Sins Lâka 25 - DAWAN BÎLA AISKA

Salaman kli aisin bîla nani ba

¹ Naha nani sin Salaman sinska lâka bîla nani sika, Ezequías Juda kingka wauhkataya wina saki bri wark taki waitnika nani ulban ba:

² Dawan prana tara ba sika diara tânka nani yukuki briaia ba, bara king nani prana diara tânka nani ba pliki sakaia ba.

³ Kasbrika laih purara ba, wan tasba tihuka tara ba sin, king nani lukanka ba, kupia sin sip pliki sâkbia apia.

⁴ Auhya yuya ba silbar wina sikbi aihka sâkma, bara slaslilkra mihta ra sakahkaia kapka pain bal takbia;

⁵ upla watawikira ba, king mawan wina aihka sâkma, bara king iwaika tara ba, kasakka lâka ra ni dutki bapan kabia.

⁶ King mawanra mamyuni dimpara, upla tara nani iwaika ba ra sin iwpara;

⁷ kanra pain sa mai paiwka: “¡Bahara was!”, wihki upla tara nani mawanra swiram tara takaia ba wal. Dîa kaikma ba man pali namkra ni,

⁸ bara baha wina wal unsabaia, lâ mawanra dimpara, kan witnis wala bâra sa man aisisma ba bahki wiaia, bara tnata ra man pana dîa wiaia tânka briras kama.

⁹ Walkam wal man nani lâmka dukiara aisas, sakuna upla diara yukuwan ra bri ba param ra sâkpara;

¹⁰ upla kum sturka wali ba ra baha mita swiram mai daukbia, ninam sauhkan sturka ba upla sut walbia sîa.

¹¹ Bîla aisanka nani ba ai piua kat aisi ba ra apil gul ni paskan ba baku sa, silbar ni paskan watlika ra mangki swin baku sa.

¹² Gul kau pain ba ni mihtadingka kum, lilura kum daukan ba baku sa, sinskira wan kupia kraukaia smalkan bîla ba, upla kum baha alki briaia tânka bri ba.

¹³ Insla dâkaia piua lapta bara kauhla iwi ba baku sa, blikan uplika kasakkira ba witin ai dawanka ba mapara; ai dawanka kupia raki bukisa.

¹⁴ Kasbrika nani pâsa wal bâra, kuna lî auhras, baku sa waitna kum ai prisantka dukiara yaia aimayunisa kuna prisantka yaras ba.

¹⁵ Wan kupia alki takaski briaia ba mita wihta kupia lakuya; bara wan twisa swapni aisi ba mita, mapara bûi ba krikuya.

¹⁶ Nasma sakram sa kaka, praiskam kat dis; puram lui di si man kli aikabi sâkmara sîa.

¹⁷ Lamamra iwi uplika watla ra minam pat pat dingkpara; witin kra sîam taki si kli misbara mai kaikbiara sîa.

¹⁸ Amar tara kum, sord malira, trisba tatwa kum baku sa, ¡baku sa ai uplika mapara witnis kunin aisi ba!

¹⁹ Trabil wan alki piua ra, kir tawi wan atki uplika ra kasak lukaia ba, wan kuhma kum kriwan wapi ba, wan napa unta bri kan plun pi ba baku sa.

²⁰ Upla kupia sari bri ra lawana aiwani kaia ba sim sukwanka ra binigar laiki ba baku sa, apia kaka kauhla yua ra kwalka daiki ba baku sa.

²¹ Man waihlam plun wahwi kaka, witin ra plun dakaks, bara diran dauki kaka, lî diaia yas;

²² baku daukma bâra mika waihlam mawan ba swira lâka ni angkma, bara Dawan mita aibapbia.

²³ Yahbra payaska mita lî ba aula; bara wan twisa alhwan sakbi aisin ba mita wan mawan saura lawi baku sakisa.

²⁴ Kanra yamni sa utla bahna un rayaka ra iwi kaia, utla yahpa tara kum ra mairin unsasabra kum wal iwi kaia ba.

²⁵ Diran dauki uplika kârma ra lî kauhla pain ba baku sa, sturi yamni laih kuntri wala wina aula ba.

²⁶ Lî kârma buhutni takan bara abalki sauhkan ba baku sa, upla kasakkira ba upla watawikira mawanra bûi tatatwi ba ra.

²⁷ Nasma laya uya pali diaia ba yamni apia sa; sakuna wan mayunra tara pali sa diara karna plikaia ba.

²⁸ Tawan kaina kutbras baku sa bara pât dimaia ba sin isi sa, baku sa ya ai spiritka sip alki takaskras ba.