Génesis 10 - Yura porciones de la biblia

Noépa awẽ rewuduwu

¹ Nawu Noépa awẽ wakewu Sem Cam Jafet nawawe atũ kaiwuu uduax ichapanawã kaĩpakedakawu. Enewa ma daxaitadu wake adiwu.

² Jafetpa wakewu Gómer Magog Madai Javán Tubal Mésec Tirás.

³ Gómerpa wakewu Asquenaz Rifat Togarmá.

⁴ Javánpa wakewu Elisá Tarsis Quitim Rodanim.

⁵ Jafet awẽ kaiwuu uduax ichapanawã kaĩpakedakawu enewa ketukunu ipaudiwu. Naduax atũ bai aduax atũ tsai wistichi tsaipaudiwu.

⁶ Campa wakewu Cus Misraim Fut Canaán.

⁷ Cuspa wakewu Sebá Havilá Sabtá Raamá Sabtecá. Raamá wakewu Sebá Dedán.

⁸ Cuspa awẽ wake wetsa Nimrod. Nimrod awẽ bai adua diaiwu bitsisipa iki taedi.

⁹ Diospa axuwaidu Nimrod yuina retebis idi. Naskax naatiiwixu: “Nimrod yuina retebiskui”, wadiwu.

¹⁰ Na pexe ichapa atũ ade Babel Érec Acad Calné atũ bai awẽ ade Sinar idi. Na pexe ichapa Nimrod atũ diaiwukui idi.

¹¹ Sinar aduax Nimrod bai Asur adu kadi. Pexe ichapa wadi awẽ ade Nínive wetsa Rehobot Ir wetsa Quélah.

¹² Quélah Nínive nexpakayadua Resen pexe ichapa ewapakui pexe wadi.

¹³ Naskadu Misraim awẽ kaiwuunuax ichapanawã kaĩpakedakawu bai wetsa adu ipaudiwu. Nadu ludeowu ipaudiwu anameowu ipaudiwu lehabitawu ipaudiwu naftuhítawu ipaudiwu

¹⁴ patruseowu ipaudiwu casluhítawu ipaudiwu caftoritawu ipaudiwu. Nawawe atũ kaiwuu uduax ichapanawã kaĩpakedakawu filisteowu ipaudi.

¹⁵ Canaánpa awẽ wake iyuakui awẽ ade Sidón idi. Sidónpa chipuke Het.

¹⁶ Naskaxu Canaán awẽ kaiwuu uduax ichapanawã kaĩpakedakawu adedi jebuseowu ipaudiwu amorreowu ipaudiwu gergeseowu ipaudiwu

¹⁷ heveowu ipaudiwu araceowu ipaudiwu sineowu ipaudiwu

¹⁸ arvadeowu ipaudiwu semareowu hamateowu ipaudiwu. Naskax chipu naatiiwi cananeowu na baitiu paxkanadiwu.

¹⁹ Naatiiwi na Canaán awẽ kaiwuu uduax ichapanawã kaĩpakedakawu na baitiu atũ bai ewapa na Guerar aduax pexe ichapa Sidón ari dukudiwu. Naduax pexe ichapa Gaza adu dukudiwu. Naduax pexe ichapa Sodoma Gomorra Admá Seboím Lesa aduri Canaán kaiwuunuax ichapanawã kaĩpakedakawu atũ bai ipaudi.

²⁰ Campa awẽ kaiwuu uduax ichapanawãwu kaĩpakedakawu. Na baitiu awẽ kaiwuuya atũ bai aduax atũ tsaima ipaudiwu.

²¹ Naskata Noépa wake Sem awẽ extu Jafet. Sem wake ichapaya idi. Naatiiwi Éber wakewu Sempa awẽ kaiwuu uduax ichapanawã kaĩpakedakawu.

²² Sempa wakewu Elam Asur Arfaxad Lud Aram.

²³ Aram wakewu Us Hul Guéter Mas.

²⁴ Arfaxad awẽ wake Sélah idi. Naskata Sélahpa awẽ wake Éber.

²⁵ Naskadu Éber wake raweya idi. Naskaxu wetsa adedi Péleg. Péleg iyuatiã baitiixu paxkanadiwu taediwu. Awẽ extu awẽ ade Joctán.

²⁶ Joctánpa awẽ wakewu adedi Almodad Sélef Hasar Mávet Jérah

²⁷ Hadoram Uzal Diclá

²⁸ Obal Abimael Sebá

²⁹ Ofir Havilá Jobab. Naatiiwi nawu Joctánpa awẽ wakewu idi.

³⁰ Nawu atũ bai Mesá aduax Sefar dukudiwu. Na Sefar bai adu wari ubis ari bachi ichapawu idi.

³¹ Nawu Sempa awẽ kaiwuu uduax ichapanawã kaĩpakedakawu. Bai wetsa xuku wetsawu tsai wetsaya atũ bai aduax idiwu.

³² Nawu Noépa awẽ kaiwuu uduax ichapanawã kaĩpakedakawu. Naskax baiwutii ichapa kaĩdiwu. Nawu bai wetsawuya idiwu. Enewa daxadu chipu paxkadiwu. Naskax baiwutii paxkakadax yura wetsa keskara idiwu.