Sins Lâka 7 - DAWAN BÎLA AISKA

Rug mairin aihka puli ba

¹ Luhpi, yang bîli nani ban bri bas, bara lâika bîla nani ba sin ban lukankam ra bri bas.

² Yang lâika bara bîli nani ba wali dauks, smalkanki nani ba sin; baha nani ba main kaiks namkra yula nani baku, bara raya kama.

³ Baha nani mihtam sirpi nani ra wilks; lukankam kat ulbi mangks.

⁴ Sins lâka wal lamkra taks; diara tânka alkaia lâka wal uplikam aihwa taks.

⁵ Witin mita pri mai sâkbia upla maya wina, baha tringsar maisa kakapra bîla aisi ba wina sin.

⁶ Yu kum waitla windarka ayan ni paskan bâk kaiki kapri,

⁷ wahma kum kum sins tânka aitani briras, bara pain laki kaikri kau taniskira pali ba.

⁸ Yabal un kum kat wan ba ra, baila wala ra luan baha mairka watla tani ra.

⁹ Mahka tutni tawi kan bara pat tihmia iwi kan.

¹⁰ Aihni mairin ba bal takan, wahma ba wal prawaia dîa sut ai nakra ra kaiki kan, kunin muni ba bara dîa rug mairin kum ai prana dauki ba kat;

¹¹ mairin kum plaplapra taukisa bara ai kupia sin lukras ai watla ra minit kum sin takaskaia sip apia,

¹² bara ban wataukisa yabal tara ra, tawan bilara bara un raya nani ra, ya pas bal lubia ba alkaia.

¹³ Mairin ba mita ai klahkla ra kiaubi alki wahma ba ra kiawalan bara ai swira âpu kira naku aisin:

¹⁴ “Yang pramis takri kan kli wal uplika takaia sakripaiska ba daukaia, dîa daukaia pramis takri ba naiwa sut daukri.

¹⁵ Bahamna yang bal takri man wal prawaia; mai kaikan pali ai dauki kan, bara yawan wal prawisa.

¹⁶ Yang krikriki purara palki swiri sa Idsip wina linin blanhkit painkira ba ni.

¹⁷ Yang mita purara isint kîa pain nani laikri sa; sîka mâka kîa painkira, alus bara sinimint aihwa sin.

¹⁸ Kaisa, latwan lâka kapka ba tnata kat danh dauki bîla man swiaia, kaisa yawan wal latwan lâka ni lilia bri lalawaia titan kat,

¹⁹ mayi ba utla ra âpu sa bamna, witin laihura impaki wan.

²⁰ Witin lalah watla kum brih wan; kati tilwan yua kat kli ai watla ra balbia.”

²¹ Ai bîla aisinka damni ba, bara kli kli aisanka ba mita wahmika kupia laki brisuya.

²² Dîa sin aisaras mahka witin ninara auya, bîp wainhka mahka ikaia ra brih auya ba baku, sula wainhka daiwan alkaika ra kauhi ba baku,

²³ tnawira kumi alkaika kat aihni pali dimi ba, bara witin baha ba kaikras ai rayaka pruaia dukiara daukan ba, trisbaya kumi ningkara ai kupia sabi baila walak luki ba.

²⁴ Bamna nanara, yang luhpi, ai wals; yang bîli aisinka nani sin aman wali bas.

²⁵ Mairka ba yabalka ra, yarka kupiam tawi wabiara, ai yabalka bîla nani ra sin mamwahkpara.

²⁶ Witin pat upla manis ra klaki ikan sa; pât ra lakan nani ba ailal pali bâra sa.

²⁷ Ai watla ra waia yabalka ra wapaia ba lika pruaia tasbaya ra waia yabalka pali sa.