ waitu ea kebanu: ‘Ayawe’, ea wata, ‘Mewẽ camellowuri ẽ ede inanu’, ea wanu. Naskaxu ẽ tapinu na awĩwu mi Isaac kayawaxua. Naskaxu ẽ tapinu ewẽ diaiwu mi sharawabis”, yudubistu wadi.

¹⁵ Kiwĩkĩ adaitiabadu Rebeca dukudi. Awẽ bapu kiti keskara iaxu wedi. Rebeca Betuel wake idi. Milcá Nahor atũ wawa idi. Nahor Abrahampa awẽ udiwetsa idi.

¹⁶ Rebeca awĩwu sharakui. Dukuwedewe ibisba idi. Awẽ bapu kiti keskaraki ede wuspiwata kaidu

¹⁷ Abrahamweta yudubistu Rebeca adu kushi kata ñukadi: “Ede ichapabashta ea inawe mewẽ bapu kiti keskaradua”, wadi.

¹⁸ Naskata: “Ayawe ewẽ diaiwũ”, wata awẽ bapu kiti keskara tsubaxu Rebecapa ayabadi.

¹⁹ Ma ayadu Rebecapa yuidi: “Ẽ mewẽ camellowu ede wixunu camellowawe ayanuwu na apaiyai keskawanuwu”, wadi.

²⁰ Kushikui badedi awẽ bapu kiti keskara na camellowawe ayatiruwu adu. Ana ichuxu ede wita witadi camellowu ayabaxikĩ.

²¹ Naskake na Abrahamweta yudubistu uĩdi peesixuba tapipaikĩ Diospa axuamaiki awĩwu wichixukĩ Isaacna.

²² Ma camellowawe ayawuadu Abrahamweta yudubistu anillo wita oropa awẽ anillo Rebeca inata awẽ rechukuki netabadi. Naskatari bedexebeti rawe inadi. Naskata ana Rebeca ñukadi:

²³ “Ea yuiwe tsua mewẽ epamaiki. Ewe rawebiswuwe mewẽ pexe adu nu uxatirume”, Abrahamweta yudubistu wadi.

²⁴ Rebecapa kebadi: “Betuelpa ẽ awẽ wake Milcáweta Nahor awẽ wake Betuel.

²⁵ Nuku pexe adu axaka nadu ma uxatiru. Nadu piti ichapa camellowuna”, wadi.

²⁶ Naskaxu na yudubistu baikiri wepepakekawãdi. Epa Dioski idibadi.

²⁷ Dios kiwĩkĩ iskawadi: “Aichu Diaiwu Dios mi wasĩ sharakui. Mi Abrahampa awẽ Dios mi ea uĩbada ẽ bia ikũira watiru. Mi atu sharawaaxiwi. Abrahampa awẽ kaiwuu atũ pexe adu ẽ dukua”, kiwĩdi.

²⁸ Na dikata Rebeca ichudi awẽ pexe adu awa yuikai na dika.

²⁹ Labánpa chiku Rebeca idi. Naa ichudi Abrahamweta yudubis wichikai camellowawe ayabiswu adua.

³⁰ Labánpa uĩkĩ awẽ oro bedexebeti netaxu weaitu na dukuwene yuiya atu yuiyaitu dikai naskake ichudi dukuwede wedai kai. Wichidi awẽ camellowu adua ede bai kidi mera chaibadua.

³¹ Labánpa yuidi: “Diri uwe. Nuku Dios ikũira wabistu aweskai ma xawakawi netepaime. Ewẽ pexe ma ẽ itipiniwaa camellowunari ma itipiniwaa”, Labánpa wadi.

³² Abrahampa yudubistu pexe mera ikikaĩdi. Nadu Labánpa camellowawe peweawu wutubadi atu pibaxikĩ. Atu ede waxudi awẽ uibatiwawe atũ tae chukanuwu.

³³ Ma piti inawudu yudubistu atu yuidi: “Ẽ piyuiba batu yuixuba na ẽ yuipaiyai”. Labánpa kebadi: “Duku yuiwe awamaiki nu bia dikanu”, idi.

³⁴ “Ẽ Abrahamweta yudubis.

³⁵ Epa Dios ewẽ diaiwu awarawu inadi ovejawu vacawu camellowu asnowuri. Nakatari oro inata platari uibati dukuwede uibati awĩwuri inadi.

³⁶ Sara ñushawushtaxu wake wisti adi. Naa wake awẽ awarawu naatiiwi inaita.

³⁷ Ewẽ diaiwũ ea yuiya: ‘Ea yuikuiwe. Ewẽ wake Canaán adua awĩwu ẽ wibapaiba’, ewẽ diaiwũ ea waita Canaán adua awĩwu awẽ wake wibakaspakĩ.

³⁸ ‘Askataba ewẽ epã bai adua awĩwu wetsa ewẽ wake wedaxutawe’, ewẽ diaiwũ ea waita”, Abrahamweta yudubistu Labán wadi.

³⁹ “Naskaxu ewẽ diaiwu Abraham ẽ yuita: ‘Ewẽ awĩwu ukaspaidu ẽ aweskaikaime’, ẽ waita.

⁴⁰ Ewẽ diaiwawe ea kebaita: ‘Ẽ Dios dikakuibis. Ewẽ Epa Diospa awẽ ángel biki nichi bia axusharanu aweskataba mi kasharatanu. Ewẽ epã awẽ yurawu meradua ewẽ wake awĩ mi ewexunu.

⁴¹ Ipaixuba ewẽ kaiwuwawe awĩwu bia inayabaiwawe naa ẽ bia yuiya keskara tsekeyabaitu naa shinabakiwe’ ”, yudubistu wadi.

⁴² Naskata: “Datiã bai meraduax ede cheteadu dukua naduxu ewẽ diaiwu Abrahampa awẽ Dios ẽ kiwĩa: ‘Ea uĩbawe ẽ kakuikanu.

⁴³ Datiã ẽ dudu ede cheteadu xubaya ede wiiyuwaitu ẽ ñukaitu awẽ bapu kiti keskaradua ede ea inanu.

⁴⁴ Naa awĩwawe ea kebanu: “Ede ayawe. Mewẽ camellowuri ẽ inanu”, na awĩwu mi kañawaa ewẽ diaiwũ awẽ wake awĩ inu’, ẽ waa”.

⁴⁵ “Ẽ kiwĩkĩ adaitiabadu Rebeca ua. Awẽ bapu kiti keskara iaxu wea. Awẽ bapu kiti ene wuspiwaa: ‘Ede ea ayabawe’, ẽ waa.

⁴⁶ Naskata bapu kiti keskara ene wuspiwata ea: ‘Ayawe. Mewẽ camellowuri ẽ atu inanu’. Ma ea ayabadu”, yudubistu wadi.

⁴⁷ “Naskata: ‘Mi tsua wakeme’, ẽ waitu ea keba. ‘Betuelpa awẽ wake ẽ. Betuel Milcáweta Nahor atũ wake’, ea waa. Naskata anillo awẽ rechuku xui adu ẽ netabada. Naskatari bedexebeti rawe orona ẽ ina.

⁴⁸ Ẽ ratukunu bai chachita wepepakekawada ewẽ diaiwũ awẽ Dios aki idibakĩ waĩ kayakawikui ea eweke. Ewẽ diaiwawe awẽ udiwetsa awẽ wake ẽ wedaxuiyua.

⁴⁹ Ea yuikawe. Ewẽ diaiwũ awẽ shina ma axutirume. Ma axutirubaraka. Na ẽ tapipaiyai ea yuikawe ẽri tapinu”, Abrahamwe yudubistu Labán wadi.

⁵⁰ Labánweta Betuelpa kebadiwu: “Diaiwu Diospa awara sharawatiru. Nu bewe askawatanatiruba.

⁵¹ Da Rebeca mewẽ diaiwawe wake iyuxutawe awe wiananu. Naskara Epa Dios awẽ shina”, wadiwu.

⁵² Naa dikai Abrahamwe yudubistu Diospa uĩyaidu baikiri wepepakekawãdi.

⁵³ Naskata awara sharawu oro plata inata sawetiri Rebeca inadi. Awẽ uchi inata awẽ awariwi atu inadi.

⁵⁴ Ma naskadu Abrahamwe yudubistu awe rawebiswu pikata ayakata nadu uxadiwu. Ma uxashita ma pedadu Abrahamwe yudubistu atu yuidi: “Ewẽ diaiwawe pexe adu ẽ wunukawe”, atu wadi.

⁵⁵ Rebeca awẽ uchiweta awã kebadiwu: “Da awĩwu kayutiruba. Ma diez peda ikadu bewe katiru”, awẽ uchiweta awã wadiwu.

⁵⁶ Naa yudubistu kebadi: “Ea askawayamakawe. Diaiwu Dios ma ea axushara. Ewẽ diaiwũ awẽ pexe adu ẽ dasupai”.

⁵⁷ Kedaxu nu ñukadu awe ikimaiki Rebeca idiwu:

⁵⁸ “Da dukuwedewe mi kapaime”, wadiwu. Rebecapa atu kebadi: “Da dukuwedewe ẽ kapai”, Rebeca idi.

⁵⁹ Naskata nawawe nichidiwu atu udiwetsa Rebeca. Naskadu Abrahampa uibatiwe awe raweawu wuwaiwudu Rebeca awẽ uibati awĩwuri awe wudiwu.

⁶⁰ Rebeca kayuabadu awẽ kaiwuwawe shinayana tsai sharapa awẽ kaiwuwawe yuidiwu: “Mewẽ kaiwuunuax ichapanawã kaĩpakedakawu. Nawuwawe atu rare akata uibati wapadakawu”, wadiwu.

⁶¹ Naskata Rebeca itipinidi. Awẽ yuduxubiswuwawe camellowu mamakaya wadiwu. Abrahamwe yudubiswe awe rawebiswu Rebecawe wudiwu.

⁶² Tsua ikabadu Isaac ipaudi bai adu awẽ ade Négueb. Naskata ñatapake bai meraduax ede tsekeaidu dukudi awẽ ade Na Epa Dios Ipadakatu Naatiiwi Uĩ wapaudiwu.

⁶³ Ñatapake uĩ kaxu camellowu akiri weaiwawe Isaacpa wichidi.

⁶⁴ Naskata Rebecapa Isaac uĩta awẽ camello netewata mamakayaduax wutupakekawãdi.

⁶⁵ Rebecapa Abrahamweta yudubis ñukadi: “Da dukuwede tsuame dukuki dukuiyui”, Rebecapa wadi. Abrahamwe yudubistu yuidi: “Isaac ewẽ diaiwu”, wadi. Abrahamwe yudubistu waitu dikai Rebeca awẽ wemana wepudi.

⁶⁶ Abrahamweta yudubistu Isaac yuidi na akitawu.

⁶⁷ Naskata Isaacpa Rebeca awẽ yuina wichi tapas mera iyudi. Naduax wianadiwu. Naa yuina wichi tapas Sarana idi. Isaacpa Rebeca duikuidi. Naskax Rebecapa Isaac awa daita shinabakibadi.