Sins Lâka 18 - DAWAN BÎLA AISKA

¹ Witin baman diara briaia luki uplika ba, ai kupia brinka man plikisa, bara upla wala nani smalkanka yamni dauki ba mapara aisisa.

² Upla taniskira diara tânka alkaia ba, lan takaia lukras sa; sakuna witin ai kupia ra dîa tânka bri ba baman luki aimayunisa.

³ Saurka lâka ba wal swira lâka aula; praut lâka wal, kulkanka âpu ba.

⁴ Upla bîla aisinka nani ba lika lî tihuka baku sa; sins lâka kârma pura laiwi ba, tingni tara aubi baku sa.

⁵ Aitani apia sa lâ uplika mita watawikira nani ra yamni munaia, bara pâtkas ra raitka yaras munaia.

⁶ Ai bîla aisinka nani ba mita taniskira ba trabil ra dimisa; ai bîla aisinka ni klala pain briaia makabisa.

⁷ Upla taniskira ai bîla ba mita sauhki tikan kabia, ai bîla aisanka ni nana ra kiwa mangkisa.

⁸ Dahra kwakwahkra bîla nani ba plun auhni pali baku sa, sakuna baha nani lika wan biara pali kat krauki auya.

⁹ Sringwaskira nani bara sauhki tatikra nani ba wal, ai muihni pali takisa.

¹⁰ Dawan nina ba tawer kum karnakira sa; upla kasakkira bahara plapi dimisa, ai kan kahbaika pliki brisa.

¹¹ Lalahkira ba lukisa ai dukia kukanka nani ba, ai kan kahbaika tawanka tara kum kutbi purara sunan sa.

¹² Waitna kupia praut pali taki ba wina bâk wan krikaia lâka takisa; kuna bawikira lâka ba wina, yamni wiaia lâka balisa.

¹³ Ani uplika diara aisi ba, pain kau walras pat pana mapara aisi ba, baha lika taniskira sa, ai swira tara sa sin.

¹⁴ Upla siknis swapan ba ai lukanka mita tâ baikuya; ¿sakuna lukanka kriwan ba ya mita buki twilkbia ki?

¹⁵ Sinskira nani ba bara diara tânka kaikaia pliki luki uplika ba, baha tânka ba pliki sakisa.

¹⁶ Witin prisant kum brih auya ba mita, dur nani ba sut kwâkuya, bara upla kulkanka bri ba kat auya.

¹⁷ Ya pas ai tâwan aisi uplika ba kasakkira baku sa; sakuna witin ai mapara aisi uplika ba aula ba bara param sakuya.

¹⁸ Lâ kasak pali dauki ba lika blahwanka nani takaskisa, bara dakbi sakisa ani daknika aiklabi ba ra.

¹⁹ Muihni nani ra mina prukan ba kau pâwisa wihki tawan karnakira kutbanka ba wal. Blahwanka ba dakbi sakisa, king watla ayan durka ba baku.

²⁰ Upla sturi ailal aisi ba ni ai biara banhwan takbia; ai un nani wina taki sahwan ba ni, witin aibanhbia.

²¹ Prura wih raya kaia wal ba wan twisa karnika mihta ra sa; bara baha lihki uplika baha mâ brih pibia.

²² Maya mairin pliki saki ba diara yamni sakisa: Dawan wina sin yamnika tara alkuya.

²³ Upla umpira ba diara makabi bîla nani ni aisisa; sakuna lalahkira ba ai bîla karna man aisisa.

²⁴ Wan uplika nani tila nani pat pali yawan wal dakwi takisa, sakuna wan uplika kumi bâra sa, wan muihni wal kau karna dutki wan alki ba.