Kli Smalkanka 32 - DAWAN BÎLA AISKA

¹ “Kasbrika purara, wals yang aisuna na; tasba, yang aisinki na wals.

² “Yang smalkanki ba lî baku auhbia, yang lukanki asla dauki aisamna ba diwas baku kabia, prata nani ra lî sikwan baku, lî tahwan baku twi purara.

³ “Dawan nina dukiara aisi smalkamni: ¡yawan wan Gâdka tara ba tânkam brima!

⁴ Witin ba wan kan kahbaika sa; ai warkka nani ba wapni sa, ai daukanka nani ba kasak sa. Kasakka lâka Gâdka sa, watawika lâka witin ra âpu sa. Witin ba kasakkira sa, ¡witin lika kasak aihwakira sa!

⁵ “Upla saura bara kiamka warha, Gâd mapara buan nani ba sip ai luhpia nani takbia apia:

⁶ ¿baku Dawan ra aibapaia sma ki? Tawan saura kum sins lâka âpu sma ba, ¿witin ba man aisikam apia, man mai papaskra sin? ¡Witin mai paski rayakam maikan!

⁷ “Ninamra tawi kaiki luks; luki bas piua luan ba dukiara, aisikam ra makabi wals mai wibia bara almukkam nani mita param mai sâkbia:

⁸ Yu kum Laih Purara iwi ba nisan nani tasbaya yabaia kan ba ra, tawan piarkika ba wapni kulki kaikan, kuna Israel luhpia nani dukira luki kan,

⁹ Jekob uplika nani ba Dawan dukia nani sa.

¹⁰ Upla iwras tasbaya ra prawan, tasba lâwan nani ra pâsa mita wipi bri tauki kan sakan; ai klahkla mununhtara brih smalki ai nakra yula baku mai kaikan.

¹¹ Yakal ai watla bilara ai tnawa balhbi, bara ai luhpia ra pâlaia smalki ba, baku Dawan ai tnawa nani ba sakbi man nani ba mai bri pâli wan.

¹² “Dawan bui man nani tâm brin, upla wala apia; ¡gâd tringsar wala nani kumi sin hilp mai munras!

¹³ Pura lui il tasbaya kuntrika nani bâk mai brih wan. Insla pata mâ nani mai dakakan, walpa wina nasma maikan diram, walpa karna ba wina batana laya maikan;

¹⁴ bîpkam nani wina tialka laya bara kwahadu mai dakakan, sîpkam lupia wîna kau pain ba maikan piram, Basán sîpka wina guts wainhka nani sin; plawar mâ kau pain ba sin piram, wain sin diram, wain tâlia ba wina sin.

¹⁵ “Sakuna Jesurún batanwan, bara ai mina wauhan (batanwan mita lipi kan), bara Gâd, witin ra papaskra ba, lulki swin; ai kaina kakahbra bara ai sasakra ba bahki kulkan.

¹⁶ Aidul nani sîa briaia kata ba ra mayuni Gâd lawanka ra kupia baiwanka nani ra tuskan;

¹⁷ lasa nani ra sakripais dauki yaram, gâd bahki nani man nani kainara kaikras kapram ba ra; gâd raya balan, wihka apia ba, papikam nani ai rayaka aiska ra mayunra dauki yabras kan.

¹⁸ “Israel, aisikam bara kainam kakahbra ba âmya tikram; rayakam maikan Gâdka ra âmya tikram.

¹⁹ Bara Gâd naha kaiki lawan, bara luhpia waitna nani bara luhpia mairin nani ba lulkan;

²⁰ bara win: ‘Yang lika man nani ra nini tawaisna, bara kaikamna ani kat man nani wih takaskma ba. Kasak pali ba upla watawikira nani, sip luki tniwaia apia luhpia nani ra.

²¹ Yang traiki kaikan gâd kum gâd apia ba wal, ai gâdka kuninkira ba yang ra baku kulki ba; ¡bara yang sin traika kaikamni nisan kum nisan apia ba wal, nisan kum ai tânka briras ba yarka ai kupia sauhkbia!

²² Yang kupi baiwanka ba pauta baku sa, tasba kau munhta kat sin yang kupi baiwanka ba wabia; tasba bara ai mâ nani saki ba sut ami lubia, unta pâwi takaskan ba kat pauta ami wabia.

²³ Baha purara saura nani sut ba lulkamni, baha purak yang trisbaiki nani sut blikamni.

²⁴ Plun wahwanka bara rihka mita prui tiwma; siknis yula tahplika bui sauhki tikbia; witin nani purara daiwan wail nani blikamna, bara piuta puisinkira sin.

²⁵ Luhpiam nani yabal bîla nani ra sord ni aiklabi prui kabia, utla nani ra lika sirang ikaia lâka king aimaki kabia; wahma nani bara tiara nani prui kabia, almuk bara tuktan yapti tialka di nani ba sin.

²⁶ “Yang luki kaikri kan laihura yakabi swiaia, bara naha tasba lukanka wina sin diki sakaia.

²⁷ Sakuna waihla nani lawaska kiki ba yang want apia kapri; want apia kapri waihli ba aimayunbia bara wibia: Naha na Dawan daukras; yang nani karniki ni daukri.’

²⁸ “Israel ba tawan kum lâ ba wina tiwan sa; ¡ai sinska sip briras!

²⁹ Sinskira kan kaka ai tânka briaia kan, ai dahra walaia kan anira buaia ba.

³⁰ ¿Nahki muni kumi ba mita 1,000 ba munan plapan? ¿Nahki muni wâl ba mita 10,000 ba yaban plapan? Kan Dawan baman witin nani kaina kakahbra ba, witin luki kaikan baha nani ba waihla mihta ra mangkaia.

³¹ “Wan waihla nani pain ai dahra walisa ai kan kakahbra ba yawan bri ba wal sip prakras.

³² Witin nani ba wain nasla saura sa, Sodoma bara Gomora wal kiamka nani sa, wain tahpla puisinkira sakisa;

³³ ai wainka ba piuta puisinka baku sa, ¡piuta puisinkira wan saman ban prui ba baku sa!

³⁴ “Naha sut na main kaiki brisni; manakira dukia baku main kaikisni,

³⁵ yang pana munaia yua dukiara ai mana ba aibapi yamni, sauhki tikan kaia yua ba pat baila sa. ¡Awarka ba sin pat lamara sa!

³⁶ “Dawan lika ai uplika tâwan aisabia, kaikka tâ baikaia kau want kabia kaka; Dawan ai albika nani ra umpira lukbia, kaikka swapni sin âpu, karnakira sin âpu kaka.

³⁷ Bara witin ai uplika nani ra wibia: ‘¿Anira sa man nani gâdkam nani ba, baha nani ra kainam kahbaika wisi tniwi kapram ba,

³⁸ baha nani sakripaiskam batanka pi kan ba bara wainka maikan di katma ba? ¡Witin nani bûi bal hilp mai munbia si! ¡Witin nani bal kainam kahbia si!

³⁹ Yang yakan Gâd sni; yang wina gâd wala âpu sa. Yang rayaka yabisni, bara kli mihta dakbisni; yang siknis yabisni, bara kli rakisni. ¡Upla âpu sa yang karniki wina dakbi mai sâkbia!

⁴⁰ Mihti kasbrika purara bukisna bara yang ban kaia lâka brisna dukiara swer takisni,

⁴¹ yang sordki glas baku lipi ba mala daukamni bâra kasakka lâka daukaia ba tâ krikbia, waihli nani ra pana munamni. Misbara ai kaiki nani ra ai mana aibapi yabamni.

⁴² Trisbaiki nani ba tala ni buskamni, sordki nani ba mita witin nani ba âpu daukbia; insauhkan tâlia ba, silak ra mangkan nani ba, waihla nani lalka ba, tâwa yari nani ba tâlia ra.’

⁴³ “¡Nisan nani, Gâd uplika aikuki lilia bas! ¡Witin pana muni ikbia ai albika nani tnata mana pana munaia lâka bal bribia ai waihla nani dukiara bara ai kuntrika uplika ra pâtka ban swih tikbia!”

Moses smalkanka nani lâs ba

^44-45 Moses lika Israel luhpia nani mawanra buan, Jasua Nun luhpia ba sin witin aikuki, naha lâwanka tâ krikan ba wina prakan ba kat aisin.

⁴⁶ Bara Israel luhpia nani ra win: “Yang bui man nani ra mai wîri ba dukiara naiwa pain luki kaiks, bara luhpiam nani ra wis naha lâka daukaia trai kaikbia.

⁴⁷ Kan naha lâka na man nani ban isti prak alkaia apia sa, naha lâka na man nani rayakam sa, baha mita baha tasbaya Jordan baila wala ra ba piua wihka iwma, baha tasbaya sika man nani briaisma ba.”

Gâd bui Moses ra adar yaban pramis tasbaya kaikaia

⁴⁸ Baha yua ra Dawan ba Moses ra aisi, naku win:

⁴⁹ “Abarim tasbaya ra wih Nebo ilka ra uli was, Moab uplika nani tasbaya Jeriko mawan kat yaba, bara baha wina Kenan tasbaya ba kaiks, yang bui Israel luhpia nani ra yabaisna ba.

⁵⁰ Baha ilka ra ulaisma ba bâra pruma bara uplikam nani aikuki asla takma, muihkam Eran sin baku, witin Hor ilka ra pruan bara ai uplika nani aikuki asla takan.

⁵¹ Man muihkam wal sin kasak apia kapram Israel uplika mawanra, Meribá-cadés laya ra banhwi kapram piua ra, Sin tasbaya upla iwras pliska ra, baha nani mawanra yang ra mayunras kapram.

⁵² Baha mita tasba Israel luhpia nani ra yabaisna ba laih wina kaikma, sakuna bahara lika dimma apia.”