Kli Smalkanka 21 - DAWAN BÎLA AISKA

Upla kum nahki pruan tânka nu âpu ba

¹ “Dawan Gâdkam mita man nani kuntrikam maikbia ba ra upla pruan kum bâra sa kaka, sakuna ya mita ikan sapa tânka briras sa,

² almuk nani, wihta nani bal kulki kaikbia, tawan wina laihura pruan sa sapa, bara tawan wala ba lamara sa sapa.

³ Tawanka kau lamara nani ba mita bîp mairin kau wark dingkras ba kum yabia,

⁴ bara tingni bîla kum ra lî bâra kaka ra brih wabia, baha tasbaya ra insla daukras kaka, bara witin nani bui ikbia.

⁵ “Baha ningkara prîs Libait nani, Dawan mita sakripais daukaia warkka yaban ba, baha wih Dawan nina ra yamni munbia. Unsabi blahwanka nani sut ba witin nani wapni daukbia.

⁶ Bara tawan almukka nani sut bîp mairin ikan ba purara ai mihta sikbia,

⁷ bara mapara aisi wibia: ‘Yang nani baha waitnika ba ikras, ya bui ikan sapa sin yang nani kaikras.

⁸ Dawan, Israel man uplikam atki sakram ba saurka ban swih tiks, bara pâtkas kum pruan ba tâwan pâtka kulkbia apia.’ Baku lika baha pruanka mana kulkbia apia,

⁹ bara man nani lika Dawan nakra ra daira kasak ba dauki baha pruanka pâtka ba man nani tilam wina sâkma.

War uplika mairin nani purara lâka nani ba

¹⁰ “Man nani war aiklabaia waihlam nani mapara taki wamna taim, Dawan Gâdkam mita yaka waihlam nani mihtam ra kauhbia ba,

¹¹ witin nani tilara man nani kaikrika mairin wîna daukra pain kum bâra sa kaka, bara laik taki mayam briaia lukma kaka,

¹² sip sma wamtla ra brih waia, bara yarka ai tâwa bara ai asmala nani klakbia.

¹³ Silak ra kauhbia taim, ai kwalka dimi ba daiki swi si bara waitnika watla ra dimbia, bahara kati kumi ai aisa bara ai yaptika pura mata inbia. Baha ningkara, Israel uplika ba witin wal prawbia bara wal ai maya kabia, maya mairin kaia.

¹⁴ Bara brin daukras kabia kaka, sip sa pri swiaia; sakuna swira daukan ba tâwan lalah mana sin atkaia apia, alba baku sin taibi munaia apia.

Luhpia tawahkia nani kulkanka ba

¹⁵ “Sakuna waitna kum mairin wâl brisa, kuna kumi ra latwan kaiki wala ra latwan kaikras, sakuna wâlsut ra luhpa yaban bara luhpia almukka ba mairin latwan kaikras ba wina sakan,

¹⁶ yu kum kra baha waitna witin ai prapatika wina baiki saki ai luhpia nani ra sirka yabaia piua balbia taim, mairin latwan kaiki kan ba luhpia ra ai luhpia ra baku kulkaia sip apia kabia, kan rait pali mairin latwan kaikras kan ba luhpia tawahkia ba saura lukbia.

¹⁷ Ai luhpia ba ra ai luhpia almukka baku kulki, aima wâl prais witin ra ai prapatika ba yabia, kan witin ba sika pas karnika wina balan, bara diara sut ra ai raitka brisa luhpia almukka baku.

Luhpa kiamapara nani klalka ba

¹⁸ “Upla luhpa kum kra brisa, bîla walras kiamapara sa, aisika mita smalki klala wipi ba sin walras,

¹⁹ bara aisika nani mita tawan almukka nani lâka watla ra bri wabia,

²⁰ bara wibia: ‘Wan luhpia nani na wan bîla walras diara sut ra; lâka saura, bla baman sa.’

²¹ Baku sa kaka, tawan waitnika sut mita walpa ni sabi ikbia. Baku lika man nani tawankam ra saurka lâka bâra ba âpu kabia, bara Israel uplika baha wali bara si bribia.

Lâ wala nani ba

²² “Upla kum kra saura daukan tâwan pruaia pâtka ra lakan, dus kum ra paman ba,

²³ ai wîna tara ba tihmia aiska swika lalawaia apia, sakuna baha yua ra mahka bikaia, kan Gâd mapara saura kulkan sa upla kum dus ra pami ikan ba, bara Dawan Gâdkam bui tasba man nani dukiam maikaia ba ra tâski mai kulkbia apia.