Sins Lâka 19 - DAWAN BÎLA AISKA

¹ Kanra yamni sa upla umpira kaia lâ aihwa man tilara tauki ba, baku apia sa kaka upla nina aisi tauki ba tilara kaia ba wal.

² Yamni apia sa diara tânka pain briras kira wark karna dauki kaia; bara aihni wapi ba mistik manis daukisa.

³ Upla ai taniska lâka ba mita ai yabalka inipis ra lakisa; bara witin ai kupia ba Dawan mapara lawan baman sa.

⁴ Wan yuyaka ailal bri ba lika wan uplika nani kau manis pura praki wankisa; kuna diara briras uplika lika ai uplika dakwan ba sut mahka auya.

⁵ Lâ mawanra witnis kuninkira ba lika, pâtkas kulkan kabia apia; bara kunin bîla aisi uplika ba sip swak takbia apia.

⁶ Upla ai kupia swapni bri, ai uplika hilpka ra ai mihta param bri ba, upla sut witin ra pliki baha uplika wal ai uplika takisa.

⁷ Upla umpira ba, muihnika nani sut mita sin witin ra misbara kaikisa; kau asla ai uplika nani sin, witin wina laihura itwi takisa.

⁸ Witin sins lâka yamni lan taki alki bri baku dauki ba, ai rayaka ra latwan kaikisa bara pâwisa.

⁹ Witnis kuninkira ba lika pâtkas kulkan kabia apia; prura ba kuninkira ba bîla kaikisa.

¹⁰ Upla taniskira ba dukia apia sa diara pranakira nani ba tanis munaia, baku sin alba ba sip apia sa, wihta tara nani ba wihtka aimakaia.

¹¹ Upla tânkira muni ba mita, ai lawanka tara ba ban alki takaski brisa; bara witin ai prana ba sika, witin ra saura munan sakuna pana diara munras ban pura luisa.

¹² King lawanka ba layan ihbi ba baku sa; sakuna witin yawan ra yamni luki ba, diwas laya twi purara ba baku sa.

¹³ Luhpia waitna taniskira ba, ai aisika wîna ra siknis kum baku sa; bara wan maya mairin blahwanka nani ba lika, ban tahwi ban sip takaskras ba baku sa.

¹⁴ Wan watla, wan yuyaka ailal ba, yawan wan damika nani wina brisa; sakuna wan maya mairin âuya mâira ba lika, Dawan wina yawan brisa.

¹⁵ Sringwan tara lâka ba wan purara yapan tara kahbisa; bara sringwaskira, diara daukras uplika ba, plun wahwi kabia.

¹⁶ Lâ bîla ban bri yamni dauki uplika ba, ai rayaka main kaikisa; kuna Dawan smalkanka alki briras uplika ba lika prubia.

¹⁷ Diara luha uplika ra diara lin muni ba, witin Dawan ra lin munisa; bara Dawan wina witin ra ai mana ba kli aibapbia.

¹⁸ Luhpiam smalki wips, witin kau man bîlam wali ba piua ra; sakuna kupiam ra lukpara, witin ba âpu ikaia kat.

¹⁹ Kasak ai kupia baiki uplika ba, ai saurka mana aibapbia; baha wina ban pri pali swibia kaka, diara nani kau saura takbia.

²⁰ Lâ tânka mai smalki ba wals, bara kupia krauki ba alki bris, baha mita man almuk takma bara sinskira kama.

²¹ Upla kupia ra diara daukaia lukanka nani manis bâra sa; sakuna lâ tânka, Dawan lukan ba kat lukras sa kaka ban kabia.

²² Kupia pihni upla ra umpira kaikan lâka ba, upla nani bui ai âuyapah kulkisa; upla umpira kunin aisaras ba, kanra yamni sa, upla kuninkira ba wal.

²³ Dawan sibrinka ba raya kaia ra wan tapahkisa; baha brih bara aitani man luki iwi kabia, pât tara witin ra balbia apia.

²⁴ Upla sringwaskira ai mihta ba plit tara bilara dingkuya; kuna kli buki ai bîla kat sip brih balras.

²⁵ Saura dadaukra ra klala yabi ba wina, tânkas iwi uplika ba lan takisa; sinskira ba smalkanka ba baman wina lan takisa.

²⁶ Ai aisika ba rausauhkaia, ai yaptika sin kangbi latara saki ba, swira dauki daukanka baha luhpia ba swira daukaia sa.

²⁷ Luhpi, lawi dauki smalkanka tânka ba walaia apia swima kaka, sins lâka tânka yamni ba wina mamwahkma.

²⁸ Witnis bahki nani ba lika, lâ wapni aisi daukaia ba lawaska kikisa; bara upla watawikira bîla ba, saura lâka man aisisa.

²⁹ Bin dadaukra nani nina ba, dus ni prukan kaia dusa ba sin pat ridi daukan sa; prukanka nani sin, taniskira nani nina dusa dukiara sin ridi sa.