Kulki Kaikanka 8 - DAWAN BÎLA AISKA

Lamp nani angki watlika ra swiaia

¹ Dawan ba Moses ra aisi, naku win:

² “Eran ra wis, lamp nani ba angkbia ba ra, ingnika ba param ra kabia lampka mina ba mawanra.”

³ Bara Eran ba Dawan win ba baku daukan, lamp ba angki watlika ra suni param ra swin.

⁴ Lamp sunaika watla ba gul ba amar ni pruki tisbi paskan. Dawan bui Moses ra nahki daukaia smalki win ba, baha lilka kat lamp watla ba paskan.

Libait nani ba sunu sakan

⁵ Dawan ba Moses ra aisi, naku win:

⁶ “Libait nani ba Israel luhpia nani tila wina aihka sâks, bara saurka swih tiki sunu dauki aik.

⁷ Naku natka ra baha dauks: sikbi klin sakaia laya ba wal baha nani ba purara sriks, bara yas ai mina wina ai lal kat tamaya sut kusbi sâkbia, bara ai prâka ba sin tuskbia bara baku klin taki banhbia.

⁸ Baha ningkara bîp wainhka sirpi kum bri balbia, ai prisantka baku sin plawar kau pain ba wirâ lat laikan ba akbia, bara baku plun mâ prisantka daukbia, bara kli bîp wainhka sirpi wala kum bribia, baha ni saurka swih tikaia sakripaiska daukbia.

⁹ Bara Libait nani ba, man paiwma witin nani sut asla takaia tintka watla lamara balbia, bara Israel luhpia nani daknika aiska ba yarka asla takbia.

¹⁰ Bara Libait nani ba Dawan altarka mawanra bal bûi banhbia ba ra, Israel luhpia nani mita Libait nani purara ai mihta nani kahbia.

¹¹ Baha ningkara Eran mita Libait nani ba Dawan mawanra mangkbia bara baku Libait nani ba Israel luhpia nani mita ai prisantka baku yabia Dawan ra ai warkka daukaia.

¹² Bamna Libait nani mita bîp wainhka sirpi nani ba purara ai mihta nani kahbia, bara kumi ba saurka swih tikaia sakripaiska daukaia dukiara kabia, wala ba lika aiska angki yaia dukia, baha ba Libait nani saurka swih tikaia dukiara kabia.

¹³ Bara Eran lupia nani mawanra brih wama, bara witin ba ai warkka daukbia yang ra aikaia.

¹⁴ Baku Libait nani ba Israel lupia nani tila wina aihka saki aikma, witin nani ba yang duki kabia.

¹⁵ Baha ningkara Libait nani ba tint watla ra wabia witin nani bahara sunu wark daukaia, bara prisantki kum baku dauki aikma,

¹⁶ kan Israel luhpia nani tilara Libait nani ba aiska pali mihti ra mangkan sa. Israel luhpia nani tilara tawahkia bani aisubi taki ba, witin nani ba yang ra aikisa, tawahkia nani sut ba yang bâk saki briri sa.

¹⁷ Kan tawahkia nani sut Israel luhpia nani tilara ba yang bâk saki briri sa, upla nani bara daiwan nani tawahkia ba sut sin. Idsip ra tawahkia nani sut ikri ba yua ba wina, yang bui witin nani ba laki bâk saki briri.

¹⁸ Bamna Libait nani ba bâk saki briri sa, Israel luhpia nani tawahkia nani ba watlika ra.

¹⁹ Bara Libait nani ba Israel luhpia nani tila wina prisantki baku Eran ra ai luhpia nani ra yâri, bara tintka watla ra Israel luhpia nani nina ra wark dauki kaia, bara Israel luhpia nani ba yaka Dawan wal uplika takaia lâka ba alkbia, baku sin Israel luhpia nani tilara klala briaia âpu kabia, Israel luhpia nani holi pliska lamara wabia piua ra.”

²⁰ Bamna Moses bara Eran wal, Israel luhpia nani sin daknika aiska ba Libait nani dukiara Dawan mita Moses ra win daukan ba kat aitani kulkan.

²¹ Bara Libait nani ba sunu taki banhwan, bara ai kwalka nani sin tuski banhwan, bara Eran mita prisant baku Dawan lamara witin kaiki ba ra mangkan; bara Eran mita baha nani ba sunu daukan, saurka swih tikaia prisantka ba daukan.

²² Baha ningkara Libait nani ba mahka tintka watla ra aidrubi wan ai warkka ba daukaia, Eran ai luhpia nani wal mawanra witin nani adarka ra. Dawan bui Moses ra dîa daukaia win ba kat Libait nani wal baku witin nani wal daukan.

Libait nani wark daukaia piua ba

²³ Dawan ba Moses ra aisi, naku win:

²⁴ “Libait nani ba, 25 mani alki ba wina Dawan tintka watla ra wark daukaia diman kabia,

²⁵ bara 50 mani alkbia ba ra wark tara nani daukaia ba swibia.

²⁶ Sakuna ai muihni nani ra hilp muni wark dauki kabia, tint watla ra, sakuna wark pali lika daukbia apia. Baku Libait nani wal daukbia, ai warkka dauki ba piua ra.”