Tobit 3 - DAWAN BÎLA AISKA

Tobit pura sunra ba

¹ Yang uba sari taki, kupi ra wirha diman bara mahka inatna; bara kupi sarka tilara naku puri sunatna:

² “Dawan, man lika kasakkira sma; diara daukisma ba sut kasakkira atia sa. Yabalkam nani ba lika latwan lâka bara diara kasak atia sa. Man ba tasba aiska wihtka sma.

³ Nanara, Dawan, yang dukira kupiam krauki bas, namkra nani ba yang ra laki bris. Saurki nani ba tâka, klala aikpara yang kra, apia kaka almukki nani kra daira walras si saurka lâka nani dauki banhri ba tâwan. ¡Man mampara saurka lâka dauki banhri sa!

⁴ Lâmka nani ba bîla wali daukras, ba mita man bui yabram waihli nani bui diara nani bri kapri ba mihti dakbi bri banhwan, tasbayi wina kangbi ai sakan bara prura mihta ra wan mangkan; bamna plis nani sut wina wan saki tawan bani ra wan brih waram ba, bara yabram upla nani ba yang nani maipara saura baman aisisa bara sin wan kulkras sa.

⁵ Yang pain daira walisna lukankam nani sut ba aitani atia sa, saurki lâka nani tâwan klala aikisma ba. Adarkam nani ba yang nani kulki daukras katna, bara man ra kasak apia banhwi kapri.

⁶ Dîa yang ra ai daukaia lukisma ba kat, dauks. Adar yas ai iki banhbia, yang naha tasbaya wina lap tiwi tasba yuya ra tawamna dukiara. Pruaia ba kau pain lukisna, raya kaia ba wal. Nina sauhkanka bara maipara aisanka nani kiaima ra uba walisna, bara swira lâka tara kum brisna. ¡Bamna, Dawan, naha pâtka wina pri ai sâks! Ai swis ban kaia ra ris bri pliska ra wamna. Dawan, makabanki na walras lika kapara. Pruaia ba kau pain lukisna, rayaki ra pât ailal wahwaia ba wal, bara sin sturi saura ailal ai wi ba wali kaia ba wal.’’

Sara pâtka wahwanka nani bara ai pura sunra ba

⁷ Baha sim yua, mairin kum nina Sara mâki kan ba, Ragüel luhpia mairin, Ecbatana tawanka ra iwi kan ba, Media kuntrika ra, ai aisika albika mairin bui sin kupia sauhkanka nani yaban ba wali panis wahwaia kata.

⁸ Sara ba sika aima 7 marit takan kata, sakuna aima bani Asmodeo, sitan saurakira kum ba bui maritka waitna nani ra iki kata, witinka wal marit natka ba kat wal prawaia kainara. Bamna albika mairin bui witin ra win: “¡Man bui sika maritkam waitna nani ra ikisma ba! Maritkam waitna pat 7 briram, bara witin nani taitilka kumi sin man sip briras sma.

⁹ Sakuna maritkam nani baku prui ba mita wisi lika aitani apia sa yang nani ra panis ai munma. ¡Witin nani aikuki mahka prus, aima kumi sin luhpa baikras pali!”

¹⁰ Sara uba sari taki, mahka inan. Ningkara ai aisika watla pîska kau purara kan ba kat uli wan, ailangwi pruaia wisi. Sakuna pain pali luki kaiki, naku aisan: “Aisiki mapara swira lâka tara kabia, naku wi banhbia kaka: ‘Luhpa mairin kumi baman bri kapram, man bui latwan pali kaiki kapram, bara ai paniska nani tâka ailangwi pruan.’ Baha wal lika aisiki dama ba yang bui munrika sari bla prubia. Kau yamni sa ailangwi pruras kamna ba; sakuna Dawan ra makabaisna ai swika mahka pruamna, rayaki ra kupi sauhkanka bîla nani kau walaia apia dukiara.’’

¹¹ Bara ai klahkla nani ba windar tani ra sakbi brih, naku aisan: “Umpira wan kaiki Gâdka sma ba, mamyunan kabia; ninam ba mayunan kabia ban kaia ra; diara nani paskram ba sut bui ban kaia ra mamyuni kabia.

¹² Man ra puri sunisna, man ra tawi mai kaikisna.

¹³ Adar yas naha tasbaya wina pri takamna, kupi sauhkanka bîla nani kau walaia apia dukiara.

¹⁴ Man, Dawan, nu sma yang na sunu sna, waitna kumi sin yang ra kau ai kangbras.

¹⁵ Tasbayi wina ai saki naha kuntrika ra ai bri balan na ra, yang nini bara aisiki nina ba sin kau sauhkras sna. Aisiki luhpia mairin yang baman sna; ai prapatika nani mihta ra swiaia uplika nani witin âpu sa, ai taika, apia kaka pamalika wina kumi sin âpu sa o pamalika yang wal marit takaia sip uplika. Maritki waitna nani pat 7 pruan sa. ¿Dîa mata kau ban raya iwi kamna ki? Sakuna prura ba ai blikaia brinkam apia sa kaka, yang ra ai kaiki, umpira ai kaiks; aikrika sturi saura nani kau walamnara.’’

¹⁶ Baha minitka ra Tobit bara Sara wal pura sunra nani ba Gâd mawan pranakira ba kat uli wan, bara wali muni,

¹⁷ insal Rafael ba blikan wâlsut ra rakaia dukiara: Tobit nakra nani blain takan ba rakaia, bara baku mika Gâd ingnika ba kli kaikaia sip kabia dukiara, bara Ragüel luhpia mairin Sara ba pri sakaia, Asmodeo sitan saurakira mihta ba wina, bara Tobit luhpia waitna Tobías wal marit sakaia. Bamna rait, waitna wala nani sut purkara, Tobías kau ai raitka bri kan Sara wal marit takaia. Baha sim minitka ra, Tobit, latara kata ba, ai watla ra wih dimuya kan, bara Sara lika ai watla pîska pura ba wina bal iwuya kata.