Génesis 2 - Yura porciones de la biblia

¹ Naskadu Diospa bai yawi dai naatiiwi awarawu udiwakĩ adaitidi.

² Seis peda yuduta ma peda siete ikadu Epa Diospa tededi.

³ Naa pedata yurawawe tedekata idibapakexanuwu. Awarawu udiwakĩ taewayabea naa pedatamai keyuxu.

⁴ Ikũkui Epa Dios udiwadi dai yawi bai. Naskadu Epa Diospa bai yawi dai udiwakĩ adaitidi.

Dukuwede Adán bae Edén adu idi

⁵ Dai yawi bai udiwaitadu adu diiwu wasiwu exeyawu idiba. Epa Diospa adu ui ibayuabadu. Adu dukuwede idiba yudupana.

⁶ Naskawia bai meraduax ede tsekeiniwuwadi na baitiixu bechananu.

⁷ Epa Diospa bai yura wata dukuwede udiwadi. Naskawata awẽ rechukuki xuũ adi. Dukuwede xakaita widinakawãdi.

⁸ Na wari uwaikiri bai Edén adu nadu Diaiwu Diospa awẽ wadawu idi. Naskata na wai adu Diospa da dukuwede udiwaa nadu ibadi.

⁹ Naduxu Diaiwu Diospa dii wetsa keskarawu wuaibadi na iwiwu sharakuiwu idi. Awẽ wibiwu pitirupinishara naa wai babaki nexpakaya iwi rawe diawu idi. Wibi wetsa piax nu ipatiru. Wetsauxũ chaka tapita shara tapitiru idi.

¹⁰ Naa bai Edén aduax ede tsekepaudi. Ene bai bechanawapaudi naa ede axka awẽ tuaika cuatro idi.

¹¹ Axka ewapa awẽ ade Pisón. Naa bai Havilátiixu chiti chiti ika. Havilá adu nadu oro idi.

¹² Naa bai adu oro sharakui idi. Naduriwi iwi awẽ ede ini sharakui. Naduri ruwe ónice.

¹³ Awẽ axka wetsa Guihón. Naũ bai Cus ari kaa Custiixu chiti chiti ika.

¹⁴ Axka wetsa Tigris. Na bai Asiria wari uwaikiri idi. Wetsa axka awẽ ade Éufrates idi.

¹⁵ Epa Diospa awẽ wai Edén nadu dukuwede ibadi naduxu yuduta kexenu.

¹⁶ Naskata Diospa dukuwede yuidi: “Da wai adua iwiwu atũ wibiwu mi pitiru.

¹⁷ Diiwu mera dia iwi awẽ wibi ma pitiruba. Nauxũ chaka tapita shara mi tapitiru. Awẽ wibi piyabawe. Piax mi datiruki”, Epa Diospa Adán wadi.

¹⁸ Epa Dios iskadi: “Dukuwede ares itiruba. Ẽ watura wetsa udiwanu aweta yudubis inu. Na aweta yudubis shara iki”, idi.

¹⁹ Yuina wetsa keskarawu peiya wetsa keskarawu udiwaawu naawu Epa Diospa bai udiwaxu dukuwedeki wedi. “Atu adepakenu”, ixu nawu aki ewedi. Naskadu dukuwene yuina wetsa keskarawu peiyawu naawu wisti rasi awara ade adea naa awẽ ade ipaxanu.

²⁰ Naskaxu dukuwene yuina idawanabetiruwu peiyawu dii mera yuinawu atu adedi naatiiwi. Naskaweke yuinawu meradua tsua wichidiba Adánwe rawenu. Naskawata dukuwene awẽ shina meraxu shinadi: “Eweta yudubis ẽ wichiyuaba”, idi.

²¹ Naskake Epa Diospa dukuwede uxabakuixu awẽ pishi wisti tsekaxu awiana na ika keskara wadi.

²² Naskata naa pishi xaũ Epa Diospa awĩwu udiwadi. Naa awĩwu dukuwedeki ewedi.

²³ Naskaidu awĩwu uĩta dukuwede ares wisti iskadi: “Da ewẽ dabikui ewẽ pishiri. Naskake ẽ adei awĩwu, ẽ wai dukuwede uduamai ewẽ pishi wita Epa Diospa udiwaa”, Adán idi.

²⁴ Naskadike na nu ibis keskara iskapakedaka. Dukuwede awĩwuwe wianaxikĩ apaduax awaduaxri paxkatiru. Awĩwe wianakadax na rawe yura wisti keskara itiruwu.

²⁵ Na dukuwede Diospa udiwadi dukuwene awẽ awĩri chituria ipaudiwu. Naskawikadax rawĩpaipaudiwuba.