Kli Smalkanka 24 - DAWAN BÎLA AISKA

Wal swiaia wauhkataya lâka nani

¹ “Waitna kum mairin kum ra brih ai maya brisa, sakuna ningkara tânka kum ra witin mita saura kaikan kaka, swiaia wauhkataya ulbi yabi, bara ai watla wina mahka blîkka wabia.

² Witin utla wina taki wan ba ra, sip sa wala wal ai maya takaia;

³ sakuna maya wala ba sin witin ra want apia swibia kaka, swiaia wauhkataya dauki yabi ai watla wina sâkka taki wabia, apia kaka, maya waitna ba prubia ba kat,

⁴ mairin ba tâski takan sa kaka, maya waitna pas kata ba sip apia kabia witin wal kli briaia. Naha na Dawan mawanra saura kaikbia, bara Dawan Gâdkam man nani ra kuntrikam dukiam maikuya ba swira daukbia apia.

Lâ sâtka ailal

⁵ “Waitna kum raya pali ai maya takan ba, war ra sip waras wark wala nani daukaia sin apia mani kum aiska; baku diara daukras ai maya lilia yabi kaia ai watla ra.

⁶ “Mil, apia kaka akbaia walpaya sapa upla ra makapara, kan baha ba man pali rayakam makabisma baku sa.

⁷ “Israel uplika kum mita ai tasbaya uplika ra impliki alba natka ra lakbia, apia kaka atkka wabia, baha ba pruaia pâtka ra lakbia. Baku lika man nani tilamra saurka lâka bâra âpu daukbia.

⁸ “Lipar sikniska tânka dukiara, Libait nani mita nahki mai smalkbia ba baku dauks. Yang bui witin nani ra nahki smalkri ba baku daukbia.

⁹ Man nani Idsip wina yabal ra takram piua ra, luki bas Dawan Gâdkam Meri ra daukan ba.

¹⁰ “Man uplikam ra diara kum lin munram sa kaka, watla ra dimi witin dukia dakbi bripara.

¹¹ Latara bûi bîla kaiki bas, witin bui saki sal maikaia ba maikbia.

¹² Kaikrika uplika ba umpira sa kaka, tihmia aiska prisantka ba takaski bri kaia apia;

¹³ titan pali lapta uluya ra pat laki yaban kaia sa, yapaia wabia piua ra, baku ai kwalka ai pura bikaia bri kabia. Baku witin mita yamni mai munbia, bara Dawan Gâdkam mawanra wark pain dauki kama.

¹⁴ “Umpira nani ra impliki, ai mana yabaia sin takaski bri kapara, tawankam uplika kabia, tringsar nani tasbayam ra nani ra sin apia.

¹⁵ Kau lapta ulras kainara wark takan ba mana aibaps, kan umpira sa bara nit sa, baha lalahka raya kaia dukiara. Man nani mampara aisi Dawan ra makabia kaka, pâtkam ba saurakira mai kulkbia.

¹⁶ “Aisika nani ba luhpia nani saura daukan kaka tâwan, sip pruaia pâtka ra lakras. Luhpia nani sin ai aisa saurka tâwan pât ra lulkras, ban sakuna, kumi bani ba silp ai saurka tâwan prubia.

¹⁷ “Tringsar nani bara rau nani lâka ba warha daukpara, piarka nani kwalka sin dakbi bripara.

¹⁸ Man nani Idsip ra alba kapram ba kupiam krauki bas, bara Dawan Gâdkam mita baha wina mai sakan ba, baha mita yang naha lâka maikamna ba dauks.

¹⁹ “Namsla wina plun mâ nani dâkisma piua ra, lal kum pan swiaia âmya tiwbiara; tringsar nani, rau nani, piarka nani man tilamra iwi nani ba swirka wahbi bribia. Baku lika Dawan Gâdkam bui diara sut dauki kama ba ra yamni mai munbia.

²⁰ “Oliv dusa mâ nani wahbisma taim, tnawa kauhan nani ba kli tawi wahpara; sakuna mâ nani takaskuya ba, tringsar nani, rau nani, piarka nani wahbi bribia.

²¹ “Wain mâ nani wahbisma piua ra baha sin kli bilara wahpara; swis tringsar, rau, piarka nani wahbi bribia.

²² Idsip ra man nani sin alba kapram ba kupiam krauki bas, baha mita naha lâka maikisna na sut daukma.