Kulki Kaikanka 23 - DAWAN BÎLA AISKA

¹ Bamna Balaam bui Balac ra win: —Man nani nâra 7 altar paski, bîp wainhka 7, sîp wainhka 7 bri sal aik.

² Balaam dîa aisin ba Balac daukan, bara witin nani wâl altar kumi bani purara bîp kum, sîp kum angkan.

³ Baha ningkara Balaam bui Balac ra win: —Man nâra bas sakripais nani na lamara, yang wih kaikaisna Dawan ba yang ra aisaia aula sapa. Ningkara mai wimna dîa witin ai wibia ba. Bara Balaam kiuhsi kum ra yakan uli wan,

Balaam bui Israel luhpia nani ra yamni munisa

⁴ bamna bahara Gâd Balaam ra latan takan, bara Balaam aisi, win: —Yang altar 7 paskri, bara altar kumi bani purara bîp wainhka lupia kumi sîp wainhka kumi angkri.

⁵ Bara Dawan, witin dîa aisaia kan ba Balaam un ra mangkan, bara witin ra win: —Man kli Balac ra was, bara dîa wiaia mai wîri ba wis.

⁶ Balaam kli tawi wan bara kaikan Balac ai altar ba lamara bûi kan, Moab uplika nani witin wal tauki nani ba sin.

⁷ Bara Balaam dahra aisaia bîla na aisin: “Lalma tasbaya ilka nani wina, Aram wina Moab kingka Balac mita ai brih balan. ‘Bal —ai win—, Israel luhpia nani ra lahtubanka yas, Jekob uplika nani ra sin wima ba aitani kabia sapa nu âpu sna.’

⁸ Sakuna, ¿nahki yang mita saura wimna, Gâd mita saura wiras ba? ¿Nahki saura kulkma Dawan mita saura kulkras ba?

⁹ Naha walpaya tara nani pura wina kaikisna, kiuhsi pura wina sin kaikisna: baha uplika nani ba ai mânka bâra iwisa, uplika nani ba nisan wala nani wal baku apia sa.

¹⁰ Witin nani ba ailal tasba yuya baku sa; ¿ya ba sut kulkaia sip sa ki? ¿Ya sip sa baha numbika ba kulki sakaia? ¡Yamni kaia kan, baha waitnika kasakkira pat pruan ba baku pruri kata, yang pruamna bara witin nani wal baku kamna!”

¹¹ Bamna Balac Balaam ra makabi walan: —¿Man dîa daukisma? Yang mai bri balri waihli nani ra saura wiaia, bara man lika yamni ni wisma.

¹² Bara Balaam pana win: —Yawan wal baku aisisata apia, Dawan dîa aisaia ai wibia ba baha baman aisamna.

¹³ Sakuna Balac pana win: —Kaisa yawan plis wala ra wap, baha wina witin nani ai watla ba baman kaikaia sip kama, bara baha kaiki lahtubi aik.

¹⁴ Bara Balac bui Balaam ba Sofim twiya ra brih wan, Pisgá ilka bahna ra; bahara altar 7 paskan bara bîp wainhka 7, sîp sin 7 angkan.

¹⁵ Bahara Balaam Balac ra win: —Man nâra bas sakripais na lamara, yang bukra wamna Gâd wal aisaia.

¹⁶ Dawan Balaam wal aisaia wan, bara witin dîa aisaia kan ba Balaam un ra mangkan. Baha purkara witin ra win: —Man kli Balac ra was bara dîa mai wîri ba baku, witin ra wis.

¹⁷ Balaam kli tawi wan, bara kaikan Balac sakripais ba lamara bûi kan, Moab wina almukka nani ba sin witin wal kan. Bara Balac bal witin ra makabi walan: —¿Dawan dîa mai win?

¹⁸ Bara Balaam bahara aisaia bîla na aisin: “Balac, Sipor luhpia, aisisna na aman pali yang ra wals.

¹⁹ Dawan ba lika upla baku apia sa: witin kunin aisaras, witin dîa lukan ba sip lakras sa. Witin dîa daukaia aisi ba daukisa. Pramis daukan kaka, witin ai pramiska daukaia win ba kat daukisa.

²⁰ Yamni wiaia adarka ba yang brisna; Gâd mita yamni munisa kaka, yang mita sip mapara aisaras.

²¹ Israel luhpia nani tilara kunin aisi watawi dauki uplika ba âpu sa, Jekob uplika nani ba. Ai Dawanka ai Gâdka ba witin nani wal sa, bara witin nani bui witin ra winisa ai kingka ra baku.

²² Witin nani Idsip wina sakan Gâdka ba witin nani wal sa, tâwan aiklabisa bara bîp bul tara aringka ba baku sa.

²³ Jekob ra saura munaia tânka âpu sa, Israel mapara buaia sukia lâka ba bahki sa, bamna nanara Israel naku wiaia sa: ‘¡Israel, aima an Dawan ba man nani wal wark aihkakira nani pat daukan ba!’

²⁴ Baha uplika nani layan baku sirang ikisa, witin nani takaskaia apia ai mapara bûi ba sut âpu daukbia ba kat, ai waihla nani tâlia ba sut dibia.”

²⁵ Bara Balac bui Balaam ra win: —¡Man naha uplika nani ra lahtubras sma kaka, baku sin yamni munpara!

²⁶ Bara aisin ba mapara, Balaam mita pana win: —¿Pat mai wiras katna ki Dawan dîa ai wibia ba, baha baman aisaia sip sna?

²⁷ Bara Balac pana win: —Bal, kaisa plis wala ra waia. Ban kra baha wina Gâd yamni kaikbia, Israel luhpia nani ra saura wiaia.

²⁸ Bara Balac ba Balaam wal Peor ilka bahna ra uli wan, baha wina upla iwras tasbaya ba aiska kaiki kata.

²⁹ Bahara Balaam mita Balac ra win: —Nanara altar nani 7 paskma, bara bîp wainhka 7, sîp wainhka 7 bri sal aik.

³⁰ Balac lika Balaam mita dîa daukaia win ba kat dauki yan, bamna altar kumi bani purara bîp kum bara sîp kum angkan.