Génesis 20 - Yura porciones de la biblia

Abrahamwe Abimélec

¹ Abraham na ibis adua bai Négueb adu kadi. Cadésweta Surpa dakiwaawu Guerar nadu Abraham idi.

² Abrahampa awĩ Sara: “Ewẽ pui”, wadi. Naskata Guerar adua diaiwũ awẽ ade Abimélecpa Sara kedabadi wipaikĩ.

³ Naa yabeta Epa Diospa Abimélec awẽ dabapa yuidi: “Da awĩwu wedeya mi wiax mi dai”, Epa Diospa wadi.

⁴ Abimélec Sarawe awẽ iyua idiba. Abimélecpa kebadi: “Ewẽ Diospa, awa chakawaaba mi retetirume.

⁵ Abrahampa ea yuita: ‘Ewẽ pui’, ea waita. Sarapari: ‘Ewẽ uchi’, ea waita. Ẽ aweskawaaba. Ẽ chakawaaba”, Abimélecpa wadi.

⁶ Naskaitu Epa Diospa awẽ dabapa kebadi: “Ma ẽ tapia mi awa chakawaba Naskake ẽ bia chakawababa mi iki chakayabanu.

⁷ Iskaratiã awẽ awĩ inawe naatu ewẽ tsai yuibis. Naskata naatu bia kiwĩxui mi wena dayuyabanu. Naskatari awĩ mi inayabaitu mi dai mewẽ kaiwuuri”, Epa Diospa Abimélec wadi.

⁸ Ma pedadu widinakawata awẽ uibatiwu kedaxu atu yuidi. Na dabawaa atu yuiyaitu dikakata besekuidiwu.

⁹ Naskata Abimélecpa Abraham kedaxu yuidi: “Ẽ bia aweskawake mia iskawaame. Ea mia paraita. Ewẽ yurawu mia paranaita. Askara sharaba.

¹⁰ Naskaxikĩ awa mi shinaitame”, Abimélecpa Abraham ñukadi.

¹¹ Abrahampa kebadi: “Duduxu tsuã Dios ikũira waaba raixu ẽ shinaita ewẽ awĩuxũri ea retetiruwu raixu.

¹² Ikũ ewẽ pui ewẽ epa aka ewẽ ewa akaba. Naskake ẽ nawe wianadi.

¹³ Ewẽ epa pexe aduxu Epa Dios ea nichiadu ewẽ awĩ ẽ yuidi: ‘Wanira dukuxu “Ewẽ pui”, mia watiru’, ẽ wadi”, Abrahampa Abimélec wadi.

¹⁴ Naskata Abimélecpa awĩ Sara Abraham inadi. Naskatari oveja inata vacawuri inadi. Awẽ uibatiwu dukuwedewu awĩwuri inadi.

¹⁵ Abimélecpa yuidi: “Na mi kañawai adu ewẽ bai adu mi itiru”, wadi.

¹⁶ Abimélecpa Sara yuidi: “Mewẽ uchi pei ichapakui ẽ inai. Pei ichapa uĩkakĩ mi aweskakeba bia tsuã yuikĩ chakawanupukuiba”, wadi.

¹⁷ Naskata Abrahampa atu Dios kiwĩxudi. Epa Diospa Abimélec kayawadi. Awẽ awĩriwi awẽ uibati awĩwuwaweri wake anuwu.

¹⁸ Naskake Sarauxũ Epa Diospa atu wakeya wabatiruba idi Abimélecpa pexe aduxu.