Kli Smalkanka 34 - DAWAN BÎLA AISKA

Moses pruan bara bikan ba sturka

¹ Moab upla iwras tasbaya wina, Moses Nebo ilka ra ulan, baha lika Pisgá ilka Jeriko mawan kat yaba. Bahara Dawan bui Galaad tasbaya ba ban Dan tasbaya kat marikan,

² Neftalí, Efraín bara Manasés tasbaya nani bâra ban Juda tasbaya aiska sut ban Mediterráneo kabuka ba kat,

³ Négueb wina Jordan tasbaya yahpika aiska, Jeriko sila dusa nani tawanka ba wina ban Sóar kat.

⁴ Bara Dawan bui witin ra win: “Naha kuntrika sika yang bui Ebraham ra, Aisak ra bara Jekob kiamka nani ra sin yabaia swer takri ba. Man lika dimma apia, sakuna laih wina kaikma.”

⁵ Dawan aisin ba kat, baku Moses Gâd napakanka ba Moab tasbaya ra pruan, Dawan baku wisata ba kat.

⁶ Bara Moab tasbaya pîska langnika kum ra bikan Bet-peor lalmika ra, naiwa kat baha pliska upla kaikras sa.

⁷ Mani 120 alkan, pruan ba kat; ai nakra bara ai wîna tara sin ban pain kan.

⁸ Israel luhpia nani ba Moab tasbaya upla iwras ra kati kum ini kan Moses pura mata, baku ai sarka lâka ba tnata alkan pruan ba dukiara.

⁹ Bara Jasua Nun luhpia ba, Moses wina sins lâka ba brin, bamna Moses ai mihta nani witin purara kahban; bamna Dawan bui Moses ra aisin ba baku, Israel luhpia nani witin bîla wali daukan.

¹⁰ Israel ra prapit wala âpu kan, Moses baku Dawan wal ai mawan kat aisi kan ba,

¹¹ wark aihkakira nani Dawan mita yaban daukan Idsip ra king fero mapara, ai suliarka bara ai kuntrika aiska ra sin,

¹² ai karnika ba marikaia baha nani nakra ra diara tara nani daukan kaikan ba ni sin Israel luhpia nani ra.