Kli Smalkanka 26 - DAWAN BÎLA AISKA

Tawahkia bara matawalsip prisantka

¹ “Dawan Gâdkam bui tasbaya maikaia ba ra dimi pliskam brima piua ra,

² tasbaya wina plun mâ tâura dâkma ba, watlika wala ra brih was, Dawan Gâdkam ai nina bâra kaia pliska sakan ba ra.

³ Bahara prîs nani wark taki ba lamara bri sal ki bara wima: ‘Naiwa yang param sakisni, Dawan Gâdki lamara ai kaiki ba ra, Dawan mita yang nani damiki pramis munan ba kuntrika ra pat dimri sa.’

⁴ Prîs nani bui man kwamya watlika ba alki, bara Dawan Gâd altarka mawanra swibia.

⁵ Bara Dawan Gâd lamara mai kaiki ba ra naku param aisama: ‘Damiki nani ba dakni sirpi, Aram uplika nani impapakra kan, Idsip ra diman ai pliska brih iwan, baha ningkara nisan tara kum, karnakira bara ailal sin sahwan.

⁶ Sakuna Idsip uplika nani mita saura wan muni, taibi sin wan munan, bara alba lâka ra sin pât ailal wankan wahwan.

⁷ Bamna yang nani damiki Dawanka Gâdka ra makabri, hilp wan munbia dukiara; bara yawan makabanka ba witin walan, wan umpirka ba sin kaikan, nahki wark karna nani wan dingki kan, taiban lâka ra sin yang nani iwi kapri ba;

⁸ bara wan marikan ai karnika ni bara sibrin lâka kutbi kir wan bri kan sain aihka nani kira wal Idsip wina wan sakan.

⁹ Bara naha pliska ra wan bri bal, naha tasbaya na wankan, tialka laya bara nasma lî baku aubi ba.

¹⁰ Baha mita Dawan tasba wankan ba wina, plun mâ tâura saki banhri ba wina bri aulna.’ “Ningkara watlika wala ba, Dawan Gâd lamara wan kaiki ba ra, mawanra swi si witin lamara lulam krikma.

¹¹ Baha wina Dawan Gâd yamnika nani ba dukiara tamya nani, baku sin Libait nani, tringsar nani man nani tilamra iwi ba sut asla dauki aikuki lilia daukma.

Matawalsip bani wina prisantka nani

¹² “Mani yumhpa bani, matawalsip wina prisantka bri balaia, plun mâ bani wina matawalsip tnaya ra lakram ba wina Libait nani ra yaram ba, bara tringsar nani tawankam ra iwi ba, rau nani ra, piarka nani ra yaram ba witin nani want ba kat uplikam nani tilara pibia.

¹³ Dawan Gâd lamara mai kaiki ba ra aisama: ‘Yang dâkri ba waitla wina pat sait ra lakri sa yamni munaia dukiara. Bara Libait nani, tringsar nani wan kuntrika ra iwi ba ra pat baiki lakri sa, bara piarka nani, rau nani wan tilara ba sin man lâmka wan wiram ba daukbia.

¹⁴ Yang sari bri kapri piua ra, tâski takri ai kulkan piua ra baha wina yang piras kapri, pruan nani purara sin sakripais daukras. Dawan Gâdki, bîlam wali man dîa ai wiram ba sut daukri.

¹⁵ Kasbrika pura wina, man pliskam holikira wan kaiks, bara Israel man uplikam ba, tasbaya man wankram ba ra sin yamni muns, tialka laya bara nasma wal lî baku aubi ba, wan damika nani ra pramis munram ba baku.’

Israel, Dawan bui yamni munan tawanka

¹⁶ “Naiwa man nani ra Dawan Gâdkam bui lâ kum maikisa, man nani trai kaikma alki daukaia kupiam, wînam bara sulkam aiska ni sin daukma.

¹⁷ Naiwa man param aisaram Dawan ba man Gâdkam sa, bara pramis sin daukram ai nina bliki ai lâka bîla nani ba kat kaia.

¹⁸ Dawan mita sin naiwa param aisin sa man ba Israel, man ba witin ai dukia sma, pramis mai munan ba baku, man nani ai lâka bîla ba sut daukma.

¹⁹ Witin mita man wina nisan kum purara mai daukbia, mamyunra sin brima. Nisan wala nani purara sturkam ba tara kabia bara kulkanka sin maikbia, bara witin mai win ba baku kama, tawan kum yamni munan Dawan Gâdkam dukiara.”