Libait Lâka 15 - DAWAN BÎLA AISKA

Waitna siknis, sunu apia ba

¹ Dawan mita Moses bara Eran ra aisi, naku win:

² “Israel luhpia nani ra naku wis: Waitna kum wîna pîska wina likia baku takisa kaka, tâski pali kulkaia sa.

³ Witin ai wîna ba wina laya takisa, apia kaka laya ba takras prakisa kaka, baha mihta tâski kulkan sa.

⁴ “Witin ani pliska ra aitniki yapbia ba baha sut tâski takan sa, bamna tâski kulkisa. “Ani anira iwbia kaka, baha dukia sut ba tâski kulkan kabia.

⁵ “Bara upla wala, ya ya kra baha waitna aitnikan ba pliska ra kangban sa kaka, ai kwalka ba tuskaia sa, witin sin aihtabaia sa bara ban tâski kulkan kabia tihmia kat.

⁶ “Bara upla wala ya baha waitna iwan ba pliska ra iwbia kaka, ai kwalka ba tuskaia sa, witin ai taya sin pain sikban kaia sa, bara ban tâski kulkan kabia tihmia kat.

⁷ “Bara upla wala ya baha uplika tâski ba ra kangbia kaka, ai kwalka ba tuskan kaia sa, ai taya ba sin pain sikbaia sa bara ban tâski kulkan kabia tihmia kat.

⁸ “Uplika tâski ba mita upla wala ra ai yabalaya tuhbia kaka, baha uplika ai kwalka ba tuskaia sa, bara aihtabaia sa, sakuna ban tâski kulkan kabia tihmia kat.

⁹ “Tâskikira ba iwaia pliska kum ra iwbia ba, tâski kulkan kabia.

¹⁰ “Ani uplika kabia, baha uplika likia baku bri ba iwan pliska ra kangban sa kaka, tâski kulkan kabia ban tihmia kat. “Bara ya baha dukia nani ba kum brih wabia kaka, witin ai prâka ba tuskbia, bara ban tâski kulkan kabia tihmia kat.

¹¹ “Likia bri uplika ba ai mihta sikbras upla wala ra alkbia kaka, uplika ai prâka ba tuskbia bara aihtabi takbia, sakuna ban tâski kulkan kabia tihmia kat.

¹² “Baha uplika sumi ra kangbia kaka, sumika ba baikan kabia; sumika ba dus ni paskan kaka lika, sikbi sâkbia.

¹³ “Baha waitnika ba ai sikniska ba pain klin takbia kaka, baha klin takan yua ba wina yu 7 kulkbia. Bara witin ai kwalka ba tuski lî kârma wina panhkan laya ba ni aihtabi klin takbia.

¹⁴ Bara yua 8 ba butku lupia wâl, apia kaka butku tara wâl brih, Dawan wal aisaia tintka watla ra wabia, Dawan kaiki ba ra daiwra nani ba prîs ra yabaia.

¹⁵ Bara prîs ba baha bribia, bara butku kum ba saurka mana sakripaiska daukbia; butku wala ba aiska angkbia, waitnika tâski ba klin takaia sakripaiska, baha sut Dawan kaiki ba pliska ra daukbia.

¹⁶ “Waitna kum mâka laya takan ba ra, aiska aihtabi takaia sa bara yu aiska tâski kulkan kabia ban tihmia kat.

¹⁷ “Baha laya ba kwala ra, apia kaka daiwan taya kum ra buswan sa kaka, lî ni sikban kabia, bara yu aiska tâski kulkan kabia ban tihmia kat.

¹⁸ “Waitna kum mairin kum wal yapbia kaka, wâlsut aihtabi klin takbia, sakuna ban yu aiska tâski kulkan kabia tihmia kat.

Mairin sikniska tânka sunu apia ba

¹⁹ “Mairin kati siknis bri ba, yu 7 tâski kulkan kabia. “Diara witin alkan ba sin tâski kulkan kabia ban tihmia kat.

²⁰ “Kati sikniska bri ba piua ra ani anira aitnikbia kaka, baha sin tâski kulkan kabia ban tihmia kat. “Ani pliska ra iwbia kaka, baha sin tâski kulkan kabia ban tihmia kat.

²¹ “Ani uplika baha mairka aitnikan pliska ra kangban kabia kaka, witin ai kwalka ba tuskan kabia, ai wîna tara ba sin aihtabi takbia, ban tâski kulkan kabia tihmia kat.

²² “Ani uplika kra baha mairka iwan pliska ba ra kangban sa kaka, witin ai kwalka ba tuskan kaia sa, ai wîna tara sin aihtabi taki klin takaia sa, sakuna ban tâski kulkan sa tihmia kat.

²³ Mairin prawi kan bara iwi kan ba pliska ba ra sin ya kangban ba, witin ai kwalka tuskaia sa, aihtabi sin takbia, ban tâski kulkan sa tihmia kat.

²⁴ “Waitna kum baha mairka wal yapbia kaka, waitna ba tâski kulkan sa witin wal baku, bamna waitna ba yu 7 witin nani prawan pliska ba sin tâski kulkan kabia.

²⁵ “Mairin kum kati sikniska ai piua kat bri takaski ba, bara tala ba takaskras ban piua luisa kaka, apia kaka kati piua kat apia ban piua apia kan tala plapi sip takaskras ba, tâski kulkan sa, witin ai katka sikniska bri ba baku.

²⁶ “Mairka ba ani pliska nani ra yapan ba, iwan ba kati sikniska bri kan piua ra, baha tâski pali kulkan sa, mairin ba ai katka sikniska bri ba baku.

²⁷ “Ani uplika baha dukia nani ra kangbia kaka, tâski pali kulkan kabia. Witin ai kwalka ba tuskan kabia, ai wîna tara sin aihtabi klin sakan kabia, ban tâski kulkan kabia tihmia kat.

²⁸ “Tâlia ba takaskbia ba wina kulki kabia yu 7 kat, baha ningkara klin takan kaia sa.

²⁹ Bara yu 8 kat butku sirpi wâl, apia kaka butku wâl brih, Dawan wal aisaia tintka watla ra wabia.

³⁰ Prîs ra baha yan kabia, bara butku kum ba saurka mana sakripaiska yabia. Wala ba aiska angkbia uplika ba sunu sakaia altarka ra Dawan lamara witin kaiki ba ra,

³¹ bamna baku Israel luhpia nani, man nani tâski ba wina laihura wama. Diara tâski kulkan ba dauki tâski takma apia, baku sin pruma apia, yang altarki lamara mai kaikisna ba pliska ra.”

³² Naha lâka nani sika likia laya taki baku kli taki ba, baha mihta tâski kulkan sa;

³³ bara mairin kati brisa piua nani ra takaskisa, baku laki kaikan kabia waitna bara mairin wal ban kati brisa piua ra wal prawi piua ra sin.