Sins Lâka 20 - DAWAN BÎLA AISKA

¹ Wain blaka ba mita trabil bukisa upla ra; laya tahpla dih bara bin tara bukisa; bara ya ya baha nani mita watawi ba, sinskira apia sa.

² King kupia baiwanka ba sika, layan ihbi ba baku sa; ya witin kupia baiwan bara tuski ba, witin ai rayaka pali mapara saura daukisa.

³ Upla prana ba sika, unsaban ba wina laihura takaskaia ba; kan taniskira nani baha tilara ban aiblakwisa baman.

⁴ Tasba baikaia piua aula ba ra, sringwaskira nani tasba baikras; sakuna mâ krikaia piua ra witin pliki kabia bara sip sakras kabia.

⁵ Waitna ai kupia ra diara luki kaiki ba, lî tihuka nani baku sa; sakuna diara tânka pliki kaiki uplika mita, baha tânka pliki sâkbia.

⁶ Upla ailal bâra sa kumi bani witin ai painka dahra man aisisa; sakuna yaura kasak lukaia ba sip sakras sa.

⁷ ¡Yamni sa luhpa nani swin ba, ya wapni lâka ra iwi bara kulkanka bri ba!

⁸ King ai iwaika ra lâ wapnika daukaia iwi ba ra, ai nakra nani ni kaikan ba baman, diara saura nani sut âpu daukaia.

⁹ Upla kumi sin sip wiras: “Kupi na tâski âpu pali brisna, saurka sut pali wina yang sunu pali sna.”

¹⁰ Paun kuninkira, kunin kulki ba sin baha, wâlsut Dawan bui saura pali kaikisa.

¹¹ Ai daukanka nani tâka mita latan kaikan sa, wahma kum wapni wapisa kaka.

¹² Wan kiama diara wali ba, wan nakra diara kaiki ba sin, wâlsut Dawan mita paskan.

¹³ Yapaia ba lihki kapara, man umpira takmara sîa; namkra nani ilingks, bara plun ailal bri kama.

¹⁴ Diara atki brabrira ba, atkaia taim lika wisa dukia ba saura sa; sakuna mahka taki auya ba ra aimayunisa, diara yamni atkan ba dukiara.

¹⁵ Mana kau brisa, ya sins lâka wal aisi ba, yang wîni tara ba tasba aiska gulka ba, bara sin walpa klauhira nani wal kau mana tara sa.

¹⁶ Ya tringsar nani tras dimi ba hilpka takbia kaka, prâka ba daiki bara kli aibapaia pramiska baku alki bris.

¹⁷ Upla ba lihkisa kunin lâka ni aibanhbia, sakuna ningkara ai bîla ba, auhya ni banhwan baku kabia.

¹⁸ Yawan daukaia luki paski ba wih wan kupia krauki ba wal praki alki, bara kasak paskisa; warbanka pain kum dauki warkka ba pain daukisa.

¹⁹ Dusa kakuhbra uplika ba lika dahra yukukaia lan apia sa; bamna dusa kakuhbra nani wal prawpara.

²⁰ Ya ai papika ra bara ai yapti ra lahtubi aisi ba, ai lampka ba daskan bara tihmia tara ra prubia.

²¹ Diara tâura isi pali bri dauki ba, tnata ra baha wina sip yamni munan kabia apia.

²² Wipara: “Saura ai munan ba pana mana yang bui aibapamni”; Dawan ra kasak luks, bara witinka mai swaki mai sâkbia.

²³ Dawan lika paun kuninkira nani ba saura pali kaikisa; bara paun mangkaika kuninkira ba sin pain apia sa.

²⁴ Upla wapanka nani ba Dawan bui sika tapahkisa; upla kumi sin ai yabalka tnata ba kaikras.

²⁵ Upla Dawan ra diara kum pramis taki ba; bara baha ningkara diara daukaia win ba daukras, ai kupia wal aisaia ba trabil bâra sa.

²⁶ King sinskira ba lika upla watawikira nani ba wina laihura takisa, bara wilwaika kum munhtara taibisa.

²⁷ Upla spiritka ba sika, Gâd lampka; baha ni witin ai kupia mununhta pali kat tânka pliki kaikisa.

²⁸ King ai iwaika ba kasak pali main kaikisa latwan lâka ba bara kasak lâka ba pain dauki ba ra.

²⁹ Wahma nani prautka ba, ai karnika ba sika; bara almuk nani kulkanka ba lika, ai lal pihwanka ba.

³⁰ Watawi lâka ba, prukanka nani bara klahwanka nani mita rakisa, prukanka nani ba mita, wan kupia lukra ra rakisa.