Kli Smalkanka 13 - DAWAN BÎLA AISKA

¹ “Man nani tilam wina prapit kum kra, apia kaka yapi kakaira kum taki sain nani dauki, diara aihka nani dauki smalkbia kaka,

² sain nani dauki maisa pakan ba baku takbia wisi mai wibia kaka: ‘¡Kaisa man nani bui gâd nani kakaira apia sma ba ninara waia; kaisa mayunra dauki yabaia!’,

³ man nani bîla walpara. Kan Dawan Gâdkam man nani ra traikam kaikaisa man nani ba kupiam aiska bara sulkam aiska kira witin ra latwan kaikisma sapa.

⁴ Dawan Gâdkam ra baman mayuni asla witin ra iwi, ai nina bliki bas.

⁵ Bara baha prapitka, apia kaka yapi kakairika ba pât ra lakan kabia, Dawan mapara buaia mai smalkan bamna, witin bui Idsip ra alba ra mai dingkan kan wina pri mai sakan ba, bara Dawan Gâd mita yabal nani mamriki adar maikan, baha nani wina tnaya ra tawaia. Baku lika saura lâka man nani tilamra ba, âpu daukan kabia.

⁶ “Ban kra muihkam, luhpiam nani, mayam lamtwankira, apia kaka pâmnika man wal kau pain ba mita, damra walras tukbi mai dingkbia gâd wala, damikam nani sin kaikras kan ba ra mayunra dauki yabaia,

⁷ upla nani bahmuna gâdka nani bri ba, lamara, apia kaka laihura, tasba tnata wina tasba tâ wala kat kutbi kir bri ba,

⁸ brinka nani ra dimi, aiblakwi bîla walpara; witin ra umpira kaiki, latwan luki ai dahra sin yukukpara;

⁹ sakuna witin ba iks. Man pas mihtam buks witin ba ikaia, baha ningkara upla sut ai mihta bukbia.

¹⁰ Idsip ra alba ra kapram, Dawan Gâdkam baha wina mai sakan ba tnaya ra mai lakaia dauki ba tâwan walpa ni sas, ikma ba kat.

¹¹ Naku natka ra kli saura daukaia dukiara, Israel aiska ai tânka brih sibrin bri bribia.

¹² “Baku Dawan Gâdkam baha tawankam nani ra iwaia maikan ba kum ra witin iwaia wabia kaka, dîa takan ba tânka bri kabia

¹³ Gâd bîla walras uplika nani mita baha tawanka uplika nani kakaira apia gâdka ra mayunaia yabalka ba mawahkisa.

¹⁴ Man nani naha tânka na pain pliki kaikaia sma, tilamra naha lâka saura brinka ba rait pali bâra sa sapa.

¹⁵ Bara baha tawanka uplika nani, ai daiwra nani, diara sut baha bilara bâra ba sut, sord ni iki âpu dauks.

¹⁶ Tawan lilara upla aipaswaika pliska ra, ai dukia kukanka nani ba bri si paski swis, bara tawanka ba ra, diara nani sut waihlam nani wina dakbram ba pauta ra angks. Sauhki tiks, Dawan Gâdkam ra prisantka baku angki yas. Bara baha tawanka ba baku ban kabia, kli raya paskbia apia.

¹⁷ “Sauhki tikan dukia nani wina kumi sin man wal takaskpara, bara Dawan lika man nani ra ai kupia sauhkbia apia. Damikam nani ra yabaia win ba baku, man nani ra maikka ailal sauhma,

¹⁸ naiwa Dawan Gâdkam lâka man nani ra maikri ba bîla wali, ai nakra ra wapni baman daukisma kaka.