Kulki Kaikanka 20 - DAWAN BÎLA AISKA

Walpa wina lî takan ba

¹ Mani tâ kriki katka ra, Israel luhpia nani sin upla iwras tasbaya ra wan. Cadés ra piua wiria takaskan, bara bahara Meri pruan, bamna bahara bikan.

² Upla nani ba lî âpu kan, bara sut asla aidruban, Moses bara Eran wal mapara aisaia.

³ Bara Moses ra aisi banhwan: —¡Yamni kaia kan, Israel uplika wala nani Dawan mita ikan ba, yang nani sin aikuki prui banhri kan kata!

⁴ ¿Man nani dîa muni Dawan uplika nani ba naha upla iwras tasbaya ra bri balram ki? ¿Dîa man nani brin mai daukisa yang nani bîpki nani sin sut prui tiwbia?

⁵ ¿Dîa muni Idsip tasbaya wina wan saki naha tasbaya saura ra wan bri balram? Nahara insla daukaia sip apia sa, nahara sin kwah damni dusa nani âpu sa, wain nasla sin âpu sa, dus mâ sât wala sin âpu; baha purkara lî diaia kat sin âpu.

⁶ Moses bara Eran wal, upla nani ba wina taki Dawan wal aisaia tintka watla dimaika ra wih buan. Bahara witin nani ai lal makupan ban ai mawan tasba kat kangban. Bara Dawan prana ba latan takan,

⁷ bara Dawan bui Moses ra win:

⁸ —Kîn ba bris, man muihkam Eran sin tâm baikbia, bara upla nani ba asla dauks. Baha ningkara, upla sut mai kaiki ba ra, walpa ba ra aisas lî baha wina takbia, bara kaikma lî ba takbia, bara upla nani ba ai daiwra nani aikuki lî di banhbia.

⁹ Dawan bui Moses ra adar yaban ba baku, witin Dawan mawan wina kîn ba brin.

¹⁰ Baha ningkara Moses bara Eran wal upla nani ba sut walpa tara ba lamara waia paiwan, bara Moses bui witin nani ra win: —Kiamapara nani, yang ra ai wals. ¿Dîa naha walpaya na wina lî saki maikrika di banhwaia lukisma ki?

¹¹ Naku aisin ba ningkara, Moses ai mihta bukan bara kîn ba ni walpa ra aima wâl prukan, bara lî ailal takan. Baku upla nani ba ai daiwra nani aikuki lî din.

¹² Ban sakuna, Dawan bui Moses bara Eran wal ra win: —Baku man nani kasak ai lukras, Israel luhpia nani mawanra mayunra aiki banhras kapram bamna, naha uplika nani ra baha tasbaya yâri ba ra aikuki dimi banhma apia.

¹³ Naha sika Meribá laya kârma, bahara sin Israel luhpia nani bui Dawan mapara aisin, bara witinka mita witin holi ba tânka marikan.

Edom mita Israel luhpia nani ra swin luras kan

¹⁴ Cadés ba wina, Moses maisa papakra nani blikan Edom kingka ra wiaia: “Man muihkam Israel luhpia nani, man ra ai bîla bliki mai wisa: ‘Man kaikisma nahki pât nani ailal yang nani maipara takan ba.

¹⁵ Wan almukka nani Idsip ra wih mani ailal bâra iwan; sakuna Idsip uplika nani yang nani ra saura ai munan, wan almukka nani ra sin.

¹⁶ Bamna yang nani Dawan ra makabri yabal kumi saki aikbia, bara witin wan inanka ba wali, insal kum blikan Idsip wina wan sakaia, bara baha mita sika yang nani nâra sna, Cadés tawanka ra man nani tasbayam piarkika ra.

¹⁷ Bamna mamkabi banhwisna, tasbayam piarkika bâk wan swis lui banhwamna, insla mangkan nani bâk, yang nani luamna apia, wain nasla nani bâk sin apia. Liwanhtikam nani wina lî sin di banhwamna apia, impakaia yabalka bâk baman lui banhwamna, tnaya ra sin tawi banhwamna apia, tasbayam piarkika ba luamna kat.’ ”

¹⁸ Sakuna Edom kingka ba pana win: —¡Tasbayi piarkika bâk sin lupara; luma kaka, aiklaklabra nani aikuki mampara wamna!

¹⁹ Israel luhpia nani ba tânka kau param win: —Yang nani yabal bâk lui wamna, bara yang nani, daiwri nani kra, lamyawanhta nani wina lî di banhwamna kaka, yang nani aibapamna. Diara kumi baman brin ai daukisa, tasbayam piarkikam bâk luaia.

²⁰ Sakuna Edom kingka mita win: —¡Man nani bâk sin lui wama apia! Bara Israel luhpia nani wal prawaia, aiklabaia uplika karnakira nani aikuki mapara taki wan,

²¹ ai tasbaya piarkika pali bâk yaka luaia apia ba mata. Bamna Israel luhpia nani yabal wala plikan.

Eran pruan ba

²² Israel luhpia nani sut Cadés wina taki impakan, Hur ilka tani ra waia.

²³ Bahara, Edom tasbaya piarkika lamara, Dawan mita Moses bara Eran ra win:

²⁴ “Eran ba prubia, Israel luhpia nani ra tasba yaia wîri ba ra dimbia apia, kan Meribá laya kârma lamara man nani bîli lulkram.

²⁵ Bamna, Moses, man mita Eran luhpia Eleazar wal ba brih was Hur ilka purara;

²⁶ bahara man prîs prâka Eran dimi ba, daiki saki ai luhpia Eleazar ra yas dimbia. Eran lika bahara prubia.”

²⁷ Bamna Moses, Dawan dîa win ba baku witin daukan. Israel luhpia nani sut kaiki kan, witin nani Hur ilka ra uli wan.

²⁸ Bahara wan ba ra Eran prîs prâka dimi kan ba Moses mita daiki, ai luhpia Eleazar ra yan diman. Bara baha ilka bahna ra Eran ba pruan; bara Moses Eleazar wal il bahna ba wina bal iwan.

²⁹ Eran pruan ba Israel luhpia nani walan, bara yu 30 Eran pura mata ini banhwi kan.