Génesis 12 - Yura porciones de la biblia

Epa Diospa Abram yuidi na yuiyai keskanu

¹ Dukuwede awẽ ade Abram Babilonia bai pexe ichapa Ur adu ipaudi. Peda wetsa Epa Diospa Abram yuidi: “Abram mewẽ epa awẽ pexe aduax mewẽ kaiwuu aduaxri katawe na bai ẽ bia tapibaxiwi adu.

² Mewẽ kaiwuu uduax ichapanawã kaĩpakedakawuweta. Ẽ aaxiwi mewẽ kaiwu ichapanawã inupukukadi. Ẽ bia sharawaaxiwi miuxũ wetsawu atu sharawata. Naatiiwixu bia tapixikadi mi tsuamaiki.

³ Miuxũ atiriwu ẽ atu sharawaxiwi. Na bia sharawaawu ẽ atu sharawaaxiwi. Na bia chakawaawu ẽ atu chakawaaxiwi. Miuxũ ẽ atu sharawaaxiwi na baitiixu ikawu”, Diospa wadi.

⁴ Epa Diospa yuiyadu Abram Lotwe Harán aduax wudiwu. Abram setenta y cinco wari ma ika idi bai Canaán adu kaidu.

⁵ Awẽ awĩ Sarai iyuta awẽ wake wetsa Lot iyudi. Awẽ awarawu awẽ yuinawuya awẽ uibatiwuyari Harán aduxu wibiswuya. Canaán adu dukudiwu.

⁶ Abram kadi baiwu winuwui kai pexe ichapa Siquem adu kakĩ. Nadu iwi dia Canaán adu ikawawe adekakĩ Moré wapaudiwu.

⁷ Canaán adu ikawawe naduxu atu yabawapaudiwu. Naduax Dios Abramki dukudi: “Mewẽ kaiwuu uduax ichapanawã kaĩpakedakawu da bai ẽ atu inaxiwi”, wadi.

⁸ Naskata machiwa na wari uwaikiri awẽ ade Betel ari kadi. Nadu awẽ yuina wichi tapasdi. Naskata Betel pexe ichapa wari kaikiri idi. Pexe wetsawawe awẽ ade Ai wari uwaikiri idi. Epa Dios wichibadu Abrampa ruwe petsaidadi naduxu Dios awara shara inaxikĩ Abram naduax Epa Dioswe tsaixikĩ.

⁹ Naskata Abram wenamashta bai betu adu wudiwu tsua ikabadu awẽ ade Négueb.

Abram dukudi Egipto bai adu

¹⁰ Abram awẽ kaiwuuwe bai Canaán ikawu adu ana piti idiba. Naskake Abram bai Egipto adu kadi awẽ kaiwuuwe nadu iki kai.

¹¹ Ma dukui kakĩ Egipto adu Abrampa yuidi awẽ awĩ Sarai: “Ẽ bia uĩ mi awĩwu sharakui.

¹² Egipciowawe bia uĩkakĩ: ‘Da awĩwu dukuwene awẽ awĩ’, bia waaxikadi. Naskake ea retetiruwu bia retekataba. Bia wiixikakĩ.

¹³ Bia ñukayaiwawe atu mi yuitiru: ‘Ẽ awẽ uchi’, mi atu watiru. Naskake miuxũ sharawakata ea reteyabanuwu”, Abrampa Sarai yuidi.

¹⁴ Ma Abram Egipto adu dukuadu egipciowawe Sarai sharakui uĩdiwu.

¹⁵ Faraón awẽ uibatiwawe uĩdiwu Sarai. Na diaiwu nadua yui wukadi wudiwu da awĩwu shara uĩkakĩ. Naskake iyudiwu faraón awẽ pexe adu.

¹⁶ Awĩuxũ faraónpa Abram sharawadi. Yuina idawanabetiruwu ovejawu vacawu uibatiwu asnowu camellowu nawu inadi.

¹⁷ Naskatari Saraiuxũ Epa Diospa faraón chakawadi. Awẽ kaiwuuya isipaewawe atu isinibadi.

¹⁸ Naskake faraónpa awẽ pexe aduxu kedabadi Abram iskawadi: “Aweskawakĩ mia ea yuiyabame da Sarai mewẽ awĩweke.

¹⁹ ‘Ewẽ chiku’, mia ea waita. Ẽ mewẽ awĩ ẽ bia wiãkerada. Da mewẽ awĩ iyutawe”, faraónpa Abram wadi.

²⁰ Naskata faraónpa awẽ soldadowu yuidi atu tsekanuwu. Abram awẽ awĩ yawi awẽ awarawuya nawawe kaĩbadiwu Egipto aduxu.