Kulki Kaikanka 5 - DAWAN BÎLA AISKA

Tâski nani ba laihura sakaia adarka

¹ Dawan ba Moses ra aisi, naku win:

² “Israel luhpia nani ra wis: Lipar bri uplika nani ba sut upla tila wina laihura saki swibia, tala plapan sikniska bri nani ba sin, bara upla pruan wîna ra kangban uplika nani ba sut sin.

³ Waitna kabia, mairin kabia sin, upla tila wina saki latara lulkan kabia, baku baha nani tilara yang takaskisna ba.”

⁴ Bara Israel luhpia nani bui baha nani sut upla nani tila wina latara sakan. Dawan mita Moses ra win ba baku, Israel luhpia nani ba daukan.

Sauhkan ba mana aibapaia sa

⁵ Dawan ba Moses ra aisi, naku win:

⁶ “Israel luhpia nani ra wis: Waitna sapa, mairin sapa Dawan ra kasak lukras ba mita upla mapara saurka nani daukbia kaka, witin nani Dawan mawanra lâ lui sauhkan sa.

⁷ Bamna baha uplika saura daukan ba ai dahra sâkbia, bara aibapaia sa. Bamna witin ya mapara saura daukan, diara sauhkan ba mana ba kulki saki, kau baha purara kli mânka matsip ba pura praki, bara yaka baha sut uplika ba ra aibapbia.

⁸ Sakuna baha dukia dawanka, lalahka briaia uplika ba pruan sa kaka, ai taya kum ai lamara baha briaia âpu sa kaka lika, baha mana aibapan ba Dawan ra yabia, prîs warkka ra yus munaia dukiara. Sakuna prîs ba sîp iki, uplika pruan ba saurka swi tikaia sakripaiska daukbia.

⁹ “Prisantka nani sut Israel luhpia nani Dawan ra yaban ba, baha lika prîs briaia sa.

¹⁰ Diara bani sunu kulkan Dawan ra yan ba, baha prîs ra brih aula ba, baha lika prîs briaia sa.”

Ai maya nakra prakan tâwan lawanka lâka ba

¹¹ Dawan ba Moses ra aisi, naku win:

¹² “Israel luhpia nani ra naha wis: Mairin kum ai maya waitna nakra prakbia kaka,

¹³ waitna wala wal mairka ba yapbia, maya waitna baha nu âpu kan kaka, daukanka ba dauki tâski takan ba, upla kum sin nu âpu yukuwan ra ban sa kaka,

¹⁴ bahmuna lâka mita waitna ba ai maya tâwan lawaia sip sa. Sakuna mairin ba pâtkas kabia sin, waitna ban tâwan lawaia sip sa.

¹⁵ Baha sât lâka ba waitnika ba ai maya prîs ra brih balbia, bara barli mâ plawarka sin paun walhwal pura bri balbia, sakuna plawarka ra batana laikaia apia, dus nani mâka sin laikaia apia kîa pain daukaia, kan baha ba tâwan lawan sakripaiska dauki bamna; baha ba sakripais kum daukisa, saurka pura prakan ba param ra sakaia mata.

¹⁶ “Bamna prîs bui mairka ba yaka bal Dawan altarka lamara bubia,

¹⁷ bara prîs ba lî tâski âpu sunu daukan ba wina sumi kapka kum ra laiki bribia, bara tint watla tasbaya ba wina yamhpuska ba brih laya ba ra mangkbia.

¹⁸ Bara mairin ba yaka Dawan mawanra bal bubia, bara mairin lal pura prakaika ba sâkbia, bara saurka pura bikan ba pura sakaia sakripaiska ba ai mihta ra mangkbia, bara prîs ba lika lahtubaia laya lî tahpla ba ai mihta ra bri kabia.

¹⁹ Bara prîs ba mairin ba ra yaka aisabia sturi kasak ba, bara wibia: ‘Man waitna wala wal yapras bara man mayam ra nakra prakras mâ kaka, lahtubaia laya tahpla na dima bara man ra diara saura takbia apia.

²⁰ Ban sakuna, man mayam wina tnaya ra takram bara tâski sin takram sa kaka, bara waitna kum man mayam apia ba wal aitnikram sa kaka,

²¹ Dawan mita lahtubia upla nani ba man ra mai kaiki kabia, upla sut mawanra plauyam puskbia, luhpiam ba sin skahwa takbia.

²² Bamna naha lahtubaia laya nani na man dima bara biamra bilara iwi wabia bara baku takbia.’ Bara pana mairin ba wibia: ‘Baku kabia.’

²³ “Bara prîs ba naha aisin na lahtubanka nani ba wauhtaya kumi ra ulbia, bara lî tahpla ba ni ulbanka ba sikbi sâkbia.

²⁴ Bara baha lahtuban laya nani ba mairin ra yabia diaia, bara lahtuban tahplika nani ba mairin ba biara bilara iwi wabia tahpla daukaia.

²⁵ Baha ningkara prîs ba mita mairin ba mihta wina bribia, baha tâwan lawan sakripaiska Dawan yaia dauki ba, bara sakripaiska ba altar purara kahbia.

²⁶ Bara prîs ba baha prisantka ba wina ai mihta banhki bribia, baha ba kupia kraukaia mata, altar ra angkbia. “Bara baha angkan laya ba sin mairin ra yaka dibia.

²⁷ Bamna laya ba dibia ba ra, mairin ba tâski takan sa kaka ban kra ai maya nakra tihmu, waitna wala wal yapan kaka, bara lahtuban warkka dauki laya nani ba mairin biara ra iwi wabia tahpla daukaia, bara biara ba puskbia, bara luhpia ba sin lasa luhpia baku takbia, bara mairin ba upla nani tilara lahtuban kabia.

²⁸ Ban sakuna, mairin ba tâski takras, pâtkas klin sa kaka, witin ai luhpia pain baiki kabia.

²⁹ “Naha sika tâwan lawi lâka ba daukaia lâka, ani piua ra mairin ba ai maya waitna nakra praki waitna wala wal yapbia bara tâski takbia, bara ai maya tâwan lawbia kaka.

³⁰ Ban kra maya waitna ba ai maya mairin tâwan lawbia kaka, Dawan mawanra brih wan kabia, bara prîs mita naha lâka nani na sut daukan kaia sa.

³¹ Waitna ba lika watawi lâka sut ba wina pâtkas kabia, bara mairin ba lika ai saurka twilkbia.”