Kulki Kaikanka 2 - DAWAN BÎLA AISKA

Ai watla mâkaia lâka ba

¹ Dawan mita Moses ra bara Eran ra aisi, naku win:

² “Israel luhpia nani lika Dawan wal aisaia tintka watla ba kir ai watla mâkbia, kiamka kumi bani ba yakan, ai luhpia nani aikuki bara ai plakinka lamara iwbia ai watla nani ra.

³ “Juda plakinka bri aiklaklabra nani impaki ba lalma tani ra ai watla nani ba mâkbia. Juda uplika aiklaklabra nani wihtka ba lika Nahasón, Aminadab luhpia ba,

⁴ upla nani kulkan numbika ba kat, 74,600 aiklaklabra bri kan.

⁵ Baha nani lamara Isacar uplika aiklaklabra nani ba takaskbia, witin nani wihtka kan Natanael, Suar luhpia ba,

⁶ bara upla nani kulkan numbika ba kat 54,400 aiklaklabra nani bâra kan.

⁷ Baha nani lamara Zabulón uplika aiklaklabra nani ba, Helón luhpia Eliab witin nani wihtka ba,

⁸ upla nani kulkan numbika ba kat 57,400 aiklaklabra nani bri kan.

⁹ Baku natka ra Juda uplika nani ai watla mâkan ba, aiklaklabra daknika yumhpa bri kabia, upla sut ba 186,400 aiklaklabra nani, witin nani tâura wapi kabia.

¹⁰ “Waupasa tani ra aiklaklabra nani Ruben plakinka bri impaki ba bâra kabia. Ruben uplika aiklaklabra nani wihtka ba Elisur, Sedeúr luhpia ba,

¹¹ upla nani kulkan numbika ba kat 46,500 aiklaklabra nani bri kan.

¹² Witin lamara ai watla nani mâkbia, Simian kiampka aiklaklabra daknika ba, baha nani wihtka ba Selumiel Surisadai luhpia ba,

¹³ upla nani kulkan numbika ba kat 59,300 aiklaklabra nani kan.

¹⁴ Baha nani lamara Gad kiamka nani ba ai watla mâkbia, baha nani wihtka sa Eliasaf, Reuel luhpia ba,

¹⁵ upla kulkan numbika ba kat 45,650 aiklaklabra nani kan.

¹⁶ Baku natka ra Ruben kiamka nani sut kulkan numbika ba lika 151,450 aiklaklabra nani sa. Daknika yumhpa nani bri kabia, tâura wapi ba daknika ninara naha nani wapi kabia.

¹⁷ “Baha upla daknika walhwal ai daknika kat utla nani mâkan ba lilapas kat, Dawan wal aisaia tintka watla ba Libait nani ba twilki impaki kabia. Daknika walhwal ba kumi bani ba tint watla ba twilki impaki kabia, daknika walhwal ba kumi bani ai plakinka buki ai nina pura kat impaki kabia.

¹⁸ “Muna tani ra aiklaklabra nani Efraín kiamka nani ba ai watla makbia. Efraín plakinka bri wihtka ba Elisamá, Amihud luhpia ba,

¹⁹ bara upla nani kulkan numbika ba kat 40,500 aiklaklabra nani sa.

²⁰ Witin nani lamara Manasés kiamka aiklaklabra nani ba ai watla mâkbia, witin nani ai wihtka ba Gamaliel, Pedasur luhpia ba,

²¹ upla nani kulkan numbika ba kat 32,250 aiklaklabra nani sa.

²² Benjamín kiamka nani ba sin, baha nani lamara ai watla mâkbia, baha nani wihtka ba Abidán, Guidoní luhpia ba,

²³ bara upla nani kulkan numbika ba kat 35,400 aiklaklabra nani sa.

²⁴ Baku natka ra Efraín kiampka ba aiklaklabra daknika yumhpa ra baiki sakan sa, bara kulkanka asla sut ba 108,100 aiklaklabra brisa. Aiklaklabra daknika pas tâura bara ningkara ba ninara impaki wapi kabia.

²⁵ “Yahbra tani ra aiklaklabra nani Dan plakinka bri impaki nani ba, ai watla mâkbia. Dan luhpia aiklaklabra nani wihtka ba Ahiézer, Amisadai luhpia ba,

²⁶ upla nani kulkan numbika ba kat 62, 700 aiklaklabra nani kan.

²⁷ Witin nani lamara Aser kiampka nani ai watla mâkbia. Aser luhpia nani wihtka Paguiel, Ocrán luhpia ba,

²⁸ upla nani kulkanka numbika ba kat 41,500 aiklaklabra nani kan.

²⁹ Neftalí kiamka ba sin baha nani lamara ai watla mâkbia. Neftalí luhpia nani wihtka ba lika, Ahirá Enán luhpia ba,

³⁰ upla kulkan numbika ba kat 53,400 aiklaklabra nani kan.

³¹ Naha natka ra Dan kiamka nani ba aiklaklabra daknika yumhpa asla kabia, aiklaklabra nani 157,600 nani sa. Witin nani lika lâs ra wapi kabia ai plakinka brih.”

³² Israel luhpia nani, upla sut kulkanka ba 603,550 aiklaklabra nani kan.

³³ Ban sakuna, Libait nani ba lika Israel luhpia nani kulkan ba tilara kulkras kata, Dawan mita Moses ra win ba baku.

³⁴ Bamna Israel luhpia nani baku daukan, dîa Dawan mita Moses ra daukaia win ba kat. Baku witin nani kumi bani ai plakinka ba lamara takaski kata, bara baku witin nani sin wapan ai taya nani ba aikuki, ai aisika uplika ba aikuki.