Génesis 15 - Yura porciones de la biblia

Diosweta Abrampa shinadiwu

¹ Chipu Epa Diospa tsai adi. Abram awẽ dabapa yuidi: “Rateyabawe Abram. Ẽ bia kexei. Ẽ bia inai awara sharawu”, Epa Diospa wadi.

² Abrampa kebadi: “Epa Dios aweskakĩ awara shara mia inaime ẽ wakeyabaweke. Yura bai wetsadua na ewẽ uibati nadu awẽ ade Eliézer Damasco adua. Na ewẽ awarawu naatuna iixiwi”,

³ Chipu Abrampa yuidi: “Mia wake inabisba ewẽ awarawu na ewẽ uibatina iixiwi”, Abrampa Dios wadi.

⁴ Epa Diospa kebadi: “Mewẽ awarawu wiixiwai na mewẽ wakekui iixiwi. Ana mewẽ uibati iixiwiba”, wadi.

⁵ Naskaxu Epa Diospa Abram xawakawi iyuxu yuidi: “Dai ari uĩpu. Tanawapu na exteweruwu awi mi atirumaiki tanawakĩ. Naatii mewẽ kaiwuu uduax ichapanawã kaĩpakedakawu inupukukadi. Tsuã atu tanawatiruba”, Epa Diospa Abram wadi.

⁶ Abrampa Dios ikũira wadi na axuxiwai. Naskake Diospa Abram uĩya sharakui idi.

⁷ Diospa yuidi: “Ẽ mewẽ Diaiwu Dios. Ẽ bia kaĩbadi Ur caldeowu meradua bia da bai inaxikĩ”, wadi.

⁸ Abrampa kebadi: “Dios ewẽ Diaiwu aweskawaxu ẽ tapitirume mia da bai inadaka”, Abrampa wadi.

⁹ Epa Diospa yuidi: “Ea wexuwe vacapa wake cabrariwi ovejariwi. Tres wari ma atuki ika. Naskatari riwi yawi riwi keskara ea wexuwe”, wadi.

¹⁰ Abrampa naa yuinawu Dios adu wudi. Retexu kaxkexu wuxudi. Na peiya rawe kaxkediba.

¹¹ Xetewu wutuwaiwawe yuinawu nawu Abrampa ichuriwadi.

¹² Ma wari kaadu ma wakishyaidu. Abram uxakaĩdi naskayaidu wakish besekuichi wepupakewuadi besekuidi.

¹³ Naskake Epa Diospa yuidi: “Tapiwe mewẽ kaiwuunuax ichapanawã kaĩpakedakawu bai wetsa adu inupukukadi. Naduxu atu yudubadakawu na uibati atiru keskawakĩ atu chakawadakawu cuatrocientos wari.

¹⁴ Na batu uibatiwanupukukadi ẽ atu chakawaxiwi na bai aduawu. Chipu mewẽ kaiwuu uduax ichapanawã kaĩpakedakawu naduax atuna iixiwi na awara sharawu.

¹⁵ Mi adiwuax shara iixiwi. Awa chakawaaxba mi daaxiwi. Bia baiwaaxikadi. Mewẽ xidiwuwe mi baixiwi.

¹⁶ Chipu cuatrocientos wari ma ikadu mewẽ kaiwuu uduax ichapanawã kaĩpakedakawu wenupukukadi da bai adu na amorreowu ikawu adu. Naduxu ẽ atu putaxiwi chakawuke mewẽ kaiwuunuax ichapanawã kaĩpakedakawu adu inuwu”, Epa Diospa wadi.

¹⁷ Ma wari kaadu ma yabeadu chiiwã xuisai keskara idi kuĩmawa putai. Wii keskara na yuina kaxkeawu nexpakaya wuwawuwaĩdi.

¹⁸ Naa pedata Diosweta Abrampa shinadiwu. Naskata Diospa yuidi: “Da bai ẽ mewẽ wedawu inai enewa Egipto adu xateta ede Éufrates adu atuna inu.

¹⁹ Na quenitawunu quenizitawunu cadmoneowunu

²⁰ hititawunu ferezeowunu refaítawunu

²¹ amorreowunu cananeowunu gergeseowu yawi jebuseowu nadu ikawu. Chipu atũ bai mewẽ wedawuna inu”, Epa Diospa yuidi.