Génesis 21 - Yura porciones de la biblia

Isaac kaĩdi

¹ Na Diospa Sara yuidi keskadi.

² Naskaxu Saraweta Abrahampa adiwukaxu wake adiwu. Na Epa Diospa yuidi keskadi. Werunawake adiwu.

³ Abrahamweta Sara atũ wake adekĩ Isaac wadiwu.

⁴ Ma ocho peda ikadu awẽ wake awẽ wushki wichi xatedi na Diospa yuidi keskawadi.

⁵ Ma Abraham cien wari aki ikadu Isaac kaĩdi.

⁶ Sarapa shinadi: “Ea Diospa witsabada. Naatiiwixu tapikadax ewe witsaxikadi ẽ wake ake.

⁷ Tsuã shinapaudiba Abraham wake ẽ axunupukui. Naskaweke ma ẽ wake axua adiwuwiake”, Sara idi.

Abrahampa awẽ pexe aduxu Agarya awẽ wake Ismael atu putadi

⁸ Ma Isaac yusiyaitu uĩkĩ awa xuba xatebadu naskata Abrahampa fiesta wadi.

⁹ Sarapa uĩdi Agar Egipto bai adua idi awẽ wake Abrahamweta aka awẽ ade Ismael Isaacki kaxepaiyaitu.

¹⁰ Naskata Sarapa Abraham yui kai kadi: “Na uibati awẽ wakewe katanu. Aweskakĩ ewẽ wake Isaac awẽ awara awe paxkanatiruba”, Sarapa Abraham wadi.

¹¹ Abrahampa askara duidiba. Sarapa askawaitu dikakĩ Ismael awẽ Wakemaiki

¹² Naskata Epa Diospa Abraham yuidi: “Shinachakayabawe mewẽ wakeuxũ naskatari Agaruxũ. Na Sarapa bia yuiyai keskawe. Isaac uduax awẽ kaiwuunuax ichapanawã kaĩpakedakawu ichapa inupukukadi.

¹³ Ismael uduax awẽ kaiwuunuaxri ichapanawã kaĩpakedakawu ichapa inupukukadi. Ẽ atu axupakedaka mewẽ wakẽmaiki”, Epa Diospa wadi.

¹⁴ Peda wetsa wenamari Abrahampa piti inata ede inadi. Naa pewexu wudiwu. Agar nawuya kadi tsua ikabadu awẽ ade Beerseba adu. Kawiakĩ tapidiba.

¹⁵ Ma ede keyuadu iwi kawashara chuu nama awẽ wake nichiwaĩdi.

¹⁶ Naskata uri tsaũi kai awa kadi. Awẽ wake daitu uĩpaidiba. Dabakaspadi. Uri awa tsauwadu awẽ wake Ismael siaidi.

¹⁷ Epa Dios dai arixu dikadi Ismael siaikaitu. Naskata Epa Dios awẽ ángelpa kedadi: “Agar mi aweskaime. Beseyabawe. Mewẽ wake siaikaitu Diospa ma dika.

¹⁸ Widinakawata mewẽ wake metsuwe. Awẽ kaiwuunuax ichapanawã kaĩpakedakawu ẽ ichapa axunupukui”, ángelpa wadi.

¹⁹ Naskata Epa Dios Agar ede inadi. Bai meradua tsekea. Naskata aki ede wibis wuspiwata awẽ wake ede ayabadi.

²⁰ Naa wake Epa Diospa axuwaidu yusita tsua ikabadu ipaudi. Naskata piãkĩ tapikuiya idi.

²¹ Tsua ikabadu awẽ ade Parán adu ipaudi chipu Egipto adu ika awĩwu awã wibadi.

Abraham Abimélecweta shinadiwu

²² Abimélecweta soldado atũ diaiwu Ficol Abraham uĩ wukadi wudiwu. Abimélecpa yuidi: “Epa Dios bia axuwaitu ma ẽ uĩya.

²³ Epa Diosuxũ datiã ea yuikuiwe ewẽ wakewuya ewẽ kaiwuu uduax ichapanawã kaĩpakedakawu duku mia chakawaiba ẽ bia apaudi keskawakĩ. Naskatari dudua yurawu atu mi naskawapadaka dudu ikawu”, Abimélecpa Abraham wadi.

²⁴ “Na mia yuiyai ẽ naskawaidaka”, Abrahampa wadi.

²⁵ Abrahampa Abimélec askawadi awẽ uibatiwawe bai pukixu ede wichia wiãyabeawuadu.

²⁶ Abimélecpa kebadi: “Ẽ tapibisba na mia yuiyai. Raba ẽ dikai. Ẽ tapiaba. Tsua askaitame”, wadi.

²⁷ Naskata Abrahampa Abimélec oveja wakewu inata vacawuri inadi. Naa pedata naa raweta shinadiwu.

²⁸ Naskata Abrahampa awẽ yuina kede meradua siete ovejawu paxkadi.

²⁹ Naskake Abimélecpa Abraham yuidi: “Aweskakĩ siete oveja wakewu awĩwu mi paxkame”, wadi.

³⁰ Naskawaitu Abrahampa kebadi: “Naa siete oveja awĩwu ẽ bia inai mi tapinu ẽ bai pewexu ede ẽ wichidi”, Abrahampa Abimélec wadi.

³¹ Naskake nadu awẽ ade Beerseba idi. Naduxu na raweta shinadiwu.

³² Ma shinakuikata Beerseba aduax Abimélecwe Ficol dasudiwu filisteowawe atũ bai adu.

³³ Beerseba aduxu Abrahampa iwi awẽ ade tamarisco wadadi. Naskata naduxu Epa Diospa ipadaka kiwĩdi.

³⁴ Wari ichapa filisteowawe atũ bai adu Abraham ipaudi.