Kli Smalkanka 33 - DAWAN BÎLA AISKA

Moses bui Israel kiamka nani ra yamni munisa

¹ Moses Gâd waitnika ba pruaia lamara, Israel luhpia nani ra yamni munan,

² naku natka ra: “Dawan ba Sainai ilka wina aula; Seír wina yawan ra ingwan. Parán ilka nani wina ingwan bara Meribá-cadés wina ban kitwisa; ai aihkika ra pauta klauhan lâ ba brih yawan ra aula.

³ Dawan lika ai uplika nani ra latwan kaikisa, sunu takan nani ba main kaikisa; witin nani sin ai mina ra bawisa bara ai adarka nani sin brisa.

⁴ Moses yawan ra lâ ba wankan Jekob tawanka uplika nani prapatika baku,

⁵ tawan wihtka nani asla taki kan piua ra, bara Israel kiamka nani asla taki piua ra Jesurún ra king bâra kan.”

⁶ Ruben dukiara aisin: “¡Ruben raya sa! ¡Prubia apia, ai uplika wiria baman kabia sin!”

⁷ Juda dukiara aisin: “Dawan, Juda winanka ba wals; yas ai uplika nani wal asla takbia. Karnikam ni dakbi sâks; ai waihla nani mapara hilp muns.”

⁸ Libai dukiara aisin: “Tumim bara Urim ba, Dawan, man dukiam sa; upla kasakkira nani ba man dukiam sa. Masá ra man tânkam marikatma ba, Meribá laya ra aikuki blahwi yabatma ba,

⁹ ai aisika bara ai yapti nani ra win: ‘Yang bui man nani mai kaikras pali’, bara ai muihni nani ra sin win: ‘Man nani ba yang mai kaikras’, bara ai luhpia nani ra win: ‘Man nani ya sma sapa yang nu âpu.’ Witin nani bîlam walisa, aiska pali man lâmka ra iwisa.

¹⁰ Jekob ra bara Israel ra man lâmka bara adarkam nani ni smalks; man altarkam ra bara Dawan lamara, witin kaiki ba ra sîka mâka kîa yamni, daiwan angkan sin sakripaiska daukisa.

¹¹ Dawan ai warkka ai karnika ra yamni muns, bara warkka ba, pain kaiki brima. Waihlam nani nina baikanka ba kalks, man misbara kaiki nani kli tawi balbia apia.”

¹² Benjamín dukiara aisin: “Dawan mita latwan kaiki ba ai kupia kumi sa; Laih Purara iwi ba piu bani ra kan kahbi bri kabia. ¡Ai klahkla munhtara raya kabia!”

¹³ Josep dukiara aisin: “Dawan bui witin tasbayam ba yamni munbia, kasbrika purara ba wina diwas kau pain ba ni, bâra lî tasba mununhtara bâra ba ni sin,

¹⁴ man wina mâ kau pain dâkan ba, mâ kau pain katka ba sin.

¹⁵ Il nani blasi ra kau pain kata ba, kau pain purara ban kaia ra ba,

¹⁶ plun mâ kau pain nani ba ni tasbaya ba banhbia, kupia yamni lâka ba, rahra tilara iwi ba wina bal takbia. Baha sut Josep purara balbia, witin ra sika muihnika nani tila wina bâk sakata ba.

¹⁷ Pranakira sa bîp wainhka kum tawahkia baku, karna pali buplu kum baku, upla sut ra ai aringka ni mangkbia tasba tâ kum wina tâ wala kat. Efraín kwârika tara nani ba baku sa; Manasés tausinka nani ba baku sa.”

¹⁸ Zabulón bara Isacar dukiara naku aisin: “Lilia bas, Zabulón, man taki waia sma dukiara, bara Isacar tintkam watla nani ba dukiara.

¹⁹ Nisan nani ra il ra waia paiwbia bara ani sakripaiska want ba dauki kabia, kabu yuyaka nani wina sin lilia bribia, bara diara manakira nani dukia auhya ra yukukan ba wina sin.”

²⁰ Gad dukiara aisin: “¡Yamni pali sa tasba pîska tara nani bri ba! Gad ba tasba ra prawisa layan mairin baku bara ai klahkla, ai lal sin lakbia.

²¹ Gad lika tasba kau pain ba briaia aitani kan ba brin lâ daukaia dukiara. Upla kainara dimi wan, Dawan mita taibi munan ba baku daukan, kasak lâka ni Israel mawanra ai warkka daukan.”

²² Dan dukiara aisin: “Dan lika layan luhpia sa, Basán wina taki srutwi ba baku.”

²³ Neftalí dukiara aisin: “Neftalí ba Dawan mita ai nakra ra pain kaikan, witin ai yamnika manis pali wal kulkan sa, lakun aiska waupasa tâ ba kat witin dawanka sa.”

²⁴ Aser dukiara aisin: “Yamni pali sma Aser, man Jekob luhpia nani tilara, bara muihnika nani bui sin want sa. Ai mina ra sin batana ni yûkbia,

²⁵ bras bara ayan wal kabia durkam ba, karnakira kama rayakam aiska ra.

²⁶ “Jesurún Gâdka ba wala wal prakaia âpu sa, ai prana ba wal kasbrika purara kasbrika nani ba ra ulisa, man hilpkam ra balaia dukiara.

²⁷ Gâd ban kaia ba man yukuwaikam sa, ai karnika ban kaia ba man tâm baikbia, ai waihla nani ai mawan wina yan plapan bara man ra karnika maikan sauhki tikaia.

²⁸ Israel ba kasak luki tniwi kabia, ai kiamka nani sut kupia kumi ra lâka ra iwi kabia. Ai tasbaya ra plawar nasla nani bara wain nasla nani bâra kabia, kasbrika purara ba wina witin nani ra lî auhi ban kabia.

²⁹ Israel, man lilia sma, ¿ya man wal prakaia sa? Dawan sika swaki mai sakan, witin kainam kahbi main mai kaikisa, ¡witin sika pura luram sordka ba! Waihlam nani man ra bawbia, bara ai prautka ba man mita batakma.”