मरकुस 2 - मध्य पुरविया थारूलकबा मारल लोक निक भेलै ( मती ९:१-८ , लुका ५:१७-२६ ) 1 कन्हिक दिन बाद येसु कफरनहुम सहरमे घुइमके एलै। उ घरेमे छै कैहके लोकसब सुनल्कै। 2 बहौत लोकसब जम्मा भेलासे घरके भितर बाहरमे एकोरति कतौ ठाम नै छेलै। येसु परमेस्वरके बचनसे लोकसबके परचार करैतरहै। 3 ओह्या बखत चारटा लोक एक गोरे लकबा मारल लोकके लके ओकरलग एलै। 4 लोकसबके भिरके कारन ओकरलग जाइले कतौसे रस्ता नै भेटलाके बाद उसब छाइन्हमे चहैरके रस्ता बनाइल्कै तब बिमारीके ओकर झोल्ङा सहित निचा झाइरके येसुके अगामे राखल्कै। 5 आपन उपर लोकसबके एहेन बिस्बास करल देखके येसु कहल्कै, “हे पिरिय, तोहर पापसब छमा भेल छौ।” 6 ओते कुछ धरमगुरुवोसब बैठल छेलै आ मनमने एहेन बिचार कैररहल छेलै, 7 “यि लोक कथिले अनङ बोलैछै? यि त परमेस्वरके निन्दा करैछै? पाप छमा करैले त परमेस्वर बाहेक औरो कोइ नै सक्तै!” 8 तब तखुन्ते ओइसबके मनके बात बुइझके येसु कहल्कै, “तुसब कथिले एहेन बिचार करैचिही? 9 ओइ लकबा मारल लोकके ‘तोहर पाप छमा भेलछौ’ कैहके कहनाइ कि ‘आपन बिछौना उठाके चल’ कहनाइ कोन उचित हेतै? 10 महज दुनियामे मानबके बेटाके पाप छमा करैके अधिकार छै से बात तुसब जान।” तब येसु लकबा मारल लोकके कहल्कै, 11 “तु उठ! आपन झोल्ङा उठा आ बोइकके घर जो!” 12 तब उ तखुन्ते सबकोइके सामनेमे उठलै आ आपन झोल्ङा उठाके गेलै। ओतेका सबलोक आस्चरजमे परलै आ परमेस्वरके परसन्सा करैत कहल्कै, “एहेन काम त हमसब पहिने कहियो नै देख्ने छेलियै।” येसु लेबीके छानल्कै ( मती ९:९-१३ , लुका ५:२७-३२ ) 13 येसु फेनो गालिल तालके पखामे गेलै। तब बहौत लोकसबके भिर ओकरलग एलै आ उसबके सिक्छा दैले लाग्लै। 14 ओतेसे जाइतकाल येसु अल्फयासके बेटा लेबीके बटी उठाइबलाके अड्डामे बैठल देखके कहल्कै, “हमर पछा लाग।” लेबी उठके ओकर पछा लाग्लै। 15 लेबी आपन घरमे येसु आ ओकर चेलासबके भोज खाइले बोलाइल्कै। ओइ भोजमे बहुत बटी उठाइबलासब आ पापी लोकसब बैठल छेलै। (कथिलेत ओकर पछा लागैबलासब एहेन बहुत लोकसब छेलै।) 16 येसुके पापीसब आ बटी उठाइबलासबसङे खाइत देखके फरिसी दलके धरमगुरुसब ओकर चेलासबके कहल्कै, “उ कथिले उसबसङे मिलके खान-पिन करैये?” 17 येसु सुइनके उसबके कहल्कै, “निरोगीसबके बैधके जरुरत नै परैछै महज रोगीसबके परैछै। हम धरमीसबके नै महज पापीसबके पापसे पस्चाताप करैके लेल बोलाइले एलचियौ।” उपासके सबाल ( मती ९:१४-१७ , लुका ५:३३-३९ ) 18 ओइ समयमे बप्तिस्मा दैबला युहन्नाके चेलासब आ फरिसीसब उपास बैठैछेलै। कुछ लोकसब आइबके येसुके कहल्कै, “युहन्नाके चेलासब आ फरिसीके चेलासब बेर-बेर उपास बैठैछै महज अहाँके चेलासब कथिले नै बैठैये?” 19 येसु ओकरासबके कहल्कै, “कि बर बरियातीसबसङे रहतै त उसब उपासे रहैछै से? महज जहियातक बर ओकरासबसङे रहतै उसब उपासे नै रहैछै। 20 महज एहेनङो दिन आइब सक्तौ जब बर ओइसबसे अलग करतौ तब उसब ओइ दिन उपासे बैठतौ।” 21 “कोइ पुरना कपरामे लबका ढप्पा नै जोरैछै। अगर जोरैछै त, लबका ढप्पा पुरना कपराके घकुचाके फाइर दैछै आ पहिनेसे औरो नै निक हैछै। 22 तब कोनो लोक तजा अङगुरके मध पुरना छलाके थैलीमे नै राखैछै, नै त लबका मधसे छलाके फाइरदैछै तब मध बैहजाइछै। तब मध आ छला दुनु नास हैछै। तैल्याके तजा मध लबके छलाके थैलीमे राखल जाइछै।” पबितर बिसराम दिनके परभु ( मती १२:१-१४ , लुका ६:१-११ ) 23 एकबेर येसु पबितर बिसराम दिनमे गहुम खेत हैत जाइछेलै आ ओकर चेलासब गहुमके सिंससब खाइले तोरल्कै। 24 यि देखके फरिसीसब येसुके कहल्कै, “पबितर बिसरामके दिनमे कथिले तुसब नियम बिपरित करैचिही?” 25 येसु उसबके जबाब देल्कै, “दाउद आ ओकर साथि-सङिसबके भुख लागल बखत कथी करने छेलै? कि तुसब पबितर धरमसास्तर नै पढनेचिही? 26 उ त अबियाथार परधान पुजारीके पालीमे परमेस्वरके घरमे ढुइकके चरह्याल रोटी साथीसबसङे बाइटके खेल्कै। जबकि अपनासब नियम अनुसार पुजारी बाहेक औरो ककरो खाइले नै हैछै। महज उ असगरे नै ख्याके दोसरोके खाइले देल्कै।” 27 तब ओइसबके येसु कहल्कै, “पबितर बिसराम दिन लोकके खातिर बन्याल गेलछै, लोक पबितर बिसराम दिनके खातिर नै। 28 तै खातिर मानबके बेटा पबितर बिसरामो दिनके परभु चियौ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.