Kli Smalkanka 5 - DAWAN BÎLA AISKA

Lâ nani Matawalsip ba

¹ Moses bui Israel luhpia nani sut asla paiwi, win: “Wals, Israel uplika, lâ nani naiwa maisam pakaisna ba. Pain lan taks, bara trai kaiki dauks.

² “Dawan wan Gâdka, lâ kum daukan Horeb ilka ra yawan aikuki.

³ Wan damika nani aikuki baman daukras, sakuna yawan nani naiwa nâra aikuki asla takan nani ra sin.

⁴ Dawan il ra man nani wal aisin, ai mawan kat pauta klauhan lilapas wina.

⁵ Baha piua ra yang Dawan wihki man nani wal tilamra wal kapri, kan man nani pauta ami ba kaiki sibri kapram bara sip il ra ulras katma. Bara Dawan naku win:

⁶ ‘Yang sika man Dawan Gâdkam, Idsip tasbaya ra alba kapram ba wina mai sakri ba.

⁷ ‘Man bui yang tnaiya ra gâd wala nani bripara.

⁸ ‘Aidul nani kumi sin dauki bripara, diara nani purara bâra ba lilka sin apia, diara nani tasba ra bâra ba lilka sin apia, diara nani kabu ra bâra ba, kabu mununhtara bâra ba lilka sin apia.

⁹ Baha nani mawanra bawpara, mayunra sin dauki yapara. Yang sika man Dawan Gâdkam, nini tâwan lalawra sni. Baha nani misbara ai kaiki banhwi nani ba luhpia nani ra, mulika nani, snawika nani kat sin klala yabisna bamna,

¹⁰ sakuna baha nani latwan ai kaiki, lâ yabri ba kat dauki nani ba, kiamka tausin nani ra latwan kaikisna.

¹¹ ‘Dawan Gâdkam nina ba diara bahki lâka daukaia dukiara brih mâkpara, kan witin ai nina diara bahki daukaia dukiara brih mâki nani ba, klala yabras ban pâtkas swibia apia sa bamna.

¹² ‘Ris yua ba man kulki bas, Dawan ra kulkanka yabaia yua ba. Dawan ai adarka mai win ba baku.

¹³ Yu matlalkahbi ba man wark takma bara diara sut daukaia brisma ba baha yua nani ra dauks.

¹⁴ Bara yu 7 yua ba lika ris yua, wark takaia apia yua ba, Dawan Gâdkam ra kulkanka yabaia ris yua ba. Baha yua ra wark sâtka kumi sin daukpara, luhpiam waitna, luhpiam mairin, albikam waitna, albikam mairin, bîpkam nani, birikukam nani, daiwram wala nani, upla wala tawankam ra takaski nani ba sin apia, albikam waitna, albikam mairin ba sin ris bribia.

¹⁵ Kupiam krauki bas man nani Idsip ra alba katma ba, bara Dawan Gâdkam ai karnika tara bri ba baha wina mai sakan. Baha mita Dawan Gâdkam bui adar maikan ris yua ba kulkaia.

¹⁶ ‘Man aisikam bara man yaptikam sin pain kulki bas, Dawan Gâdkam adarka mai win ba baku. Baku man piuam yari bri kama, bara diara sut man ra yamni takbia Dawan Gâdkam wina maikuya ba tasbaya ra.

¹⁷ ‘Man lâ luha upla ikpara.

¹⁸ ‘Man marit lâka sauhkpara.

¹⁹ ‘Man implikpara.

²⁰ ‘Man uplikam witniska kunin aisi pât ra lakpara.

²¹ ‘Man uplikam maya mairin tumpara. Uplikam watla ba man wamtla baku brin mai daukbiara, nasla ba, ai albika waitna, ai albika mairin, ai bîpka wainhka, ai birikuka, diara wala nani sut ba man dukiam briaia brin mai daukbiara.’

Tawan sibrinka

²² “Naha bîla nani sika Dawan ai bîla baikra tara ni aisin pauta klauhan lilapas wina, mukus tila wina, upla sut il playa munhtara banhwi kan piua ra. Ningkara baha wina kau sturi aisaras, bara naha bîla nani walpa tanta wâl ra ulbi aikan.

²³ Sakuna man nani baha bîla baikra walram tihmia tila wina taki bali kan ba, il ba kaikram kiasma baman man nani sut kiamka nani wihtka bara almukka nani, bali banhwan yang wal aisaia.

²⁴ Bara baha nani ai win: ‘Kasak pali Dawan wan Gâd ba ai prana karnika sin wan marikan, ai bîla baikra yang nani walri, pauta klauhan lilapas wina taki kan ba. Naiwa yawan kaikan Gâd upla ra aisi ba, bara naha nani pruras sa.

²⁵ Ban sakuna baku sa kaka, ¿yawan dîa muni naha pata klauhan ra ami pruaia sibri kaia? Kli Dawan wan Gâdka bîla baikra walbia kaka, yawan prubia.

²⁶ Bamna, ¿upla kum bâra sa ki, sip kabia Dawan rayakira bîla baikra walaia pauta klauhan lilapas wina aisisa ba ra, yang nani walri ba baku, bara witin pruras raya kaia?

²⁷ Kau yamni sa man lamara was, bara Dawan wan Gâdka mai wibia ba sut wals, baha ningkara dîa mai win ba yang nani ra ai wima. Dîa wan wibia yang nani daukamna.’

²⁸ “Man nani bui yang ra aisi kapram piua ra Dawan wali kan, bara ai win: ‘Naha uplika nani dîa mai win ba yang sut walri, bara yang maipa ra pain kata.

²⁹ Aitani kabia baku natka ra ban luki kaia, bara ai kulki lâika bîla nani sin yu bani ra ban bri kaia. Witin nani ai rayaka, ai luhpia nani rayaka sin yamni bribia.

³⁰ Wih wis witin nani kli tawi ai tintka watla ra wabia;

³¹ sakuna man lika yang wal nâra takasks, kan lâ nani bara diara daukaia lâka nani ba sut mai smalkaia sna, baha kuntrika ra dimi dawanka takma ba ra lâka nani ba dauki kama.’

³² Baku bamna trai kaiks, Dawan man nani Gâdkam bui adar maikan ba, baha wina tnaya ra tawpara.

³³ Dawan Gâdkam yabal mamrikan ba baha nina blîks, yamni wama dukiara, mani ailal sin raya kama tasba man dukiam maikaia win ba ra.