Mark 7 - DAWAN BÎLA AISKA

Upla ra tâski dauki dukia ba

¹ Parisi nani bara Lâ Smasmalkra nani sin, Jerusalem wina aidruban kan ba, Jisas lamara balan.

² Naha nani kaikan, Jisas disaipilka tila nani ai mihta sunu apia plun alki pi kan, baha tânka lika: ai mihta sikbaia lâka daukras; bara baha dukiara mapara aisin.

³ (Kan parisi nani bara Ju nani sut ai damika nani lâka ba nina bliki kan, baha lika ai mihta nani aima manis sikbras kaka, plun piras.

⁴ Bara atki watla wina aula piua ra, plun piras kan, kau ai natka ba kat ai mihta sikbras piua ra. Bara baku sin, natka wala nani brisa, diaia kapka nani, bukit nani, bras dakawa nani bara krikri nani ba sin sikbi kan.)

⁵ Bara parisi nani, Lâ Smasmalkra nani kira Jisas ra makabi walan: —¿Dîa kan disaipilkam nani, wan damika nani lâka ba kulkras, bara ai mihta nani sunu apia ban plun alki pîsa?

⁶ Jisas pana win: —Kasak prapit Aiseya mita man nani kuninkam dukiara aisin, ulban ba baku: ‘Naha uplika nani ai bîla baman ai kulkisa, sakuna ai kupia lika bahki sa.

⁷ Yang ra ai pura suni mayunbia ba bahki sa, kan ai smalkanka nani ba upla lâka man sa.’

⁸ Man nani lika Gâd lâka ba tnaya ra iki swi si, upla lâka nina ni blikisma.

⁹ Baku sin win: —Man nani lâmka nina bliki, Gâd lâka ba tnaya ra ni swisma.

¹⁰ Kan Moses win: ‘Aisikam bara yaptikam wal kulks’, bara ‘Ya ai aisika bara ai yaptika wal ra lahtubia kaka, mahka pruaia aitani sa.’

¹¹ Sakuna man nani bila upla kum ai aisika, apia kaka, ai yaptika ra naku wiaia sip sa wisma: ‘Yang sip hilp mai munras, kan dîa dîa brisna ba ‘‘corbán’’ sa’ (tânka lika: “Gâd ra prisantka yaban ba”);

¹² bara baku wisa kaka, man nani bila upla ba ai aisika bara ai yaptika ra sin hilp munaia apia sa.

¹³ Baku, man nani bui Gâd lâka ba bahki kulkisma, lâmka nani upla wala ra laki yabi ba mita. Bara diara wala bahmuna nani daukisma ba mita sin.

¹⁴ Jisas kli upla nani ra naku win: —Man nani sut yang ra wali, tânka sin bris.

¹⁵ Dîa dîa lata wina upla ra dimi ba, sip tâski daukras. Sakuna upla kupia wina taki ba lika, upla ra tâski daukisa.

¹⁶ [Man nani kiamam brisma ba, wali bas.]

¹⁷ Jisas lika upla nani ba swi si utla ra diman ba ra, ai disaipilka nani mita naha maprika tânka dukiara makabi walan.

¹⁸ Witin win: —¿Baku bamna, man nani sin tânka ba briras sma ki? ¿Walras sma ki dîa dîa lata tani wina upla ra dimi ba, sip tâski daukras?

¹⁹ Baha ba wan kupia ra dimras, sakuna wan biara ra lika, bara baha ningkara wan biara wina kli takisa. Jisas baku aisi marikan plun nani sut ba klin atia sa.

²⁰ Bara ban sin win: —Dîa dîa upla wina takuya ba lika, upla ra tâski daukisa.

²¹ Bîla tani wina, upla kupia wina taki ba lika: lukanka saura nani, rugka lâka, diara implikaia, upla ikaia ba,

²² marit lâka sauhkaia, upla wala dukia brin dauki ba, saura lâka nani, kunin lâka, brinka saura lâka ba, tuman lâka ba, upla nina aisaia, praut lukaia ba, sinskas kaia tânka.

²³ Naha diara nani sut na lika bîla tani wina aula, bara upla ra tâski daukisa.

Mairin tringsar kum Jisas ra kasak lukan ba

²⁴ Jisas baha wina Tiro tasbaya ra wan. Utla kum ra diman ba ra, upla sin yaka walbia want apia lukan, sakuna witin sip yukukras kata.

²⁵ Tisku mapa kan mairin kum ai luhpia pirit saura bri kan ba, witin dukiara walan, bara bal Jisas mina ra ai lula krikan.

²⁶ Mairka ba tringsar kata, Sirofenicia uplika. Bara bal Jisas ra makaban, pirit saura ba ai luhpia mairin wina sâkbia.

²⁷ Sakuna Jisas mita win: —Swis luhpia nani ba pas plun pibia; kan aitani apia sa luhpia nani britka dakbi yul nani ra yabaia.

²⁸ Mairin ba pana win: —Âu, Dawan, sakuna tibil munhtara yul nani bâra ba sin, brit yuya luhpia nani swin kauhi ba, brih pîsa.

²⁹ Bara Jisas bila: —Pain aisaram; bamna mahka was. Pirit saura ba pat luhpiam mairin wina takan sa.

³⁰ Bara mahka ai watla ra wan, ai luhpia mairin krikri ra aitniki kan, bara pirit saura ba pat witin wina taki wan kan.

Jisas bui kiama prawan bara sturi aisaras waitnika kum rakisa

³¹ Jisas kli Tiro tasbaya wina taki, Sidón bara 10 tawan (Decápolis) bâk wan, bara Galili lakunka ra balan.

³² Bahara waitna kiama prawra bara bîla skalwi aisi kum witin ra brih balan, bara ai purara ai mihta kahbia win.

³³ Jisas mita upla tila wina saki, tnaya ra bri si, ai mihta sirpika nani ai kiama ra dingkan, bara ai twisa ra yabalaya ni kangban.

³⁴ Bara kasbrika purara kaiki, ai wingka puhbi bara win waitnika ra: “¡Efatá!” (baha tânka lika: “¡Ilingwi bas!”)

³⁵ Ba kat, kiama nani ilingwan, ai twisa ba lanhwan, bara pain sturi aisi kan.

³⁶ Jisas adar yaban upla ra baha aisabia apia, sakuna baha wi kan ba ra, kau pali aisi kan.

³⁷ Bara witin nani tâ iwi, naku aisin: “Diara sut pain daukisa: ¡kiama prawan nani yan walisa, bîla skalwi aisi nani yan sturi aisisa!”