Kulki Kaikanka 6 - DAWAN BÎLA AISKA

Nasariu lâka nani ba

¹ Dawan ba Moses ra aisi, naku win:

² “Israel luhpia nani ra naku wis: Waitna sapa bara mairin sapa Nasariu takaia lukbia kaka, Dawan dukia kaia wisi,

³ wain diaia apia, swahni taki laya sâtka kum sin diaia apia, binigar bara wain wina diara swahwan kisni taki ba wina dauki ba sin diaia apia, wain mâ raya bara lâwan sin piaia apia.

⁴ Nasariu ba piua sut ra dîa dîa wain kiwka wina dauki ba, dus mâ sirpi nani bara dus mâ taya dingkan nani sâtka ba pibia apia.

⁵ Nasariu kulkan ba piua wina, witin ai tâwa ba sin klakan kaia apia sa, sakuna swika pâwi ban kabia. Witin Dawan dukiara baman sunu ban kaia sa, ahkia baha piua aimakaia win ba aimakbia ba kat.

⁶ Dawan dukia wisi bâk sakan ba piua sut ra, upla pruan lamara waia apia sa,

⁷ ai aisika, ai yaptika, ai muihni, apia kaka ai lakra prubia sin apia, tâski takaia apia dukiara, kan witin blestu Dawan dukiara sunukira ban iwi kaia sa.

⁸ Nasariu ba piua sut ra holikira kabia Dawan mawanra.

⁹ “Ai dahra walras kan ai lamara upla kum prubia kaka, ai tâwa holi ba tâski kulkan kabia. Baku bamna, klin takaia piua ra ai tâwa ba aiska klakan kabia, yu matlalkahbi pura kumi alkbia ba ra irban kabia.

¹⁰ Bamna yu matlalkahbi pura wâl alkbia ba ra butku sirpi wâl, apia kaka butku tara wâl brih balan kabia prîs ra, asla takaia tintka watla dimaika ra.

¹¹ Bara prîs ba baha nani wina butku kum ba bribia bara saurka swih tikaia sakripaiska ba daukbia; bara wala ba lika aiska angkaia sakripaiska dukiara kabia, bara upla pruan ra alkan ba pâtka ba swih tikaia daukbia. Bara baha yua ba witin ai tâwa ba sin kli Dawan mihta ra mangkbia,

¹² bara Nasariu ba baha yua wina ai lâka ba kli sunu kulkbia Dawan uplika sunu kaia dukiara. Tâura witin dîa pramis takan, luan piua ba kli kulkbia apia, kan ai tâwa Dawan ra yaban kata ba tâski takan bamna, baha daukaia witin sîp wainhka kum watawan âpu ba brih balbia ai saurka swih tikaia ba dukiara.

¹³ “Bamna Nasariu ba ahkia kat ai piua ba danh takaia win ba, baha piua ba aimakbia ba ra tint watla dimaika ra balbia.

¹⁴ Bara witin ai prisantka Dawan ra yaia sa sîp wainhka kum, pat mani kum alkan ba aiska angkaia prisantka yabaia, sîp mairin kum ba saurka ba wina pri sakaia sakripaiska daukaia, sîp wainhka kum pat mani kum bri ba sakripais daukaia kli wal uplika takaia dukiara; daiwra nani sut ba sunu, taya sauhkan âpu kaia sa.

¹⁵ Baha purkara plawar kau pain îs mangkras batana laiki akbi brit daukan ba baskit kum brih balaia sa; dus wahia sâtka nani ba sin îs mangkras, batana laya ni srikbi, plun mâ sâtka nani prisantka ba bara wain sin brih bal ai prisantka yabaia sa.

¹⁶ Bara prîs mita baha sut Dawan ra yabia, bara saurka mana kîa yamni ba ra daiwan aiska ba sin angki yabia.

¹⁷ Bara sîp wainhka ba, kli wal uplika takaia sakripaiska baku dauki yabia, baha wal brit nani îs mangkras daukan baskitka ba sin, bara plun mâ sâtka nani prisantka bara wain sin.

¹⁸ Bamna Nasariu ba tintka watla dimaika kat tâwa klakbia, bara tâwa nani ba brih baha kupia kumi daukaia prisantka mununhtara pauta klauhi ba ra amaia mangkbia.

¹⁹ Baha ningkara prîs ba sîp wainhka nina dusa wîna piakan ba bribia, bara baskit bîla wina brit îs âpu daukan ba kum bribia, bara turtiya îs âpu daukan ba sin kum bribia, baha sut Nasariu ba mihta ra yabaia, witin ai tâwa ba pat kusbi sakan kabia ba ningkara.

²⁰ Bara prîs baha nani sut ba prisant kumi wauhi baku Dawan mawanra mangkan kabia, baha dukia nani ba lika prîs ba dukia kabia holi, baha purkara, lama dusa pîska bara kuhma wîna ba aihka sakan ba sin. Baha sut ningkara Nasariu ba wain diaia sip kabia.

²¹ “Naha sika ya witin aiska Dawan mihta ra aimaki, Nasariu takaia pramis taki uplika ba lâka, naha purkara witin kau dîa sip ba kat yabia, dîa yaia win ba kat daukbia Nasariu takan lâka ba kat.”

Prîs baha yamnika ba upla ra yaia lâka ba

²² Dawan ba Moses ra aisi, naku win:

²³ “Eran luhpia nani ra sin wis: Witin nani aisi, naku Israel luhpia nani ra baha yamnika ba yabia:

²⁴ “Dawan ai yamnika ba maikbia bara kainam kahbi kabia;

²⁵ Dawan ai nakra yamni brih mai kaikbia, bara ai yamnika sin mai marikbia;

²⁶ Dawan latwan mai kaikbia, bara kupia kumi lâka sin maikbia.”

²⁷ “Bamna witin nani baku yang nini ba Israel luhpia nani purara aisabia, bara yang mita yamniki ba yamna.”