Génesis 18 - Yura porciones de la biblia

Epa Diospa Abraham uĩ kai kadi

¹ Epa Dios Abrahamki dukudi iwi awẽ ade Mamré adu awẽ yuina wichi tapas mera kaĩti adu tsauwadu mananawari wari paeyaidu.

² Texuinakawa tres dukuwede atu wichidi. Atu wichita kushikui atuki kata baikiri wepepakekawãdi.

³ Naskata Abrampa yuidi: “Ewẽ diaiwũ da mewẽ uibati mi axutirumaiki ẽ bia kexunawai. Ea winuwuayamakawe.

⁴ Ẽ atu yuinu ede wenuwu matu tae ma chukanu. Iwi dia namaxu tedeyukawe.

⁵ Ẽ batu piti wixunu ma xukenayabanu naya wutaxikakĩ. Da matu uibati ikadu ma kawadiki”, Abrahampa atu wadi. Naskata: “Aichu duku askawaxuwe”, tres dukuwene Abraham wadiwu.

⁶ Yuina wichi tapas adu Sara ikadu Abraham kushikui kata Sara yuidi: “Kushikui veinte kilos harina awetiira wita pan wawe”, Sara wadi.

⁷ Abraham kushikui ichuta vacapa wake xuakuiya wita awẽ uibati inadi kushikui pichanu.

⁸ Vaca xuba awẽ ede leche vacapa wake dabi atu inadi. Iwi namaxu piyaiwudu Abraham nadu atuwe idi.

⁹ Ma pikĩ adaitikata Abraham ñukadiwu: “Waki mewẽ awĩ Sarame”, wadiwu. Abraham atu kebadi: “Udu yuina wichi tapas adu”, Abraham atu wadi.

¹⁰ Dukuwede wetsã Abraham yuidi: “Ma wari wisti ikadu ẽ bia uĩyuxiwi mewẽ awĩ Sarapa ma wake akadu”, dukuwene wadi. Yuina wichi tapas kaĩti aduxu atu kachiuxuri Sarapa dikadi.

¹¹ Abraham adiwu idi: Sara ma ñushawua. Sara ana ibitiru idiba.

¹² Na dikai Sara witsa tedetiruba idi: “Naskara shara. Naskaweke Sara ewẽ wede adiwu ẽri ñushawu”, ikax Sarapa shinadi.

¹³ Diospa Abraham yuidi: “Aweskai Sara witsaime. Ikũira waibame: ‘Ẽ ñushawu ẽ wake atiruba’, ikime.

¹⁴ Na tsuã atiruba Epa Diospa atirubame. Wari wetsã ẽ uwaidu Sara ma wake akadu ẽ uuxiwi”, wadi.

¹⁵ Naa dikai Sara besedi. Naskata wumapaidi: “Ẽ witsaba”, idi. Naskayaitu Diospa kebadi: “Ma ẽ tapia mi witsa”, Diospa Sara wadi.

Abrampa shinachakakĩ Diaiwu Dios ñukadi Sodoma adu ikawu

¹⁶ Naskata tres dukuwede widiniwuwakata Sodoma ari wudiwu. Abraham atuwe kadi atubaki netei kai.

¹⁷ Naskata Epa Diospa shinadi: “Abraham ẽ yuinu na ẽ akai naaturi tapinu.

¹⁸ Abraham uduax awẽ kaiwuunuax ichapanawã kaĩpakedakawu bitsisipa ipadakawu. Naskatari na baitiixu ikawu nauxũ ẽ atu sharawanupukui.

¹⁹ Ẽ Abraham kañawadi awẽ wakewu awẽ kaiwuunuax ichapanawã kaĩpakedakawawe ea ikũira wakata kayakawikui shinapakedakawu. Ẽ Abraham yuidi keskaiwawe ẽ atu axutiru”, naskaxu Epa Diospa anupukui na yuiyai.

²⁰ Epa Diospa Abraham yuidi: “Sodoma ikawu Gomorra ikawuri yura chakakuiwu ana askara ẽ tedetiruba.

²¹ Naskaxu ẽ wutuxu ẽ atu uĩkai chakakuiwumaiki ea na yuitawu. Ikũmaiki tapixikĩ kaxu ẽ uĩkai”, wadi.

²² Dukuwede rawe Sodoma wuwaiwudu Abraham Dioswe netedi.

²³ Aki chaiba kata Abrahampa Dios ñukadi: “Yura sharawuya reteta yura chakawuya mi atu reteime.

²⁴ Ipaixuba cincuenta yura sharawu Sodoma ikawu nawuya yura chakawu mi atu adaitime.

²⁵ Yura sharawu reteta yura chakawuya atu retea a sharaba. Atuwe chakabiswu keskara itiru. Da bai adua yurawawe mi atũ Dios bitsisipakui”, Abrahampa Epa Dios wadi.

²⁶ Naskata Diospa kebadi: “Cincuenta yura sharawu Sodoma ikawu atu wichixu atuuxũ yura chakawu ẽ adaititiruba”, Diospa Abraham kebadi.

²⁷ Abrahampa awiana Epa Dios yuidi: “Ẽ awayabawixu mi Diospa bitsisipa besetaba ẽ bia yui.

²⁸ Ipaixuba cincuenta yura sharawu wichiyabawixu cuarenta y cinco yura sharawu wichixu mi atu adaitime”, Abrahampa wadi. Diospa kebadi: “Cuarenta y cinco yura sharawu ẽ wichixu ẽ atu adaitiba”, wadi.

²⁹ “Ipaixuba cuarenta yura sharawu itiru”, Abrahampa wariawadi. “Cuarenta yura sharake ẽ atu adaitiba”, Epa Diospa Abraham wadi.

³⁰ Awiana Abrahampa ñukadi: “Ẽ bia ñukariwaitu mi iki sidakĩ. Ipaixuba treinta yura sharawu mi wichiwixu mi atu adaitime”, wadi. Diospa Abraham kebadi: “Treinta yura sharawu wichixu ẽ atu adaitiba”.

³¹ Abrahampa awiana ñukadi: “Ewẽ Dios besetaba ẽ bia ñukai. Veinte yura sharawu mi wichixu mi atu aweskawaime”, Abrahampa wadi. “Veinte yura shara wichiwixu Ẽ atu adaitiba”, Epa Diospa wadi.

³² Awiana Abrahampa yuidi: “Ana bia wekaxtiwaxikiba ẽ bia ñukai. Ipaixuba diez yura sharawu wichixu mi aweskawaibame”, Abrahampa wadi. Epa Diospa kebadi: “Diez yura sharawu wichixu ẽ atu adaitiba”, wadi.

³³ Abrahamwe tsaita Dios kadi. Abrahamri awẽ pexe tapas adu dasudi.