Libait Lâka 19 - DAWAN BÎLA AISKA

Sunu bara wapni kaia lâka nani

¹ Dawan ba Moses ra aisi, naku win:

² “Israel luhpia nani ra naku wis: “Man nani holi kama, kan yang, Dawan Gâdkam, holi sna baku.

³ “Man nani kumi bani papikam bara yaptikam pain kulki kama, “Ris briaia yui nani ba sin kulki kama. Yang sika man nani Dawan Gâdkam.

⁴ “Aidul nani nina bliki wapara, bras aidulka nani sin paskpara. Yang sika man nani Dawan Gâdkam.

⁵ “Wal kli uplika takaia sakripaiska nani Dawan ra yaia daukisma ba, pain dauks, Dawan yamni kaikaia brin dauki ba kat.

⁶ Sakripais daukan daiwra ba baha yua piaia sa, wîna kau swin ba yauhka kat piaia sin sip sa, sakuna yu yumhpa kat wîna ba sut angkaia sa.

⁷ Yu yumhpa kat, baha ba kau brisa bara pibia kaka, saura pali kulkan kabia, Dawan baha aitani yamni kulkan kabia apia.

⁸ Ya baha wîna pibia ba watawi lâka mana ba twilkbia, upla nani tila wina sin mawan tikbia, Dawan yamnika ba tâski daukan bamna.

⁹ “Insla ra mâ dâkaia piua balbia ba ra, man nani ba sut wahbi bripara, dîa ninamra luan ba swis bara kli tawi wih bripara.

¹⁰ Wain nasla ra mâ nani kauhan ba, kli pliki wahbi bripara; swis baha umpira nani, upla tringsar nani bal bribia. Yang sika man nani Dawan Gâdkam.

¹¹ “Man nani implikpara. Man nani kunin aisapara, pana pana kunin munpara.

¹² “Yang nini mâki pramis kunin daukpara, kan Gâdkam nina sauhkisma. Yang sika Dawan.

¹³ “Uplikam mapara saura munaia lukpara, diara bri ba dukiam wisi mihta dakpara. “Warkkam takan ba mana yauhka kat aibappara.

¹⁴ “Kiama prawan nani ra saura wipara. “Blain yabalka ra mina prukaika kumi sin mangkpara. Yamnikam ba Dawankam ra mariks. Yang sika Dawan.

¹⁵ “Lâ kat upla lâka daukisma ba ra, kli warha daukpara: upla mita kulkras ba ra sin tâ baikpara, karnika tara bri nani ra sin bawpara. Sakuna lâka ba kasakka lâka dauks.

¹⁶ “Upla nina aisi taukpara. “Man uplikam ikaia lâka dauki ba tilara dimpara. Yang sika Dawan.

¹⁷ “Muihkam mapara kupiam ra saura luki kapara. “Lawi dauks uplikam ra, lawi daukaia aitani sa kaka. Sakuna witin saura dauki ba tilara kapara.

¹⁸ “Uplikam mapara pana munaia kupiam saura lâka daukpara. Uplikam ba latwan kaiks man wînam baku. Yang sika Dawan.

¹⁹ “Lâika nani ba alki dauki bas. “Daiwram nani ba, daiwan wala ai sâtka apia ba wal yarka taibiara. “Namsla ra saumuk sât sât miks dauki mangkpara. “Kwala mapla sât sât daukan ba dimpara.

²⁰ “Waitna kum waitna wala albika mairin wal yapbia kaka, sakuna kau atki briras kaka, kau pri apia sa bara naha mairin ba klala yabaia sa; sakuna ikaia apia, kan mairin ba pri apia bamna, sakuna baku daukan ba mana aibapbia.

²¹ Waitnika ba sîp kum brih wabia Dawan mawanra, saurka daukan ba sakripaiska daukaia, Dawan wal aisaia tintka watla ra.

²² Baha sîpka ni waitnika pâtkira takan ba saurka mana, prîs ba Dawan ra ai pura sunbia, pâtka ba swih tikaia dukiara, bara baha saurka daukan pâtka ba ban swih tikbia.

²³ “Man nani baha kuntrika ra dimma ba ra, dus mâ piaia dusa nani ba mangkma, sakuna dus nani ba klakma apia, mâ nani sin pima apia, mani yumhpa alkbia ba kat.

²⁴ Mani walhwal alkbia ba kat, man nani ba sut dakbi, Dawan ra prisantkam yabi lilia daukma.

²⁵ Mani matsip kat bâra lika man nani baha mâ nani ba piaia sip kama, bara baku dus nani ba sin ai mâ kau ailal maikbia. Yang sika man nani Dawan Gâdkam.

²⁶ “Wîna ba tâlia ba wal ban pipara. “Yapi smaya kaikaia bara yu wala dîa takaia ba wiaia warkka daukpara.

²⁷ “Tâmwa ba dauhbi sunpara, unam maya tâ ba sin klakpara.

²⁸ “Upla kum pruan ba ra luki tamya ra klakpara. Tamya ra lilka sât sât sin daukpara. Yang sika Dawan.

²⁹ “Luhpiam mairin ba rug mairin takbiara, swirka ai swira daukbiara. Kuntrikam ba rug lâka bara saurka lâka ni banhki daukpara.

³⁰ “Man nani sabat yui nani ba kulki bas, holi pliska lâka ba yamni kulki bas. Yang sika Dawan.

³¹ “Pirit saura wal aisi, yapi kaiki uplika ra man nani wapara, witin wal aisi tâski takmara sîa. Yang sika man nani Dawan Gâdkam.

³² “Upla almuk mawanra, wapni bûi lakula wis. Dawan ra kulki ba tânka ba mariks. Yang sika Dawan.

³³ “Tringsar nani man nani tilamra iwi ba ra saura munpara.

³⁴ Man nani uplikam kum baku yamni munma, latwan kaiks. Luki bas man nani sin tringsar katma Idsip ra. Yang sika man nani Dawan Gâdkam.

³⁵ “Diara paun ra mangkisma ba ra, skwir alkisma ba ra, lain mangki kulki kaikisma ba ra upla ra kunin munpara.

³⁶ Diara sut aitani kat daukaia dukiara, paun ba, skwir ba, lain ba briaia sma. Yang sika man nani Dawan Gâdkam, Idsip wina mai sakri ba.

³⁷ “Baku bamna, yang lâika nani bara adarki nani ba kat alki man nani sut baku dauks. Yang sika Dawan.”