Tobit 2 - DAWAN BÎLA AISKA

Tobit ba nakra blain takisa

¹ Esarhadón ba king aimaki kan piua ra, waitla ra kli tawi wari bara maritki mairin Ana bara luhpi waitna Tobías ba kli laki aiki banhwan. Yu kum yang nani Pentikus liliaka tara ba dauki kapri (nina wala mâki ba “wik nani liliaka tara”). Yang dukira plun tara kum ridi dauki banhwan kata, bara tibil ra iwri.

² Tibil ba ridi dauki muni, plun sâtka nani ailal sal aiki banhwata. Bamna luhpi Tobías ra wîri: —Luhpi, latara taki wih pliki kaiks, Israel uplika kum wal prawma sapa, baha nani ai tasbaya wina saki Ninibi ra bri balan ba, ai kupia aiska wal Gâd ra kasakkira kan kaka bara umpira kaia, bara paiws bal yawan aikuki plun pibia. Luhpi, yang bîlam kaiki kamna, kli tawi balma ba kat.

³ Tobías ba Israel uplika umpira kum plikaia taki wan, bara ningkara bal muni, ai winan: —¿Dîa takisa, luhpi? —yang bui tawi wîri. —¡Aisa —ai win—, Israel uplika kum ikan sa, bara upla aipaswi pliska ra lulki swin sa! ¡Bisiura pali patka baiki ikan sa!

⁴ Pata kata ba yang dabi sin kaikras swiri. Istikira pali upla aipaswi pliska ra wari, bara baha wina uplika pruan wîna tara ba brih wari bara utla kum bilara dingki swiri, tihmia iwka bri si bikaia dukiara.

⁵ Utla ra kli tawi balri, mihti nani ba pain sikbi, sari tilara plun ba piri.

⁶ Bamna prapit Amós bui Betel mapara aisan kata ba bîla nani ra kupi tanh krawan: “Lilia tara nani ba upla pruan nani dukiara inanka ra lakamna bara lawana nani ba lika pruan lâwanka sarkira nani ra.’’ Bara yang mahka inatna.

⁷ Tihmia iwan taim, wih muni unta kum salhkri bara uplika pruan ba bikatna.

⁸ Laima uplika nani ba laiwaska kiki, aisi banhwi kan: “Bisi pali bahmuna warkka dauki ba tâwan ikaia wisi pliki banhwi kata, bara witin plapi swak takan; ¡bara kau ban sibrin âpu sa! ¡Kaiks kli upla pruan nani biki ba!”

⁹ Baha tihmika wîni pain sikbi muni, waitla wina taki, laila kwala ni sin prakras, utla kutbanka ba lamara prawri, uba bitni iwi kan ba mita.

¹⁰ Yang daira walras katna utla kutbanka ba purara, yang puri ba kat, piawira nani bâra kan ba, bara baha nani bui naikra bilara kâna lapta krahbi banhwan, baha tâka mita naikra nani bîla ba pukni dingkan. Sîka lan uplika nani ra wari ai rakbia dukiara; sakuna sîka ailal naikra ra kau yuki kan taim, naikra nani ba kau blainkira taki katna, baku ban naikra ba blain takan. Mani walhwal bilara sip diara kaikras kapri. Taiya nani sut baku sna ba ai kaiki, sari taki banhwi kan, bara Ajicar bui mani wâl main ai kaikan, Elimaida tawanka ra wan ba kat.

Tobit kasak yamnikira iwanka ba

¹¹ Baha piua ra, maritki Ana ba mahka mairin warkka nani daukata.

¹² Warkka nani ba dauki muni ai kiaptinka nani ra blikuya taim, witin nani bui mana aibapi kata. Yu kum, siakwa o kuswa katka yua 7 ra, diara nani mami kan ba tnata alki, ai kiaptinka nani ra blikan wata. Witin nani bui dukia nani ba sut mana aibapan, bara baha purkara guts luhpia kum witin ra prisant yabi banhwan, yang nani iki pimna dukiara.

¹³ Utla ra wan taim, gutska lupia ba mahka inan. Ana ra wini muni, yang makabi walatna: —¿Baha gutska lupia ba ani wina bal takan? ¿Ban kra implikram ki? Dawanka nani ra kli bri si yas, kan implikan dukia kumi sin yawan piaia wan raitka âpu sa.

¹⁴ Ana bui tawi ai win: —Baha lika prisant kum aiki banhwan sa, maina aikan ba purkara. Yang lika witin ra kasak lukras, ban aisi wi katna daiwra ba dawanka nani ra kli bri si yabia. Witin baha daukan ba tâwan uba swiri ai dauki kata. Bamna witin ai win: —¡Lamtwanka lâka warkka nani daukram ba baha kat wih takaskan sa! ¡Warkkam yamnikira nani ba baha kat wih takaskan sa! ¡Nanara param pali sa man ya sma ba tânka!