Kli Smalkanka 16 - DAWAN BÎLA AISKA

Insal luan Yua Liliaka nani

¹ “Abib katka ra, Dawan Gâdkam ra mayunra yabi banhs Insal luan Yua Liliaka ba dauki, kan baha katka ra sika Dawan Gâdkam Idsip wina mai sakan ba.

² “Witin ai nina bâra kaia pliska aihka sakan ba ra, Insal luan Yua ra bîpkam bara sîpkam nani Dawan Gâdkam ra sakripais dauki yama.

³ “Daiwan sakripais daukan ba, man nani wik kum brit îs mangkras wal pi bas, baha ba pât wahwan britka sika, kan isti pali Idsip wina takaia kapram, baku man nani rayakam aiska ra Idsip wina takram ba dukiara kupiam krawi kabia.

⁴ Naha wikka aiska, man nani tasbayam aiska ra brit îs âpu kaia, bara daiwan wîna sakripais daukan ba baha yua aiska tutni kat yu wala ra dimuya ba, titan wala dukiara kau swiaia apia.

⁵ Tawan sut Dawan Gâdkam wina maikan ba ra, Insal luan Yua sakripaiska dauki yapara.

⁶ Witin ai nina bâra kaia pliska, witin mita aihka sâkbia ba, bahara lika tutni lapta dimaia man awarka ra sakripais dauki yama, kan baha awarka ra sika man nani Idsip wina takram.

⁷ Sakripais daukan wîna ba Dawan Gâdkam ai nina bâra kaia pliska sakan ba ra piaki pis, bara titan wala wamtla ra kli tawi was.

⁸ Yu 6 ba man nani brit îs âpu pi kama, bara yua 7 ba asla aidrubaia yua bâk sâkma, Dawan Gâdkam ra mayunra yabaia; baha yua ra wark kumi sin daukaia apia sma.

⁹ “Plawar dâkaia piua wina kulki bas, 7 wik lubia taim,

¹⁰ wik bilara Dawan Gâdkam ra mayunra yabaia, lilia nani dauks, bara Dawan Gâdkam yamnika nani maikan ba kupiam wina witin mawanra bri balma.

¹¹ Bara Dawan Gâdkam mita witin ai nina bâra kaia pliska kum aihka sakan ba ra luhpiam nani, albikam nani, Libait nani, tringsar nani, rau nani bara piarka nani man nani tilamra iwi ba aikuki lilia dauks.

¹² Luki bas man nani sin Idsip ra alba kapram ba, lâ nani sut ba trai kaiks daukaia.

¹³ “Plawarkam sut dâki bara wainkam sut taibi luma taim, wik kum ba Utla Papakni liliaka dauki bas.

¹⁴ Naha liliaka ra luhpiam nani, albikam, rau nani, piarka nani sut tawankam ra iwi ba aikuki lilia dauks.

¹⁵ Naha liliaka na Dawan Gâdkam, witin ai nina bâra kaia pliska kum aihka ba ra wik kum witin ai nina ra mayunra yabaia liliaka dauki bas; kan Dawan Gâdkam, patam mâ nani sut ra, warkkam sut ra yamni munbia, bara man nani âmyapah kama.

¹⁶ “Waitna nani ba mani kum bilara aima yumhpa Dawan ai nina bâra kaia pliska aihka sakan ba ra bûi kaia sa Dawan lamara lilia nani daukbia, brit îs mangkras piaia wikka nani ba bara utla tanhta liliaka ra Dawan kaiki ba lamara bûi nani ba kumi sin ai mihta bîla baman waia apia sa.

¹⁷ Ban sakuna, kumi bani prisantkam nani Dawan Gâdkam yamni mai munan ba wina brih wama.

King kum nahki ai warkka daukaia ba

¹⁸ “Kiamka bani dukiara Dawan Gâdkam bui tawan nani maikan ba ra, wihta nani mangks, kasak rait pali tawan lâka daukaia dukiara.

¹⁹ Upla nani mawanka luki kulkpara; upla kum kum wihki wala nani wal sât aihka kulkpara, bara yarka sturi bahki ni kupiam alkbiara, kan sturi bahki aisi ba sinskira nani nakra prakisa bara sturi kasak aisi uplika nani aisinka ra sin sauhkisa.

²⁰ Kasak kat kasakka nina bliki bas, bara man nani, Dawan Gâdkam mita kuntrika maikaia ba ra dukiam brih raya kama dukiara.

²¹ “Man nani dus sâtka kumi sin mangkpara baha aidulka ra mayunaia, Dawan Gâdkam altarka lamara sin man nani baha mangkpara.

²² Idan nani walpa nani ra ai gâdka nani lilka dauki bahara ai pura suni ba, man nani bripara, kan Dawan baha ba pain kaikras.