Génesis 11 - Yura porciones de la biblia

Pexe chai keyakui basua

¹ Naatiã na tsai wistichi tsaipaudiwu.

² Yurawu wudiwu na wari uwaikiri. Nari wukakĩ uke rawe machiwa rawe nama mispadu wudiwu. Nadu bai awẽ ade Sinar awẽ ade wetsa Babilonia nadu iixikakĩ netediwu.

³ Naatiiwiwai shinadiwu pexe keya basuxikakĩ: “Nu ladrillo anukawe. Ladrillo chiĩ nu shinawaxu nu petsaidanu naskaxu nu wuĩ tayanukawe”. Naskaxu bakex ataba ladrillo akĩ taewadiwu

⁴ Chipu yuinadiwu: “Pexe keya basua nu wanu. Dai ari dukua inu. Naskawaitu naatiiwixu duku dikanuwu. Nu paxkayabanu baitiixu”, idiwu.

⁵ Pexe ichapa adu pexe keya basua waiwawe Epa Dios wutuxu uĩwadi.

⁶ Epa Diospa yuidi: “Daawu xuku wistiwu. Na tsai wistichi tsaitiruwu. Na ma akĩ taewawu atũ yudu tsuã atibawatiruba.

⁷ Wutuxu ẽ atũ tsai wetsaya atu waxui na tsai wistichi ana tsaiyabanuwu”, Epa Dios idi.

⁸ Naduxu Diospa atu paxkanawadi bai aduxu. Nadu atũ yudu adaitidi.

⁹ Naduax tsaiwiakakĩ ana dikananadiwuba. Naduxu Diospa atu paxkanawadi na baitiu adu. Naskake na pexe ichapa awẽ ade Babel, wadiwu.

Sempa awẽ kaiwu

¹⁰ Na waipawã daxayabeadu ma wari rawe ma ikadu Sem cien wari ma aki ikadu awẽ wake Arfaxad kaĩdi.

¹¹ Arfaxad kaĩdiadu Sem quinientos wari ma aki ma ika idi. Awiana wake adi awĩwakeriwi. Naskax dadi.

¹² Arfaxad treinta y cinco wari aki kaadu awẽ wake werunawake kaĩdi. Kaĩke adedi Sélah.

¹³ Naskata Arfaxadpa cuatrocientos tres wari ika idi. Awiana wake adi awĩwakeriwi.

¹⁴ Naskata Sélahpa treinta wari ma aki ikadu awẽ wake kaĩdi. Kaĩke adedi Éber.

¹⁵ Naskata Sélahpa cuatrocientos tres wari ma aki ikadu awẽ wake kaĩdi. Awiana werunawakewu adi awĩwakewuri.

¹⁶ Éber treinta y cuatro wariya idi awẽ wake kaĩyadu. Kaĩke adedi Péleg.

¹⁷ Péleg kãidiadu Éber cuatrocientos treinta wari ika idi. Awiana wake adi awĩwakeriwi.

¹⁸ Naskata Péleg ma treinta wari ikadu awẽ wake Reú kaĩdi.

¹⁹ Naskata Reú kãidiadu Péleg doscientos nueve wari iyudi. Awiana wake adi awĩwakeriwi.

²⁰ Reú treinta y dos wari aki kaadu awẽ wake kaĩdi. Kaĩke adekĩ Serug, wadi.

²¹ Serug kaĩdi kachiuri chipu Reúpa awĩwakewu werunawakewu kaĩdiwu. Reú doscientos siete wari iyupaudi.

²² Serug treinta wari aki kaadu awẽ wake Nahor kaĩdi.

²³ Nahor kaĩdi kachiuri chipu Serug awẽ wakewu awĩwakewu werunawakewu kaĩdiwu. Serug doscientos wari iyupaudi.

²⁴ Nahor veintinueve wari aki kaadu wake Térah kaĩdi.

²⁵ Térah kaĩdi kachiuri chipu Nahor awẽ wakewu awĩwakewu werunawakewu kaĩdiwu. Nahor ciento diecinueve wari iyupaudi.

²⁶ Térah setenta wari aki kaadu tres wakeya idi. Wetsa Abramnu Nahornu Harán.

Térahpa awẽ wakewu

²⁷ Térahpa awẽ kaiwu uduax ichapanawã kaipakedakawu daawu idiwu. Térahpa awẽ Abram Nahorya Harán. Haránpa awẽ wake Lot idi.

²⁸ Naskata apa Térah diyuadu awẽ wake Harán bai Caldea awẽ pexe ichapa Ur aduax dadi.

²⁹ Abrampa ariwi awĩwu widi. Na awĩni awẽ ade Sarai idi. Abrampa awẽ extu Nahorpa awĩwu widi. Awẽ ade Milcá idi. Na Milcá Haránpa awẽ wake idi. Iscá awẽ chiku Milcá idi.

³⁰ Sarai wake dadetiruba wake abisba idi.

³¹ Térah bai Caldea awẽ pexe ichapa Ur aduax Canaán bai ari kadi. Awẽ wake Abramnu Sarai awẽ wawawa awẽ xuta Lot awẽ wawawari iyudi. Askawia pexe ichapa Harán adu dukuax nadu netediwu pexe waaxikĩ.

³² Harán aduax Térah doscientos cinco wari ikadu dadi.