Libait Lâka 25 - DAWAN BÎLA AISKA

Ris briaia manka bara pri sakaia manka

¹ Sainai ilka ra Dawan bui Moses ra aisin, bara win:

² “Israel luhpia nani ra naku wis: Man nani ra tasba kum maikaia mai wîri ba tasbaya ra dimma ba ra, tasba ba insla daukaia apia, piua bâra kabia, Dawan ra pain kulki ba lâka.

³ Bamna man nani 6 mani insla dauki kama, 6 mani wain kiwka nani ba dauhbi mâ dakbi kama,

⁴ sakuna 7 mani ba, tasba ba ris briaia yama yang nini ra; baha manka aiska ba diara kumi sin daukma apia.

⁵ Plawar pat ai mâ bri ba sin dâkma apia, wain kiwka dauhbras kapram ba, man nani ba sin dâkma apia, tasba ba aitani ris briaia sa bamna.

⁶ Bamna tasba ris bribia bri piua ra, saumuk nani tasba ra bâra ba, silp pâwi kabia; man nani sut piaia patam sâkbia, albikam waitna bara albikam mairin nani pata. Wark uplika nani sut pata, tringsar nani man nani tilamra wark taki nani ba sut piaia pata mâ sâkbia,

⁷ bara daiwram tim nani, daiwan wail nani sut bâra kabia. Diara sut tasba wina pâwbia ba, man nani piaia aitani kabia.

⁸ “Man nani kulkaia sma 7 wik, mani kum ra. Bamna 7 mani ba 7 wik wal kulkaia, bara 49 mani,

⁹ bara kati 7 yua matawalsip ba, baha yua sika upla pâtka nani ba sut swih tikaia yua. Baha yua trumpit nani, sîp wainhka aringka ni paskan ba, puhbia Israel tasbaya aiska ra.

¹⁰ Man nani baku dauki upla sut ra wima, naha liliaka tara na sika 50 mani alkan ba, sunu daukaia liliaka yua. Upla pâtka nani, traska ba sut swih tikaia manka. Israel tasbaya aiska ra alba nani ba pri sakaia tasbaya nani dakbi brin ba kli yabaia.

¹¹ Mani 50 ba pri sakaia lâka daukaia manka; baha manka ra man nani insla daukaia apia, plawar mangkras kan silp pâwi nani ba dâkaia apia, wain mâ nani wahbaia apia, dauhbaia sin apia,

¹² pri mai saki sunu daukan manka, bamna wain nani insla daukma apia, sakuna tasba wina dîa pâwbia ba baha baman pima.

¹³ “Naha manka na sika pri mai sakan manka, man nani sut kli tasbayam ra bal karnikam alkaia.

¹⁴ Israel ra upla kum wina tasba ba atkma kaka, apia kaka witin bui man wina atki bribia kaka, witin wal lâ kat taiban âpu lâka ra dauks.

¹⁵ Ya tasba briaia atkisa kaka, 50 mani alkan piua ba wina kulki atkaia sa, pri sakan manka ba wina. Bara dawanka ba mani bani tasbaya ba wina mâ saki kaia ba piua ba sin kulkbia. Bara ai tasbaya mana ba,

¹⁶ kau mani bani tasbaya wina mâ dakbi kaia piua kulkbia ba, mani ailal kaka praiska kau tara kulkaia; sakuna piu prahni baman mâ krikaia sa kaka, mana ba kau sirpi sa.

¹⁷ “Upla kum upla wala ra, lâ kat apia taiban wina dukia dakbi bripara, yamni kulkisma ba mariks Gâdkam lâka ba. Yang sika man nani Dawan Gâdkam.

¹⁸ Yang lâika nani ba alki dauks, adarki nani ba dauki bas. Lâika ba dauks bara man nani tasbayam ra pain kama.

¹⁹ Tasbayam wina dusam nani mâ manis maikbia, bara man nani âmyapah iwi banhwi kama.

²⁰ “Ban kra man nani makabi walma kaka: “¿Yawan dîa pibia 7 mani ba aimakbia ba ra insla ra saumuk mangkras, mâ daikras kabia kaka?”

²¹ Mani 6 aimakbia ba piua ra, yang yamniki man nani ra blikamni, bara namsla wina mani yumhpa pi kaia maikamna;

²² bara baku namsla wina man nani saki suni swima ba wina pi kama, bara mani raya 8 ba kli baha wina saumuk mangkma, bara 9 mani kat kau ban kama apahkram ba disang mâ nani dâkma ba kat.

²³ “Tasba atki uplika ba lukbia, tasbaya ba ban kaia ra witin ai dukia kabia. Man nani tasbaya ba ra wapi taukaia baman kama man wamtla ra baku.

²⁴ Baku bamna, man nani tasba kum atki briram ba piua balbia taim, tasbaya ba dawanka ra kli atkaia raitka ba tikaia apia sma.

²⁵ “Man nani uplikam kum diara âpu takan bara ai tasbaya pîs kum mai atkan kaka, witin ai taya kum kau ai aslika ba bal tasbaya ba kli atki bribia.

²⁶ “Sakuna ai tasbaya atkan waitnika ba ai taya âpu sa kaka, witin lalah apahkaia sa bara ai tasbaya ba kli atki bribia.

²⁷ Bamna tasba atkan uplika ba, kulki kabia piua nani ba, ai tasbaya aibapbia, bara witin ai tasbaya ba kli bribia.

²⁸ Sakuna tasbaya dawanka ba sip lalah aitani apahkras sa kaka, ai tasbaya sip kli atki bribia apia. Baku kaka ya atki brin ba ban bri kabia, kli 50 mani wala alkbia kat lâka ba wapni daukbia.

²⁹ “Upla kum tawan bilara ai watla atkbia kaka, witin ai raitka brisa atkan yua ba wina mani kum kat, ai watla ba kli atki briaia.

³⁰ Watla ba kli atki briras kabia kaka mani kum kat, watla ba uplika atkan ba mihta ra, ai kiamka nani mihta ra ban takaskbia, witin ai watla kli atki briaia raitka ba âpu kabia, mani 50 kat sin witin ai raitka âpu kabia ai watla kli briaia ba.

³¹ Sakuna tawan bilara apia watla nani ba, dawanka nani sip sa ai watla kli atki briaia 50 mani alkbia ba kat pri sakaia.

³² “Libait nani ba lika piu bani ai raitka brisa ai watla kli atki briaia, tawan bilara ai watla nani bri ba.

³³ Tawan bilara Libait kum ai watla bri ba atkbia kaka, bara kli atki briras kabia kaka, 50 mani alkbia ba ra, atki brin uplika ba wina kli dawanka Libait nani baman Israel tilara utla brisa, tawan bilara baha witin nani baman ai tasbaya Libait watla ba yabia.

³⁴ Libait nani tawanka lamara daiwan nani pata twi pâwi tasbaya ba, Libait nani dukia sa. Baha tasbaya ba atkaia apia, baha witin nani ra yan.

³⁵ “Man nani kiamkam tilam wina kum diara âpu takan, umpira sa kaka, bara witin ba man ra hilp pliki aula ba ra, hilp munaia kama upla tringsar kum baku, bara man wamtla ra plis yama.

³⁶ Diara lin munma ba, kau pura praki briaia kulkpara; baku daukaia watlika ra, Gâdkam sibrinka brisma ba mariks, uplikam baku wamtla ra bris.

³⁷ Lalah lin munma kaka, kau pura praki bripara, plun yaram mana ba kau praiska sunpara.

³⁸ Yang sika man nani Dawan Gâdkam, Idsip wina mai sakatna ba, Kenan tasbaya maikaia bara man Gâdkam kaia.

³⁹ “Man nani kiamkam kum diara luha, umpira taki man ra balan atki briram ba man wal kabia kaka, alba kum baku lika wark dingkpara.

⁴⁰ Yamni muns warkkam tatakra kum baku, uplikam baku, man warkkam taki kabia 50 mani pri sakaia manka alkbia kat.

⁴¹ Bara witin, ai luhpia nani sut wamtla wina taki kli ai taya nani tilara wabia bara ai damika nani tasbaya bribia.

⁴² Witin nani ba yang albiki sa, yang bui Idsip wina mai sakri, bara alba baku atkan kabia apia.

⁴³ Saura munan lâka daukpara; ban sakuna, Gâd ra sibrin lâka bris.

⁴⁴ “Man ba alba waitna bara alba mairin nani atkaia want sma kaka, nisan wala wina atki bris.

⁴⁵ Sip sma tringsar nani man nani tilamra bâra ba atki briaia, bara luhpa nani baikbia sin tawankam ra iwi ba, man sip sma witin nani ba atki briaia, albikam ban kaia dukiara.

⁴⁶ Baha nani ba, man pruma sin ban swiaia luhpiam nani albika kaia, witin nani warkka taki ban kabia. Sakuna man nani wina kumi sin kiamkam Israel luhpia nani ra taibi munan lâka, saura munaia lâka daukpara.

⁴⁷ “Upla tringsar kum man nani tilamra iwisa, bara lalahkira takbia kaka, bara muihkam witin lamara iwi ba umpira diara âpu takbia kaka, bara witin pri lâka bri ba tringsar ba ra atkbia kaka,

⁴⁸ umpira takan ba ai raitka brisa ai pri lâka bri ba kli atki briaia. Atkan ba ningkara, sip sa ai muihni kum baha atkaia,

⁴⁹ tahtika kum, muihnika kum, bara ya kau ai lamara ba sin sip sa pri sakaia, yabal nani brisa kaka.

⁵⁰ Baha waitnika pri sakan lâka ya atki brin ba ra wih walbia, bara atkan manka piua ba wina kulkbia, 50 mani wala alkaia manka ba kat; bara mani bani wark takuya ba nahki prais mana taki ba sin kulkbia, bara baku uplika ba mana aibapan kabia.

⁵¹ Kulki kaikbia, atkan lalahka witin ra yabaia ba wina bara mahka aibapbia.

⁵² Sakuna 50 mani pri sakaia manka ba pat klutka sa kaka, dîa yabaia bri ba sut yabia.

⁵³ Wark uplika ba, mani kumi wark takaia pramis daukan sa kaka, rausauhkaia wisi wark karna takaia yabaia apia sa.

⁵⁴ “Naha lâka nani dauki uplika nani ba pri sakan lâka yaras kabia kaka, pri swiaia manka ba alkbia taim, pri swibia witin ai luhpia nani sut aikuki,

⁵⁵ kan Israel luhpia nani ba yang albiki nani, yang pali albiki nani sa; yang bui Idsip wina witin nani sakri. Yang sika man nani Dawan Gâdkam.