Oseas 13 - DAWAN BÎLA AISKA

Israel ba aiska sauhki tikan kabia

¹ Efraín uplika nani sturi aisi ba ra, Israel masraka wala nani ba mita kulkanka yabi ba tânka mariki kan; sakuna Efraín pruan witin pâtkira takan kan Baal ra mayunan tâka.

² ¡Bara witin takaskras ban saura daukisa! Ai silbarka ba slilki aidul nani paski brisa, baha papaskra nani, nahki paskaia aitani luki ba kat paskisa. Paskan ba ningkara aisisa: “¡Man nani bui witin ra sakripais dauki yas!”, bara upla nani ba baha aidulka nani bîp baku paskan ba ra kiawalisa.

³ Baha mita, witin nani titan mukuska baku kabia, lalma kahbi diwaska laya baku sin, titan pali pat lap tiwi ba, rais kapan taya pâsa brih pâli ba baku, kiasma kubus wina taki ba baku sin.

⁴ Dawan aisisa: “Yang, Dawan, yang lika man Gâdkam ban sna Idsip tasbaya ra kapram ba yua wina: Yang tnaiya ra Gâd wala, yang baku man kaikma apia, sakuna yang baman lika, kan yang baman sna, man swaki sasakrikam.

⁵ Yang main mai kaikri lapta baman upla iwras tasbaya nani ra.

⁶ “Sakuna man nani plun puram lui briram ba ra, kupiam lukra ba aibanhwan uba tara takan bara âmya ai tikram.

⁷ Baha ba mita, yang lika witin nani ra layan kum baku takamna, limi bulni kum baku yabal ra aihwaki kaiki kamna.

⁸ Wingku mairin kum ai luhpia nani tiwan ba baku, yabalka ra taki waisna, witin nani wal prawaia; witin nani kupia ba drusbamna. Layan kum baku, yabal kat witin nani ba alki pimna; daiwan wail kum baku, witin nani ba kalkamna.

⁹ Israel, mai sauhki tikaisna, upla kumi sin ai takaskbia apia.

¹⁰ ¿Kingkam ba nanara anira sa, tawankam nani bani ra swaki mai saki ba? ¿Tâm brabrira nani ba anira sa man nani makabatma baha nani kingkam, wihtkam nani aimaki kaia?

¹¹ Man nani ra kupi baiki, king nani maikri, bara man nani ra kupi baiki, kingkam nani ba mihtam dakbri.

¹² “Efraín watawi daukan ba ulbi swin sa; witin saura daukan ulbanka ba bâra sa.

¹³ Israel aisubi takaia piua ba aimakan, kuna tukta waitna skahwa aihwa kum ai wapnika ra aimakaia ba kat sin sip apia sa, aisubi takaia yabalka kat aimakaia.

¹⁴ ¿Prura tasbaya wina witin nani ba pri sakamna ki? ¿Prura wina witin nani ba swaki sakamna ki?... Prura, ¿anira sa, man karnikam sauhki wan tatikra ba? Prura tasbaya, ¿daukankam saura nani ba anira sa? ¡Naha uplika nani dukiara, kau kupi latwan bri kamna apia!”

¹⁵ Ban kra Israel, twi baku tangnika baiwi kabia sin, lalma payaska ba krawbia, pâsa karna upla iwras tasbaya wina krawi, bara lâkbia laya kârma nani ba, laya aubi nani ba sin lâwbia. Waihla ba bal, mana tara dukia nani kuki bri ba, sut brih wabia.

¹⁶ Sameria uplika nani, witin ai klalka ba bribia, ai Gâdka ba mapara buan bamna. Witin nani sord malika ra prubia, ai luhpia nani ba tasba ra lulki saban kabia bara mairin kwihra nani, biara ba klaki baikbia.