Kli Smalkanka 17 - DAWAN BÎLA AISKA

¹ “Dawan Gâdkam ra bîp wainhka kra, sîp kra pain apia skahwa pali kaka, sakripais dauki yapara, kan baha ba witin saura pali kaikisa.

² “Tawan nani Dawan Gâdkam maikaia ba tila wina, tawan kum ra waitna kum kra, mairin kra sturka walma, Gâd yamni kaikras ba dukia daukisa, lâka nani ba krikisa,

³ gâd wala ra ai lula kriki witin nani mawanra mayunisa, lapta, kati, apia kaka, slilma nani ra Dawan mita adar yabras kan ba,

⁴ man nani tânka brima taim, pain tânka pliks rait pali Israel ra naha lâka saura ba daukan sa sapa.

⁵ Bara baha saurka daukan uplika ba, tawan wihtka mawan ra brih wabia, bara walpa ni sabi ikbia.

⁶ “Upla kum ikaia sa kaka, witnis wâl, apia kaka witnis yumhpa ai witnis kaia, sakuna witnis kumi baman aisabia kaka, sip ikras kabia.

⁷ Witnis takan nani ba, pas pruaia pâtka ra lakan uplika ra walpa ni sabia, ningkara tawan aiska sin. Baku lika saura daukan ba man nani tilam wina sâkma.

⁸ “Ban kra prura, unsaban, insauhkan, tasba pîs kum diara wala nani unsabanka tâwan trabil brisma kaka lâka daukaia, Dawan Gâdkam bui plis kum aihka sakan ba ra was,

⁹ bara prîs nani, Libait nani, wihta nani baha yua wark taki nani ra trabilka ba dukiara aisas. Witin nani trabilka bani kat lâka aisi daukbia,

¹⁰ bara baha pliska ra dîa lâka maikbia man nani mita ba kat dauks.

¹¹ Sât aihka daukpara, sakuna witin nani mita nahki daukaia mai marikbia ba kat dauks.

¹² Sakuna bahara prîs nani, apia kaka wihta nani Dawan warkka dauki ba, witin nani dîa daukaia lukbia ba mapara ani uplika ai kupia sauhki bîla walras kaka, pruaia ra laks. Baku Israel ra saurka ba âpu daukma,

¹³ bara tawan ba ai tânka bribia taim, ai kupia baiki diara daukaia ba swibia.

King nani dukiara lâ nani smalkan ba

¹⁴ “Dawan Gâdkam mita kuntrika maikaia ba ra pura lui dakbi bahara iwma taim, bara wima: ‘Wan lamara iwi nisan nani ai kingka bri ba baku, yang nani sin king kum want sna.’

¹⁵ Dawan Gâdkam mita man nani uplikam wina pliki sâkbia bara man nani nisankam kingka brima. Tringsar kum man uplikam apia sa kaka, king baku bripara.

¹⁶ Sakuna baha kingka, aras ailal briaia apia, Idsip ra sin upla kau blikaia apia, aras âiulra kau want kabia tâwan, kan Dawan aisin: ‘Naha yabalka ra kli tawpara.’

¹⁷ Mairin ailal sin bripara, ai kupia diara wala ra tawbia sîa; lalah, gul sin ban ailal bripara.

¹⁸ “King ba ai pliska ra iwbia piua ra, prîs, Libait nani ra naha lâ smalkanka tâura smalkan main kaiki bri ba wina, blîkka ulbi saki briaia.

¹⁹ Baha ulbanka ba ban sait ra laki bri rayakam aiska ra aisi kaiki bas, Dawan Gâdkam ra tara kulki kaia, bara naha smalkanka lalka bani ba kulki ai lâka nani ba trai kaiki kaia,

²⁰ baha mita witin ai tawanka uplika nani ba wal kau tara sa lukaia apia sa, naha lâka nani na wina sin tnaya ra tawaia apia sa. Baku lika witin bara ai kiamka nani ba sin piua yari bribia, Israel kingka aimakaia.