Tobit 1 - DAWAN BÎLA AISKA

Tâ bîla nani

¹ Naha sika Tobit sturka ba. Tobit ba Tobiel luhpia kan, bara Ananiel, Aduel, Gabael, Rafael bara Ragüel kiamka kata, bara witinka nani ba Jahseel kiamka kan, Neftalí kiamka daknika ba wina.

² King Salmanasar piua nani ra, witin ba Asiria wina kan ba, Tobit ba Tisbé wina alki silak ra brih wan kata, baha tawanka lupia ba lika Galili kla tani ra sa, Neftalí tawanka Quedes ba waupasa tani ra, Hasor wina kau kainara, muna tani ra, bara Sefat yahbra tani ra.

Tobit rayaka dahra tasba wala ra brih wan piua ra

³ Yang, Tobit, rayaki yua nani aiska ra iwanki ba pain bara kasakka lâka kat bri katna. Yang taiya nani bara tawanki uplika nani tilara latwan lâka dukia nani ailal daukatna, witinka nani sika yang wal tawanki wina ai saki muni Asiria kuntrika ra ai brih wan kata, Ninibi tawanka ra.

⁴ Yang wahma bara tasbayi Israel ra kapri taim, Neftalí kiamka daknika aiska ba, yang sin baha kiamka wina sna ba, Debit pamalika king aimakaia raitka bri kan ba daknika wina bara Jerusalem wina sin dakwi takan kata. Ban sakuna, Jerusalem sika Israel kiamka nani sut tila wina wahbi sakan kata witin nani bui ai sakripaiska nani yabaia kan ba pliska baku. Bâra tempel ba paskan kata bara bahara sika Gâd raya iwi kan bara ban kaia ra witin ra yaban kata.

⁵ Galili untika biara nani sut ra, taiya nani sut, bara kau pali Neftalí kiamka ba, yang baha kiamka tila wina sna ba, Israel kingka Jeroboam bui Dan tawanka ra bîp luhpia lilka adar yan paskan kata ba ra sakripais nani dauki yabi banhwi kan.

⁶ Aima ailal, yang baman Jerusalem ra wi katna lilia tara yua nani ra, Israel tawanka aiska piu bani baku daukaia adar yabi ba baku. Istikira Jerusalem ra impaki katna pati mâ nani dâkuna ba wina pas mâ nani ba brih waia dukiara, daiwri luhpia pas nani ba bara daiwri daknika nani matawalsip ra baiki saki muni baiki sakanka kumi ba sin, bara sîpki nani wina taya pas daikan ba sin brih waia dukiara.

⁷ Bara prîs nani ra bri si yabi katna, witinka nani lika Eran kiamka kan ba, altar ra warkka ba dukiara. Libait nani Jerusalem tempelka ra wark dauki banhwi kan ba ra sin diara nani matawalsip ra baiki saki muni baiki sakanka kumi ba yabi katna, baha lika naha dukia nani wina: plawar mâ, wain, ail laya holikira, drap nani, kwah mâ talia damni nani bara plun mâ wala nani mangki saki ba wina sin. Matawalsip ra baiki sakanka wina wala sekanka ba lika mani bani atkri wi kata, bara mani 6 bilka ra baha lalahka ba Jerusalem ra wih diara atki katna.

⁸ Plun mâ nani matawalsip ra baiki sakan ba wina baiki sakanka yumhpika ba, mani yumhpa bani ra yui katna tuktan rau nani tilara, piarka mairin nani bara upla tringsar nani yang nani Dawanki ra kasakki lukanka brih banhwisna ba ra, ai kupia lakan uplika nani ra bara Israel luhpia nani ra asla takan ra sin. Baha pata matawalsip ra baiki sakan wina baiki sakanka kumi ba wal lika pata tara liliaka dauki banhwi katna, Moses lâka ra adar yabi ba baku, bara Débora bui yang ra ai win kata ba natka kat, witinka ba sika aisiki tani ra kukiki kata, kan aisiki ba pruan bara yang lika rau takaskri kata.

⁹ Yang waitna aitani takri taim, wan almukka nani kiamka wina mairka kum wal marit takri, ai nina ba Ana; bara witin wal luhpa waitna kum briri, ai nina Tobías mâkri.

¹⁰ Asiria tasbaya ra kangbi ai brih wan ningkara, silak uplika baku Ninibi tawanka ra wih iwri. Muihki nani bara upliki wala nani sut ba lika gâd wala kakulkra uplika nani pata pi kan.

¹¹ Sakuna yang lika pain daira wali kapri, baha pata nani ba piaia apia.

¹² Bara kupi aiska wal Gâd ra lukanki bri kapri ba mita,

¹³ Dawan Laih Purara iwi ba karnika bui Salmanasar kupia ra kangban taim yamni ai kaikan bara ai dukia âiatkra lalka pali ai mangkan.

¹⁴ Yang Media kuntrika ra wih, witin dukia nani atki bri bali katna. Baku daukatna, king pruan yua ba kat. Media kuntrika ra Ragues tawanka ra, piu kum silbar mâ 330 kilo prais swiri, kahbi bri kabia dukiara, taiya waitna kum mihta ra, ai nina ba lika Gabael, Gabrí luhpia waitna kata.

¹⁵ Salmanasar pruan taim, witin watlika ra ai luhpia waitna Senaquerib king aimakan. Media ra waia yabalka nani ba pain apia takan, bara baha kuntrika ra yang kli sip waras katna.

Tobit warkka yamni nani ba

¹⁶ Salmanasar piua nani ra aima manis Israel uplika wala nani ra latwan lâka hilpka yabatna.

¹⁷ Pati ba plun wahwi uplika nani aikuki sir muni pi katna, bara kwala dimaia âpu uplika nani ra kwailka yabi kapri. Bara Israel uplika kum pruan kan wîna tara ba Ninibi tawanka kutbanka nani pura bâk saki latara lulkuya taim, yang kaikuna kaka, wih muni tasba ra biki katna.

¹⁸ Senaquerib ba witinka laih purara Kingka Gâd ba mapara bîla saura nani aisi kan taim, bara baha tâka mita panis munan bara Judia tasbaya wina taki plapan taim, ai kupia sauhki Israel uplika ailal ra ikata. Sakuna yang wih ki, uplika nani pruan ba bikatna. Wîna tara nani ba impliki muni, bikatna. Senaquerib bui baha uplika nani pruan ba plikan, sakuna sip sakras kata.

¹⁹ Bamna Ninibi wina waitna kum wih ki king ra daihra sakan, yang mita baha nani ba bikri wisi; bara yang yukuwaia katna. Yang dukira king pat tânka brin ba bara ai ikaia wisi ai pliki kan ba nu takri taim, sibrin ai daukan ba mita plapaia kapri.

²⁰ Diara nani bri kapri ba sut mihti dakbi muni, king ritska nani tilara bri si dingkan. Maritki mairin Ana bara luhpi waitna Tobías baman yang wal takaskan.

²¹ Kau yu nani 40 luras kan taim, Senaquerib ra luhpia waitna wâl mita iki muni, witin nani ba Ararat ilka biara nani ra plapan. Senaquerib watlika ra ai luhpia waitna Asarhadón ba king aimakan, bara witinka bui yang muihki Anael luhpia Ajicar mâki kan ba ra king tasbaya lalahka nani kulkaia warkka ba yaban; Ajicar lika wark nani aiska ba pura kakaira tara kan.

²² Bamna Ajicar yang hilpki aisan, bara baku lika sip katna Ninibi ra kli tawi waia. Kan Senaquerib ba Asiria kingka kan taim, Ajicar lika tibil ra plun kahbi nani ba wihtka kan, baku sin king stampka ba kahbi bri kaia bara sim baku wark nani sut bara lalah nani nahki yus muni ba lalka kan. Asarhadón bui baha warkka nani kli mihta ra mangkan. Ajicar lika pamaliki kan, yang tubanki.