Kli Smalkanka 28 - DAWAN BÎLA AISKA

Bîla wawalra nani yamnika

¹ “Man nani Dawan Gâdkam bîla wali daukma kaka, bara ai lâka nani naiwa yang maikri yaba kat trai munma kaka, Dawan mita tawan wala nani purkara mai bukan kabia.

² Ba purkara naha yamnika nani sut na puramra balbia man nani Dawankam bîla walram ba mita.

³ Tawankam ra bara namsla ra sin yamni pali kama.

⁴ Yamni pali kabia luhpiam nani bara namsla wina dakbram nani ba, bîpkam luhpia nani ra, sîpkam nani ra bara daiwram nani sut ra.

⁵ Yamni pali kabia patam mâ patam auhbaika watla ra bara anira plawarkam akbisma ba ra sin,

⁶ bara man dîa sut daukisma ba ra yamni kama.

⁷ “Waihlam nani aiklabaia man nani ra balbia, kuna Dawan bui mihtam ra mangkbia. Wapni kat aipaswi, mampara bal dimbia, sakuna man nani wina aiska slingwi tiwi plapbia.

⁸ “Dawan patam auhbaika watla ra ai yamnika blîkbia, diara wala nani dauki kama ba ra sin, bara kuntrika maikaia ba ra lilia iwi kaia mai daukbia.

⁹ “Man nani ai lâka bîla kat dauki, ai yabalka nina blîkma kaka, Dawan Gâdkam ba tawan holikira baku witin ai dukiara ban alki mai bri kabia, swer mai munan ba baku.

¹⁰ Bara baku tasba aiska ba kaikbia Dawan ra wan pura sunaia lâka ba man nani ra maikan sa, bara witin nani lika man nani ra sibri kabia.

¹¹ Dawan mita luhpa nani ailal maikbia bara ai kupia pihni lâka mamrikbia. Daiwan ailal maikka sauhma, plun mâ nani sin ailal tasba wina sâkma, damikam nani ra yabia win kan ba.

¹² Bara kasbrika purara diara kukanka nani bri ba durka man nani ra kwâkbia tasbayam ra lî yabaia dukiara, bara wark sut ba pâwi kabia. Nisan ailal man nani wina bri kabia, sakuna man nani lika makabras kama.

¹³ Dawan Gâdkam ai lâka maikan ba kat, naiwa yang adarka maikisna na daukma kaka, Dawan mita man nani ba tâura mai swibia, ninara kama lika apia, ban wala nani purara kama, mâyara kama sin apia,

¹⁴ yang bîli nani mai aisari ba wina tnaya ra tawras kama kaka, gâd wala nani ra mayunaia dukiara.

Bîla walras mita trabil nani balbia ba

¹⁵ “Sakuna Dawan Gâdkam bîla wali, ai lâka nani yang naiwa man ra maikisna trai kaikras kama kaka, naha klalka nani puramra balbia:

¹⁶ Man saura pali kama tawan ra bara namsla ra wark takisma ba ra sin.

¹⁷ Saura pali kabia patam auhbaika kwâya ra bara plawarkam akbaika pliska ra sin.

¹⁸ Luhpiam nani ra, patam mâ nani dâkma ba ra saura pali kabia, bîpkam luhpia nani ra, sîpkam nani ra bara daiwram nani sut ra sin.

¹⁹ Bara saura pali kama, man diara nani sut daukisma ba ra.

²⁰ “Dawan lamhtubanka mai blîkbia, sinskam warbi laki bara diara sut daukma ba tilara inan baman kama, piu wiria ra aiska sauhki mai tikbia, man nani daukankam saura ba mita lulki swiram bamna.

²¹ Man kuntrika pliskam briaisma ba ra, Dawan bui klala blîkka âpu mai daukbia.

²² Pruaia sikniska nani sin blîkbia, rihka saura nani, puskan sikniska nani, lapta karna iwbia, plawarkam nani nasla ra lî auhbia apia bara siknis saura nani ba ninam bliki âpu mai daukbia.

²³ Kasbrika pura wina lî sin maikbia apia, tasba na sin plun mâ mangkrika mâ nani saki maikbia apia.

²⁴ Dawan mita daukbia puramra, lî blikaia watlika ra tasba pupuhkan nani bara auhya baman blîkbia, sauhki âpu mai daukbia ba kat,

²⁵ bara waihlam nani bui mai taibia. Witin nani mapara asla taki dimi wama, sakuna aslika ba slingwi witin nani sîa yakabrira baman plapma, bara man tamka mita tasba kingka nani sut mai kaiki kabia ba sirang iwi kabia.

²⁶ Tnawira nani bara daiwan wail nani wînam tara pi kabia, upla sin main mai kaikbia apia.

²⁷ “Dawan bui maikbia sukwan sikniska, yukri, sus bara bulpis, Idsip uplika nani ra daukan kata baku pât wauhma, bara naha sikniska nani wina sip rawma apia.

²⁸ Lamla sin saura lakbia, namkra blain mai daukbia bara aihka baman kama,

²⁹ lapta dinar kat ba blain tihmia ra tauki baku kama. Diara sut dauki kama ba yamni takbia apia; kaikma piua sut ra taiban lâka ra bara rausauhkan ra sin iwi kama, upla kumi sin hilpkam ra aisabia apia.

³⁰ Mayam briaia aisama sakuna waitna wala wal ai maya takbia. Utla paskma sakuna dimma apia, wain nasla mangkma kuna man wainkam mâ wina dih lilia takma apia.

³¹ Mamwan kat bîpkam bul nani nana dakbi kabia, kuna man nani pima apia; mihtam wina birikukam saki bri wabia, kuna kli bri bal maikbia apia; sîpkam nani waihlam nani mihta ra kauhbia, bara upla âpu kabia dakbi maikaia.

³² Mamwan wina luhpiam nani alki upla tringsar ra yabia, bara awar bani ra wih kaiki kan mai daukbia, kuna yabal âpu kama.

³³ Upla man nani bui kakaira apia sma ba, tasbayam wina plun mâ nani sakisma ba pi kabia, ban pât wahwi taiban ra bara lawi mai dauki kabia.

³⁴ Naha nani dukia sut kaiki kama ba ra, man lamla saura mai takbia.

³⁵ Dawan bui sukwan siknis saura maikbia lulam ra, kuhmam dusa ra bara wînam aiska ra sukbia, bara rawaia sin sip apia kama.

³⁶ “Dawan mita man bara kingkam ba sin nisan wala ra yaka brih wabia, man nani bara man nani damikam nani sin kaikras kan ba, bahara gâd wala nani walpa dus ni daukan ba warkka dauki kabia.

³⁷ Bara ani pliska nani sut ra Dawan mita mai brih wabia ba, upla wala nani mita mai kaikbia, saura sirang iwram baku kama, lukan bîla mampara aisi lawaska kiki kabia.

³⁸ Saumuk nani ailal tasba ra mangkma, kuna wiria baman wahbi kama, kan tristrisia nani bui sut sauhki kabia bamna.

³⁹ Wain nasla nani bri main kaiki kama, sakuna laya dima apia, wainka mâ wina sin wahma apia, kan liwa nani mita pih âpu daukbia.

⁴⁰ Tasbayam aiska ra oliv dusa nani bri kama, sakuna baha ni tamya kîa pain lika daukma apia, kan mâ nani ba kauhi kabia bamna.

⁴¹ Luhpa nani lika bri kama, sakuna man wal kabia apia, kan kuntri wala ra alba lâka ra brih wan kabia mita.

⁴² Tristrisia nani mita dusam nani bara tasbaya ba sauhkan kabia.

⁴³ Tringsar nani kuntrikam ra iwi kabia ba piu bani ra kau pâwi karna taki kabia, sakuna man nani lika kau mâyara iwi kama.

⁴⁴ Witin nani mita lin mai muni kabia, kuna man nani bui lin munaia âpu kama, diara sut ra witin nani ba tâura kabia, man nani lika ninara kama.

⁴⁵ “Naha nani klalka sut na man puramra balbia, bara ninam bliki mai alki âpu mai daukbia kat, kan man Dawan Gâd bui ai lâka bîla nani maikan kan ba kat dauki banhras kapram ba mita.

⁴⁶ Naha tânka nani na sain aihkakira baku kabia man puramra, bara kiamkam nani ra sin ban kabia,

⁴⁷ yamnika nani sut maikan ba dukiara Dawan Gâdkam ra liliakira mayunra yaras kapram ba mita.

⁴⁸ Dawan bui waihlam nani man ra blîkbia ba warkka baman dauki kama. Plun wahwi kira, lî diran mai dauki, kwala luha kira kama, diara ailal âpu kama. Bara Dawan mita alba lâka karna munhtara mai swibia, sauhki mai tikbia ba kat.

⁴⁹ Tasba ra kuntri kau laihura ba wina, Dawan mita nisan kum yakal pâli baku, isti pali man mampara blîkbia, baha nisanka bîla aisi ba sin man aisaras;

⁵⁰ upla mawan kraskira nani kabia, almuk nani ra kulkras kabia, tuktan nani ra sin latwan kaikbia apia.

⁵¹ Daiwram luhpia nani sut pibia bara tasbayam wina patam mâ sâkma ba sin, sut prui tiwbia ba kat; plun saumukka, wain, batana, bîpkam, sîpkam luhpia sin swibia apia, bara plun bla pruma.

⁵² “Tawankam tnaya aiska kutbi kir mai bri mai aiklabi kabia, kutbankam kau purara ba karnakira ba kriki tikbia ba kat, bahara lukisma ba slingban kabia. Âu, Dawan Gâdkam bui kuntrikam tawankam nani maikan ba kutbi brih mai aiklabi kabia.

⁵³ Waihlam nani tawankam ra dimi mai aiklabi kabia piua ra, plun wahwanka tara kabia ba tâka mita, Dawan mita luhpiam waitna bara luhpiam mairin nani maikan ba pi kama.

⁵⁴ Ban upla kupia babaiwra ba ra, upla pain baku man nani tilamra ba, ai nakra saura ni ai muihni ra kaiki kabia, ai maya latwan kaiki ba ra, ai luhpia nani kau takaskbia ba ra sin,

⁵⁵ witin nani luhpia wînka wina pibia ba aikuki piaia apia dukiara. Bara tawankam ra bal mai aiklabi piua ra, diara piaia âpu kama ba ra waihlam mita saura pali maikka pât wauhma tawan aiska ra.

⁵⁶ Mairin wîna swapni, taya lalalni man nani tilamra bal ai mina baman tasba ra taibaia apia, bara ai nakra saura ni kaikbia, mayam waitna latwankira ra bara luhpiam nani ra sin.

⁵⁷ Luhpiam nani aisubi taki ba bara mukia man plauyam wina aula ba, witin nani aikuki sir munaia apia dukiara baha sut ba yukuwi pima. Bara waihlam nani tawankam ra aiklabi piua ra diara piaia âpu kabia.

⁵⁸ “Naha wauhkataya ra ulban na sut man nani daukras kama kaka, bara Dawan Gâdkam nina pranakira ba kulkaia wirhika puramra kahban na kulkras kama kaka,

⁵⁹ witin mita siknis saura sibrinkira nani blîkbia man puramra bara kiamkam nani purara sin, sip rawras sikniska nani ba sin blîkbia.

⁶⁰ Idsip purara klala blikan kan ba kaiki sirang iwi kapram ba, man nani puramra sin ban kabia, bara ban pâtkam wahwi kama.

⁶¹ Baha purkara siknis wala nani bara siknis yula wala nani naha wauhkataya smalkanka ra âpu ba blîkbia, mai sauhki tikbia ba kat.

⁶² Bara Israel, man, kasbrika purara slilma nani ailal ba baku, man nani ailal kapram, sakuna nanara wiria mai daukamni, kan Dawan Gâdkam bîla walras kapram ba mita.

⁶³ Bara Dawan mita man ra pain mai lukan yamni mai daukaia man ba ailal sahwi kaia, nanara sin baku pain mai kaiki kabia, mai slingbi mai sauhki tikbia ba sin pain kaikbia, saura wina wakia wal mai daiki sâkbia baha kuntrika man briaisma ba wina.

⁶⁴ Dawan mita nisan bani tilara yakabi mai lakbia, tasba tâ kum wina tâ wala ba kat; bahara upla wala nani gâdka, dus ni bara walpa ni paskan ba ra mayuni kama, man nani sin apia bara damikam nani sin kaikras kan ba gâdka ra.

⁶⁵ Bara baha nisanka nani tilara man nani iwi kama piua ra, âmyapah ris bri kama apia, kan Dawan mita sirang mai iki kabia ba mita, kupiam wirha sarkam brima bara namkra laya wal kama.

⁶⁶ Rayakam ba piua bani ra trabil ra baman kabia, tihmia an kakna sibrin mai dauki kabia, bara piua bani damra wali kama rayakam ba pain apia sa.

⁶⁷ Sirang mai iki kabia ba tâka, bara diara nani kaiki kama ba mita sin, titan kaka wima: ‘¡Ay, nanara tihmia kaia si!’, bara tihmia kaka wima: ‘¡Ay, nanara titan kaia si!’

⁶⁸ Bara Dawan mita mai win kan Idsip yabal kat kli wama apia, ban sakuna duri tara ra mai mangki kli mai lakbia, bara waihlam nani ra alba baku mai atkbia; kuna upla kum sin atki mai briaia brin daukras kabia.”