Param Marikanka 5 - DAWAN BÎLA AISKA

Ulbi karban wauhkataya ba bara Sîp Luhpia ba

¹ King iwaika ra iwi ba mihta aihkika ra wauhtaya karban kum bri kan kaikri, bara baha bîla tani ra bara lata tani ra sin ulban kan, bara sîl 7 ni prakan kata.

² Insal karnakira kum kaikri, bara witinka ba ai bîla baikra tara ni wini, makabi wali kan: “¿Ya ba aitani sa sîl nani ba kriki, wauhkataya ba kwâkaia?”

³ Sakuna kasbrika purara, tasba ra, bara tasba mununhtara sin kumi âpu kan baha wauhkataya kwâki, bahara kaikaia sip kaia.

⁴ Bara yang uya ini kapri, wauhkataya ba kwâki kaikaia upla kumi sin aitani sip sakras kan bamna.

⁵ Bara almuk nani ba wina kum mita ai win: “Kau inpara. Kaiks Juda taika Layanka ba, witinka king Debit kiamka ba, baha ba pura luan sa, bara sip sa sîl 7 ba kriki wauhkataya ba kwâkaia.”

⁶ Bara king iwaika ba diara rayakira walhwal ba lilapas, almuk nani ba lilapas kat, Sîp Luhpia kumi bûi kan kaikri, baha ba ikan baku kata. Witin ba aringka 7 bara nakra sin 7 bri kan; baha Gâd spiritka nani 7 tasba aiska ra blikan ba.

⁷ Baha Sîpka Luhpia ba bûi wan, bara king iwaika ra iwi kan ba mihta aihkika wina baha wauhtaya ulbi karbi swin ba brin;

⁸ witin baha wauhkataya ba prak brin ba ra, diara rayakira walhwal ba bara almuk 24 ba, Sîp Luhpia ba mawan kat ai lula krikan. Witin nani sut arp kum bri kan, gul ni daukan kapka sin dus mâka kîa pain banhki bri kan, bara baha nani ba lika Gâd uplika nani pura sunra nani sa.

⁹ Witin nani naha lawana raya na aiwani kan: “Man lika wauhkataya ba briaia bara sîl nani ba krikaia sin aitani sip sma. Kan man lika mai ikan kata, bara tâliam ni yang nani na Gâd luhpia nani wisi wan atkram, taya sâtka bani wina, bîla sât aisi ba wina, nisan sâtka bani wina sin.

¹⁰ Witin nani ba wal king tasbaya kum prîs nani daukram, wan Gâdka warkka daukaia dukiara, witin nani tasba ra karnika alki bri kaia.”

¹¹ Baha ningkara kaikri, bara insal ailal bîla baikra walri; baha nani ba king iwaika ba kir, diara rayakira nani ba, bara almuk nani ba sut kir kata. Witin nani ba milian bara milian kan,

¹² bara ai bîla baikra karna ni aisin: “¡Sakripais daukan Sîp Luhpia ba aitani sip sa pura aimakan karnika nani sut ba briaia, sins lâka ba, baha kukan ba, pain kulkan lâka ba, prana ba bara mayunra ba sin!”

¹³ Gâd mita diara paskan nani ba sut sin walri, baha nani kasbrika purara ba, tasba ra ba, tasba mununhtara nani ba, kabu ra nani ba, bara baha nani ra kan ba sut naku aisi kan: “¡Mayunra ba, pain kulkan lâka ba, prana ba, karnika ba sin, king iwaika ra iwi ba ra yan kabia, Sîp Luhpia ba ra sin, ban kaia ban kaia ra!”

¹⁴ Diara rayakira walhwal ba naku aisi kan: “¡Baku kabia!” Bara almuk nani 24 ba ai lula krikan bara mayunan.