Kli Smalkanka 27 - DAWAN BÎLA AISKA

Ebal ilka purara lâ ulbaia karnika yan

¹ Moses bara Israel almukka bui upla nani ra naha lâka yan: “Naiwa naha adarka nani maikuna na dauks.

² Jordan lui Dawan Gâdkam bui tasba maikaia ba ra dimma piua ra, walpa tara wirâ brih, taya ba pihni ni dingks.

³ Yang dîa mai smalkri ba bahara sut ulbi mangks. Dawan Gâdkam mita damiki nani ra yabaia win tasbaya ba wina tialka laya bara nasma wal lî baku aubi ba ra dimma piua ra dauks.

⁴ Baha mita Jordan awala luma piua ra yang mai wîri walpaya Abel ilka purara buki bapi taya ba pihni ni dingki swis.

⁵ Bahara altar kum sin Dawan Gâdkam ra paski yama, walpaya aiska kaia kusbi sakaia apia.

⁶ Dawan Gâdkam ra bahara sakripais dauki yabi kama,

⁷ kli wal uplika takaia sakripais nani ba, baha Dawan Gâdkam mawanra man nani pih lilia dauki banhma.

⁸ Yang mai smalki maikri ba walpaya ba ra param pali ulbi swis.”

⁹ Moses ra prîs Libait nani yula kahbi kan ningkara, Israel luhpia nani ra win: “Israel luhpia nani, sâp taki wals. Naiwa na man nani ra Dawan Gâdkam uplika mai kulkan sa.

¹⁰ Nanara Dawan Gâdkam bîla baikra wali, ai lâka adarka nani naiwa yang maikri ba kat dauks.”

Lahtuban bîla nani ba

¹¹ Baha sim yua ra Moses upla nani ra naha adarka yaban:

¹² “Man nani Jordan awala luma piua ra, Simian, Libai, Juda, Isacar, Josep, bara Benjamín kiamka nani Guerizim ilka ra ai pliska nani yas; tawan kum yamni munaia dukiara.

¹³ Bara Ruben, Gad, Aser, Zabulón, Dan bara Neftalí kiamka kat ba, Ebal ilka ra ai pliska nani yas, lahtuban kaia dukiara.

¹⁴ Libait nani lika Israel luhpia nani tâ bribia, ai bîla wini kira naku wibia:

¹⁵ ‘Diara papaskra nani mita ayan slilki aidul lilka kum paski tihmia pliska kum ra swika bâra kabia lahtubanka dukiara, kan baha ba Dawan saura kaikisa.’ Bara upla wibia: ‘Baku kabia.’

¹⁶ ‘Ya ai papika ra, apia kaka ai yapti ra kulkras kabia kaka, lahtuban kabia.’ Bara upla sut bui wibia: ‘Baku kabia.’

¹⁷ ‘Upla tasbaya piarkika pîska implikaia dukiara dakbi aihka lakbia kaka, lahtuban kabia.’ Bara upla sut wibia: ‘Baku kabia.’

¹⁸ ‘Ya bui blain kum ai yabalka wina tnaya ra lakbia kaka, lahtuban kabia.’ Bara upla sut wibia: ‘Baku kabia.’

¹⁹ ‘Tringsar nani mapara, piarka nani ra, rau nani ra lâka watawi daukbia kaka, lahtuban kabia.’ Bara upla sut wibia: ‘Baku kabia.’

²⁰ ‘Ya ai papika mairka wal yapbia kaka, lahtuban kabia, kan baha ba kulkanka yaras sa.’ Bara upla sut wibia: ‘Baku kabia.’

²¹ ‘Daiwan wal ya yapbia ba, lahtuban kabia.’ Bara upla sut wibia: ‘Baku kabia.’

²² ‘Aisa kumi, yapti kumi luhpia mairin ra lakrika waitna mita wal yapbia kaka, lahtuban kabia.’ Bara upla sut wibia: ‘Baku kabia.’

²³ ‘Ya ai dapna mairin wal yapbia ba, lahtuban kabia.’ Bara upla sut wibia: ‘Baku kabia.’

²⁴ ‘Upla ai uplika ikaia luki, yukuwan ra latwan saura yabi ba, lahtuban kabia.’ Bara upla sut wibia: ‘Baku kabia.’

²⁵ ‘Upla pâtkas kum ikan mana ya lalah ai mana brin ba, lahtuban kabia.’ Bara upla sut wibia: ‘Baku kabia.’

²⁶ ‘Naha lâka nani ya kulkras kabia ba, lahtuban kabia, trai kaikras kabia sin.’ Bara upla sut wibia: ‘Baku kabia.’