Sins Lâka 12 - DAWAN BÎLA AISKA

¹ Pain, lâ kat iwi kaia smalkanka ra latwan kaiki uplika ba, sins lâka ra latwan kaikisa, wan kupia kraukanka ra waihla kaikaia ba lika, sins âpu lâka sa.

² Upla yamni ba, Dawan wina kupia yamni lâka saki bribia, sakuna diara saura nani luki waitnika ba, witinka bui pâtkira kulkbia.

³ Lâ watawi mita, upla sip dutki bapan kabia apia kuna kasakkira nani plamaika sip kitban kabia apia.

⁴ Mairin pain ai kulkanka tara bri ba ai maya waitna ra king baku daukisa, sakuna maya mairin saura ba sauhki âpu tikisa.

⁵ Kasakkira nani lukanka ba, lâ wapnika kat lukisa, rugkira nani ba, kunin lâka ra baman lukisa.

⁶ Upla watawikira nani bîla aisinka ba lika, mina alkaika kum sa; waitna kasakkira ba lika, swak takan lâka sa.

⁷ Rugkira nani ba kauhisa bara baha ba ai tnata mangkanka kabia, sakuna kasakkira nani watla ban bûi kabia.

⁸ Waitna ba ra mayunan kabia, witin sins lâka bri tânka praiska kat, kuna upla sinskas ba bahki kulki kabia.

⁹ Kau yamni sa bahki kulkbia, sakuna ai warkka daukaika brisa, wala kum aimayunisa, sakuna plun piaia âpu sa.

¹⁰ Upla kasakkira ba ai daiwra rayaka ba kulkisa, sakuna watawikira nani kupia ba karna pali sa.

¹¹ Insla warkka kasak dauki ba lika plun manis brisa, taniskira ba diara hilp sakaia apia nani ra baman taukisa.

¹² Brinka saura nani ra baman lukaia ba sika, watawikira nani iliska ba, sakuna kasakkira nani plamaika lika ban kabia.

¹³ Upla watawikira ba, ai kuninka aisi ba tilara aiblakwisa, sakuna kasakkira ba lika trabil saura wina swak takisa.

¹⁴ Waitna ba ai bîla wina yamni aisin mâ nani ba kriki brisa, bara sin dîa dauki ba kat ai mana brin kabia.

¹⁵ Upla taniskira ba lukisa witin diara sut dauki ba yamni baman sa, sakuna kupia kraukanka wali dauki uplika ba lika, sinskira sa.

¹⁶ Upla taniskira ai kupia sauhki ba mahka param sakisa, sakuna aman kaiki uplika lika lahtubanka ba uya lukras.

¹⁷ Kasak tânka aisi uplika ba kasakka lâka dahra aisi sakisa, sakuna witnis kuninkira maisa paki ba, kunin baman aisisa.

¹⁸ Upla tila nani aisi ba ispara wan sabi ba baku sa, sakuna sinskira nani aisanka ba lika hilp wankisa.

¹⁹ Wan bîla kasak tânka aisi ba ban kaia ra bâra kabia, sakuna twisa kuninkira lika piua kunhku baman dukiara sa.

²⁰ Baha nani diara saura luki paski ba kupia ra kunin man bâra sa, sakuna diara yamni luki ba kupia ra lika lilia lâka bâra sa.

²¹ Upla kasakkira pât kumi sin wauhbia apia, sakuna watawikira nani lika, diara saura nani ni aibanhwan kabia.

²² Upla kunin aisi ba Dawan bui saura pali kaikisa, sakuna kasak kat dauki banhwi ba, witin yamni lukisa.

²³ Aman kaiki uplika diara kaiki ba yukuki brisa, sakuna sinskas nani kupia lika tanis lâka upla sut ra maisa pakisa.

²⁴ Wark tatakra ba lika pura lui taiban kabia; sringwaskira ba lika taiban lâka ra kabia.

²⁵ Kupia wirha lâka mita upla spiritka ba batakisa, sakuna bîla yamni kumi, baha ba lilia sakisa.

²⁶ Kasakkira ba ai uplika ra yabal marikisa, kuna upla watawikira nani ba, ai yabalka ba wal kli aimawahkisa.

²⁷ Antin dadimra, sringwaskira ba sip daiwan alkras, sinskira watawiki waitnika ba yuya manakira ailal brisa.

²⁸ Kasakka lâka yabalka ra ba, rayaka bâra ba kat brih wîsa, taniskira yabalka ba lika, prura ra wan brih auya.