Kli Smalkanka 23 - DAWAN BÎLA AISKA

Tnaya ra laki swin nani ba

¹ “Waitna kum mahbra ba pruki sauhkan, apia kaka wîna ba dakban kaka, sip apia kabia Dawan daknika ra dimaia.

² “Luhpa bastar nani ba Dawan daknika ra dimbia apia, kiamka 10 nani lubia wina bara ningkara sin apia.

³ “Amón uplika nani bara Moab uplika nani ba sip Dawan daknika ra dimbia apia, kiamka nani 10 lubia wina bara ningkara sin apia;

⁴ kan man nani Idsip wina takram ningkara, witin nani tasbaya bâk lui waram bara lî wihki plun sin maikras kan, ba purkara Beor luhpia Balaam Petor Mesopotamia wina aula kan ba ra aibapan, man nani mampara saura aisabia dukiara.

⁵ Sakuna Dawan Gâdkam Balaam ra walras kan, sakuna ai lahtubanka ba lamtwan ba mita, witin mita yamni ra lakan man nani dukiamra.

⁶ Witin nani dukiara wisi, kupia kumi bara painka sin plikpara rayakam aiska ra.

⁷ “Ban sakuna, Edom uplika nani ra kulkanka yaras kapara, kan baha nani ba man nani tamya sa, Idsip uplika nani ra sin, kan man nani lika witin nani ai kuntrika ra iwi kapram;

⁸ ai kiamka nani yumhpa kat ba sip sa Dawan daknika ra dimaia.

Siknis wan alkaia apia lâka nani ba

⁹ “Daknikam aikuki waihlam mapara aiklabaia taki auma piua ra, diara saura nani daukpara.

¹⁰ Man nani tilam wina, upla kum kra yapan taim, wîna laya takan kaka baha daknika wina witin takbia; bara yu aiska ra kli daknika ba ra dimaia apia.

¹¹ Sakuna tutni mapa ra lî brih sikbi sâkbia, ba yu wala titan ra sip kabia ai kiampka ba ra kli dimaia.

¹² “Witin nani klasit ra waia pliska ba, kiamp wina sait ra bri kaia sma.

¹³ Aiklabaia dukia nani tilara dus tatwa sin kum brih waia sma, latara wan mai daukbia ba ra, dusa ba ni unta kum salhki, bahara danh takma bara dusa ba ni tâskika ba kiaubi praki swiaia.

¹⁴ Kan Dawan Gâdkam ba kiampkam ra man nani tilamra taukisa, main mai kaiki maikka waihlam nani pura luma dukiara. Baku bamna, man nani kiampkam ba holi kaia sa, Dawan Gâdkam nakra ra, baku apia kaka man nani tilamra kli taukbia apia.

Yukuwaia watla lâka nani

¹⁵ “Alba kum ai dawanka wina plapi man nani ra wih yukuwaia pliska makabia kaka, kli dawanka ra laki yapara.

¹⁶ Swis witin ani tawanka kau laik taki, pliska sin laik takbia ba bahara man nani aikuki takaski iwi kabia, bara upla kumi sin witin ra trabil munbiara.

Mayunra asla takanka ra, rug mairin nani ra apia kulkan

¹⁷ “Israel luhpia nani tila wina waitna kum kra apia, mairin kra, rug taki gâdkas nani mayuni ba tilara dimi warkka takaia apia sa.

¹⁸ Rug lâka wina lalah sakan ba man nani mita swirka Dawan Gâdkam tempelka ra mangkbiara, baku sâtka ba Dawan pain kaikras sa.

¹⁹ “Uplikam ra taibi munpara, lalah brin ba pura praki mai aibapaia wisi, piaia dukia kabia, diara wala nani brin ba sin apia.

²⁰ Tringsar nani ra lika taibi munaia sma pura praki aibapaia lin takan ba, tasbayam uplika ra lika apia. Baku ba ra Dawan Gâdkam mita ani tasbaya ra iwisma ba, yamni mai munbia.

²¹ “Dawan Gâdkam ra pramis daukma piua ra, daukras kapara, sakuna luki bas Dawan Gâdkam baha mana mai kulkbia, bara man nani ra saurakira mai kulkbia.

²² Pramis kum sin daukras sma kaka, saurakira mai kulkbia apia.

²³ Sakuna kupiam wina Dawan Gâdkam ra pramis daukisma kaka, man nani daukaia sma.

²⁴ “Upla wainka nasla ra dimma kaka, sip sma piaia, sakuna kiamp ra lika brih waia apia.

²⁵ Plawar nasla ra dimma ba ra, yuyaka ba mihtam ni daiks, sakuna plawar ba hu ni daikpara.