Génesis 16 - Yura porciones de la biblia

Agarwe awẽ wake Ismael

¹ Abramweta Sarai wake atiruwuba ipaudiwu. Naskawia Sarai uibatiya idi bai Egipto adua awẽ ade Agar.

² Naskata Saraipa awẽ wede Abram yuidi: “Epa Dios ea wakeya wababisba. Naskake ewẽ uibati Agar awe iwe. Ipaixuba na uduax nu wakeyatiruki”, wadi. Na Saraipa yuiya Abrampa dikadi.

³ Naskata Saraipa awẽ uibati Agar Egipto bai adua wede inadi awe inu. Nadu diez wari Abram ma Canaán adu ika idi.

⁴ Abram Agarwe idi. Agar wake ma dadexu Sarai duikaspakĩ taewata uĩkaspadi.

⁵ Naskake Saraipa Abram yuidi: “Miuxũ Agarpa ea duikaspai. Iwikui ẽ bia inayabea. Datiã ma wakeya iki bitsisipapai. Tsua uduax nu askamaiki Epa Dios duku yuinu”, Saraipa Abram wadi.

⁶ Abrampa kebadi: “Mewẽ uibati dudu. Na mi apaiyai keskawawe”. Naskaxu Saraipa chakawakĩ taewaitu Agar naduax chaikui kadi tsua ikabari.

⁷ Naskaweke Epa Dios awẽ ángelpa Agar wichidi tsua ikabadua. Nadu pozo keskara idi pexe ichapa wai kaa Sur adu.

⁸ Wichixu yukadi: “Agar Sarai awẽ uibati. Wakiax mi uime. Waki mi kaime”, wadi. Agarpa kebadi: “Ewẽ diaiwu xawu awẽ ade Sarai aduax ẽ ichui”, wadi.

⁹ Naskake Epa Dios awẽ ángelpa yuidi: “Mewẽ diaiwu xawuki awiana dasuwe na bia yuiyai keskaxikĩ”.

¹⁰ Awiana Epa Diospa awẽ ángelpa yuidi: “Mewẽ kaiwuunuax ichapanawã kaĩpakedakawu. Tsuã tanawatiruba ipadaka”.

¹¹ Dios awẽ ángelpa yuidi: “Mi wake dadea werunawake. Awẽ ade Ismael mi waaxiwi. Epa Dios ma bia dika mi ubiskuiyaitu.

¹² Ismael yuina dii mera ika keskara inupukui. Naatiiwuwe setenapakedaka. Nawuriwi setenapakedakawu nawe. Awẽ udiwetsawuwiake atuwe setenapakedaka”, Dios awẽ ángelpa wadi.

¹³ Ma Dios Agarwe tsaikadu Agarpa adedi Dios naatiiwi mi uĩ. “Ma ẽ Dios uĩya ẽ daaba”, Agar idi.

¹⁴ Datiã pozo awẽ ade Na Epa Dios ipadakatu naatiiwi uĩ. Datiãriwi naa pozo nadu Cadés yawi Béred nexpakaya.

¹⁵ Naskax Agar awẽ wake kaĩdi. Na Abrampa awẽ wake idi. Naskake Abrampa adedi Ismael, wadi.

¹⁶ Na wake kaĩditiã Abram ochenta y seis wariya idi.