Sins Lâka 1 - DAWAN BÎLA AISKA

Sins lâka nani diara mana tara ba

¹ Salaman aisinka nani, Debit luhpia, Israel kingka.

² Sins tânka ba upla ra wiaia bara smalkaia bri ba: Baha tânka pana pana aisaia tâ baikaia, sins lâka bîla tânka tihu ra ba, aisi sakaia.

³ Sins lâka, kasakka lâka, wapni lâka daukaia tânka briaia;

⁴ sins lâka aitani briras wahmika nani ra âuya mâira kaia lâka yaia, diara tânka kaikaia lâka, diara ba lâka kaikaia sinska.

⁵ Ya sinskira bara lal swapni ba lika walbia, bara diara kau lan takaia plikbia,

⁶ sinskira nani aisinka nani ba tânka briaia, bîla nani aisan ba, witin nani daukanka ba, diara tânka nani pliki sakan patrangka ba briaia.

⁷ Dawan ra kulkaia lâka ba sins lâka tâ krikanka sika; taniskira nani ba, sins lâka bara diara wan smalkan ba bahki kulkisa.

Wahma nani ra kupia kraukanka

⁸ Luhpi waitna, aisikam mai smalki ba wals, bara sin yaptikam mai smalki ba, bahki kulkpara.

⁹ Kan man mampara prana kum painkira kabia: Sim lilura awa kum, apia kaka kraun kum baku.

¹⁰ Yang luhpi waitna, upla saurakira nani kunin mai munaisa kaka, ¡yarka kunin mai munbiara!

¹¹ Ban kra mai wibia kaka: “Kaisa, yang nani aikuki; ban kaiki kira ni, mina mangkaika kum mangkaia upla pâtkas lubia ba ra ikaia.

¹² Yawan upla lukanka wapni nani ba, raya langkbia, sim ya uplika raiti ra kauhuya ba ra, prura mita langki ba baku.

¹³ Yawan yuya sâtka bani ba bribia, yawan wan watla nani ba banhbia, diara nani upla wina implikan dukia nani ni.

¹⁴ Bal bara lukkam ba yang nani wal sir muns, bara sin sir muni kap lalah watla sut dukia ba wina.”

¹⁵ ¡Sakuna man lika witin nani wal wapara, luhpi waitna! Laihura taks ai yabalka saura nani ba wina,

¹⁶ kan witin nani saura lâka daukaia aihni munisa; ¡tala laikaia dukiara aihni tauki banhwisa!

¹⁷ Bahki pali kabia ai mina alkaika daukamna kaka, kan tnawira sut bahara latan kaikisa bamna,

¹⁸ baha uplika nani klauna tawi, ai mina ra alkaika kiwka nani paskisa, bara ai rayaka ba pât ra mangkisa.

¹⁹ Baku danh takisa, gridikira nani ba, ai gridika lâka mita tawi ikisa.

Sins lâka paiwanka ba

²⁰ Yabal ra bara wakpas bîla tara nani ra, sins lâka ba yaban walisa ai bîla baikra ba.

²¹ Ai lâka bîla ba, get dimaika ba wina upla sut ra wini maisa pakisa, tawan bilara kau upla ailal asla taki pliska nani ra:

²² “Sins tânka aitani briras wahmika nani, upla lawaska kakikra, nani bara taniskira nani ba, ¿ahkia kat sins tânka aitani briras lâka ba ra ban lihki kama, bara lilia sâkma lawaska kiki banhwi ba wina, bara sins tânka ra misbara kaikma?

²³ Yang smalkanki na wals, bara spiritki ni mai banhkamna; yang maikamna lukanki tânka briaia.

²⁴ Yang mita mai winri bara sin mai paiwri balma, sakuna man nani, yang ra walan mai daukras kan.

²⁵ Kau ni maipara bahki kulkram, yang kupiam kraukanka maikri ba, man brin mai daukras kan, yang smalkanki ba sin.

²⁶ ¡Bahamna yang kiki kamna, man nani pâtkam tara mai alkbia ba ra! ¡Sirang dring pruma bara yang lamwaska kiki kamni,

²⁷ man nani puramra sirang bara pât nani balbia ba ra, swapni taki bara kupiam wirha baman kama, sim pâsa tara kum baku diara nani sut ba sauhki tiki ba!

²⁸ “Baha yua ra ai winma, sakuna pana mai aisaras kamna; ai pliki banhma, sakuna ai sakras kama.

²⁹ Kan saura kulkisa sins lâka ra bara Dawan ra kulkanka yabaia want apia.

³⁰ Yang kupia kraukanka yabisna ba, brin daukras sa; yang smalkanki ba saura kulkisa.

³¹ ¡Ai daukanka tâka mita, pât wauhbia! ¡Saura daukaia lâka bri ba ni aibanhbia!

³² Sins tânka aitani briras nani ra, diara daukaia tânka luha ba mita ikisa, bara taniskira nani ra diara lukras ba mita sauhki tikisa.

³³ Sakuna yang ra ai wali uplika nani ba, kupia kumi lâka ra iwbia; bara pât briaia sip ba laihura kabia.”